‘Batusambilishe Ukucindika Imipepele Yabo’

NTE umo ukufuma ku citungu ca Rovigo, ku Italy, aishileishiba ukuti ali na kansa no kuti alilwele icabipisha. Pa numa ya kwikala mu cipatala imiku iingi, banasi abafwilisha abalwele ba kansa balemutensesha ku ng’anda. Pa nshita ali mu cipatala aebele aba kumundapa ukuti taali na kubikwamo umulopa.

Icitetekelo cakosa ica uyu mulwele wa myaka 36 no kuitemenwa ukukonka ifyo balemweba fyaliteemwine nga nshi aba fya cipatala. Ilyo uyu mulwele ashilafwa ku bulwele bwa kansa, umo pali banasi balemutensha alembele muli magazini wa fya kusakamana abalwele pa fyo abombele no mulwele uo ainike ati Angela.

“BaAngela balicincila kabili balafwaisha ukuba abomi. Balishiba ifyo balwalisha na fintu ubulwele bwabo bwabipisha, kabili balefwaya icingapwisha ubulwele, nelyo umuti, nga fintu fye na ifwe bene twingacita. Twaile tuleishibana panono panono. Tabaletukaanya nga tulefwaya ukubaafwa. Ukucila, ukuyangusha kwabo kwalengele ifintu ukwanguka. Twalitemenwe ukubatensha, pantu twalishibe ukuti iyi yali ni nshita ya kuba no muntu umufumacumi kabili twali no kunonkelamo. Mu kwangufyanya twaishibe ukuti imipepele yabo yali no kulenga ukubondapa ukwafya.” E fyo uyu nasi alemona pantu atontonkenye ukuti baAngela balingile ukubikwamo umulopa, untu bakeene.—Imilimo 15:28, 29.

“Nga bantu abakanshiwa ukusakamana abalwele, twaebele baAngela ukuti tatwasuminishenye pa fyo bapingwilepo, lelo balitwafwile ukumfwikisha ifyo ubumi bwacindeme kuli bene. Twalyumfwikishe na kabili ifyo imipepele yacindama kuli bene no lupwa lwabo. BaAngela tabafwaya ukufwa nangu panono. Ubulwele tabwabalenga ukunaka. Balikosa. Balafwaya ukuba no mweo, ukulwisha no kutwalilila fye ukuba aba mweo. Balilenga umupampamina wabo, ne co basuminamo ukwishibikwa. Baliba no mupampamina uyo ilingi tushikwata, ne citetekelo icakosa ukucila icesu. . . . BaAngela nabatusambilisha ifyo cacindama ukucindika imipepele yabo, ukupusana sana na fintu twasuminamo ukulingana ne ncito tubomba. . . . Natusumina ukuti ifyo baAngela batusambilishe fintu fyacindama nga nshi, pantu tulakumana na bantu bapusanapusana, abali na mafya yapusanapusana, kabili aba mipepele yapusanapusana, na kabili kuti twasambililako fimo no kubaafwa.”

Lyene icipande ca muli magazini cakomaile pa cipope caba mu fishinte fikonka banasi ba ku Italy, icasuminishiwe mu 1999, icitila: “Nasi pa kubomba imilimo yakwe, alalanguluka na pa mipepele ya muntu umo na umo, imibele yakwe, intambi, ukusanshako fye no mutundu e lyo nampo nga mwaume atemwa mwanakashi.” Inshita shimo kuti ca-afya kuli badokota na banasi ukucindika ifyo umulwele asuminamo, kabili ilyo badokota baitemenwa ukucindika ifyo asuminamo, umulwele alatasha icine cine.

Ifyo Inte sha kwa Yehova bapingula pa bumi bwabo ne myundapilwe balitontonkanyapo bwino bwino. Balatontonkanyapo sana pa fyo Amalembo yalanda, kabili nga fintu cali kuli baAngela, tababa bankosamitwe. (Abena Filipi 4:5) Mu calo conse, impendwa ilekulilako iya bakondapa abaleitemenwa ukucindika bakampingu ba baNte abo bondapa.