Amafya Yaba mu Kukansha Abana Pali Leelo

ICUNGULO bushiku cimo, umwine wa cikuulwa ca kuliilamo alepekanya ukwisala icikuulwa cakwe pa kuti aye ku ng’anda. E lyo banamayo babili no mwana baingile mu cikuulwa no kusoso kuti balefwaya ifya kulya. Apo alinakile sana, kwashele fye kwempe ukuti abakaanine ati icikuulwa nacisalwa, lelo apingwilepo ukubashitisha. Ilyo aba banamayo babili balelya no kulanshanya, umwana alebutauka mu cikuulwa, ukupoosaika babisiketi pa nshi no kubashonaula ku makasa. Ukucila ukuti banyina bamukalipile, bena baleseka fye. Ilyo aba basukile bapwa ukulya no kuya baya, umwine wa cikuulwa uwanakile cibi akwete ncito na imbi iya kuwamya ifyalamfishe umwana.

Nga fintu napamo mwishibe, ili lyashi ilyacitike icine cine lilelangilila ukuti mu ndupwa ishingi, abantu tabalekansha bwino abana. Kwaba imilandu yalekanalekana iyalenga. Abafyashi bamo baleka abana ukulaicitila ifyo balefwaya, ukutontonkanya ukuti abana bafwile ukupeelwa ubuntungwa. Nelyo pa mulandu wa kuti abafyashi balikwatisha ifya kucita, tabakwata inshita ya kusakamana abana no kubakansha bwino bwino. Abafyashi bamo batontonkanya ukuti isukulu e lyacindama sana ku mwana wabo, e ico balapeela umwana ubuntungwa ubwingi kulila fye alecita bwino mu fya ku sukulu, afika na ku koleji iisuma.

Lelo, bamo batila ifishinte fya mikalile ifya bafyashi na bantu fye mu bwikashi fifwile ukwalulwa. Batila abana baletendeka bwangu ukucita bumpulamafunde ubwalekanalekana kabili ulukakaala lwa ku sukulu lulekulilako fye cila bushiku. E ico, kafundisha mukalamba pe sukulu limo mu musumba wa Seoul, ku calo ca Republic of Korea, akomailepo ukuti ukukansha abana ukuba no buntu busuma e cifwile ukucitwa sana. Atile: “Ilyo umwana aba ne mibele isuma e lyo nomba engaya ku sukulu.”

Abafyashi abengi abafwaya abana babo ukuya ku koleji no kwikala bwino balasuula ukusoka. Nga muli bafyashi, bushe mufwaya umwana wenu ukuba shani? Bushe mufwaya ukuti akakule bwino no kwisabombe fya mpomfu? Bushe mufwaya ukuti akabe ne cikuuku kuli bambi, akabe uushayafya, kabili uwashipa nangu ifintu fyafye shani? Nge fyo mufwaya ninshi belengeni icipande cikonkelepo.