Bushe Amapepo Yenu Kuti Yalenga Ifintu Ukuba Eyefilyako?

IFWE bonse twalikumanyapo amafya yabipisha aya kuti tatwishibe ne ca kucita. Baibolo ilangilila ukuti umutumwa Paulo alishibe ukuti ipepo kuti lyalenga ifintu ukuba eyefilyako.

Ilyo Paulo mu lufyengo akakilwe mu Roma, alombele abasumina banankwe ukumupepelako. Kabili atile: “Ndemukonkomesha apakalamba ukucite ci, ukuti mbweshiwe bwangu kuli imwe.” (AbaHebere 13:18, 19) Pa nshita imbi, Paulo alandile pa kucetekela akwete ukwa kuti Lesa ali no kwasuka ipepo lya kukakulwa bwangu. (Filemone 22) Bwangu bwangu, Paulo alikakwilwe kabili abwelele mu mulimo wakwe uwa bumishonari.

Lelo kwena bushe ipepo lyenu kuti lyalenga ifintu ukuba eyefilyako? Nalimo. Lelo ibukisheni ukuti ipepo talyaba cibelesho fye ica baya ku mapepo. Kulanshanya kwa cine cine na Shifwe wa mu muulu uwatutemwa kabili uwakwata amaka. Tatufwile ukushimunuka ukulungatika ifyo tulefwaya mu mapepo yesu kabili lyene ukulolela ifyo Yehova akasuka.

Lesa limbi teti asuke mu kulungatika amapepo yonse, kabili limbi teti asuke ukulingana na fintu tule-enekela. Paulo libili libili apepele ulwa “muunga mu mubili.” Te mulandu na cintu uyu muunga wali, Lesa taufumishe mu mubili wa kwa Paulo, lelo amusansamwishe na mashiwi ya kukoselesha aya kuti: “Icikuuku candi ica bupe fye cakumana kuli iwe; pantu mu kunaka e mo amaka yandi yalelengwo kufikapo.”—2 Abena Korinti 12:7-9.

Na ifwe bene kuti twacetekela ukuti nelyo ca kuti Lesa tafumishepo ubwafya bumo, ‘akacita na pa kufuminamo ukuti [tube] na maka ya kubushipikisha.’ (1 Abena Korinti 10:13) Kasuba kamo nomba line fye, Lesa akapwisha ukucula konse ukwa bantunse. Lelo pali ino nshita, ukushintilila pali ‘Komfwa we pepo’ kuti kwalenga ifintu ukuba eyefilyako.—Amalumbo 65:2.