Ubupe Bwawamisha Mwingapeela

KU MPELA ya bumi bwakwe, umutumwa Yohane umukoloci alembele ati: “Nshikwete ica kunenga ukutootela icacila pali ifi, pa kuumfwa ukuti abana bandi benda mu cine.”—3 Yohane 4.

Uyu mutumwa wa busumino alelanda pa bana ba ku mupashi. Lelo, ifyasosele umutumwa e fyo na bafyashi abengi bengasosa. Balibombesha ukukusha abana “mu kusalapula no kukonkomesha kwa kwa Yehova,” kabili nomba balasekelela ukumona abana babo abakalamba ‘bale-enda mu cine.’ (Abena Efese 6:4) Na kuba, ubupe bwawamisha ubo umo engapeela abana bakwe, kubasambilisha inshila ya ku mweo wa muyayaya. Ne ci ni mu kuti, bukapepa, ubusanshamo ukwikala umwabela ifyo Yehova afwaya Abena Kristu ukwikala, bupeela “icilayo ca bumi pali nomba no bukesa.”—1 Timote 4:8.

Abafyashi ababombesha ukusambilisha abana pa lwa kwa Lesa, balicindama sana kuli Yehova, Shifwe wapwililika. Abana nga bakonka ifyo bafundwa, balasekelela sana ilyo balekonkelela ukupepa kwa cine pamo na bafyashi babo. Ilyo abana balekula balebukisha ifisuma ifingi pali iyo nshita. Bamo bebukisha ne nsansa umuku wa kubalilapo balandile ilyashi mwi Sukulu lya Butumikishi ilya Bulesa. * Napamo balatontonkanya pa fyo cali umuku wa kubalilapo ukubelengela mwine ng’anda ilembo ilyo bali mu bunte bwa ku ng’anda ne ng’anda na bafyashi babo. Kuti balaba shani ifyo baalekutika ilyo abafyashi babo balebabelengela mu Icitabo Candi ca Malyashi ya mu Baibolo nelyo mu citabo ca Kutikeni Kuli Kasambilisha Mukalamba? * Gabriel alebukisha fimo ifyo atemenwe sana. Atila: “Ilyo nali ne myaka ine fye, bamayo balenyimbila inyimbo sha Bufumu cila bushiku ilyo baleipika. Ncili ndebukisha ulwimbo lumo ulwa Bufumu kabili lulandetela insansa. Pa numa, lwalingafwile ukumona ifyo ukubombela Yehova kwacindama.” Napamo na imwe mulebukisha ulwimbo ulusuma ulo Gabriel alelandapo. Lwimbo lwalenga 157 ulwaba mu citabo ca nyimbo ica Imbileni Yehova Amalumbo, no lu lwimbo lutila “Pepa Yehova mu Bwaice.”

Ulwimbo lutendeka ati: “Kwafume lumbo ku bana na ko;/Kulosha kuli Yesu mu lwimbo.”  Ca cine, kwali abana abakwete ishuko lya kubishanya na Yesu, kabili bafwile balemutemuna ku mibele yabo iisuma na bucishinka bwabo. Yesu alandile na pali filya abana baitemenwa ukusambilishiwa ukuti e fyo na bakonshi bakwe bafwile ukuba. (Mateo 18:3, 4) Kanshi na bana balilinga ukupepa Yehova. Na kuba amashiwi ya lwimbo yatwalilila ati: “Ee, na bo kuti balumba Lesa.”

Abana abengi balilenga Lesa no lupwa lwabo ukucindikwa pa mulandu wa misango yabo iisuma pa ng’anda, pa sukulu, na mu fifulo fimbi. Mwandini lipaalo kuli bene ukukwata “abafyashi ba cishinka.” (Amalango 6:7) Abafyashi abatiina Lesa balacita ico Lesa asosa, uyo pa kuba Shifwe wa kutemwa, asambilisha ifibumbwa fyakwe ukwenda mu nshila fifwile ukwendamo. Kabili mwandini balapaalwa! Kabili na bo nga basambilisha abana babo, balacankwa ukuba na bana “aba cumfwila”! (Esaya 48:17, 18) Angélica, uubombela pa maofeshi ya Nte sha kwa Yehova mu Mexico, atile: “Abafyashi bandi lyonse balepoosako amano ku kukonka ifishinte fya mu Baibolo. Ico calengele ubwaice bwandi ukuwama. Nali uwasansamuka.”

Abena Kristu ba musango yo balasumina ukuti calicindama ukusunga bwino ubupe bwa ku mupashi bapeelwa. Napamo uli mwaice uulekushiwa mu lupwa lwakwata imibele isuma iya Bwina Kristu. Nga ni fyo, ulwimbo lumo lwine lwakucincisha ati: “Sungeni nshila yenu busaka.” Ikafike nshita ilyo mukaipingwila ifya kucita, e ico pali nomba “kuli Yehova muleicefya./Lelo mwilafwaya ukulumbuka.”

Nga ca kuti mwapoosa sana amano ku kuti mulumbuke, ninshi mwalufyanya, pantu fyonse ifyo mwakanshiwa kuti fyaba fya fye kabili kuti mwayonawila ne cilolelo ca kwikala umuyayaya. Ukufwaisha ukulumbuka kuti kwalenga mwanenuka. Bambi bafika na ku kubishanya na bashikonka ifishinte fya Bwina Kristu nangu line bamoneka kwati baliba fye bwino kabili basuma. E fyo cali kuli Tara, uwalandwapo sana mu cilangililo ca muli Video wa Young People Ask—How Can I Make Real Friends? Nga Tara, imisepela ya Bwina Kristu bonse ababishanya na bashacindika ukupepa kwa cine nangu cibe shani bakakutuluka ukuti “ukwangala na babi takwawama,” nga fintu ulwimbo lusosa. Pa kulundulula imibele isuma kulaba ukubombesha pa myaka iingi, lelo iyo mibele kuti yaonaulwa mu nshita fye iinono.

Ca cine, tacayanguka ukuba na katiina kuli Lesa. Na lyo line, nga fintu ulwimbo lutwalilila ukusosa, “Lesa afwaya mwe baice,/Peni  Yehova umulimo pe fye.” Nga mwacite fyo, ninshi mwaiteyanisha ifikalenga ifintu ukumuwamina icine cine. Kabili “Ubuseko bwenu bukesafula.” Mukamona bwino bwino ukuti tapali icingamulesha ukucita icisuma mu menso ya kwa Yehova ilyo alemusakamana mu kutemwa. E fyo mwingaba abakalamba abakosoka kabili abatiina Lesa. Na kabili, ukukonka ifyo ulupwa lwa Bwina Kristu lulemufunda kukamupeela ishuko lya kulenga “Lesa akatemunwe.” Lishuko nshi lingacindama ukucile ili ilyo umuntunse engakwata?—Amapinda 27:11.

E ico, mwe misepela, lyonse muleibukisha ubucindami bwa fyo Yehova na bafyashi benu bamusambilisha. Shi ukutemwa bamutemwa apakalamba nakumucincishe ukucita ifisuma mu menso ya kwa Yehova. Nga filya Yesu no mulumendo wa busumino Timote bacitile, na imwe mukalenga Shinwe wa mu muulu na bafyashi benu ukuba ne nsansa. Kabili na imwe nga mwakwata abana, napamo mukasuminisha ifyasosele Angélica uo tulandilepo kale. Atile: “Nga nakwata umwana, nkabombesha ukumusambilisha ukutemwa Yehova ukufuma ku bunya, pa kuti ukutemwa Yehova kukabe e cintu cacindamisha mu bumi bwakwe.” Cine fye, inshila yatambalala iitwala ku mweo wa muyayaya, e bupe bwawamisha umo engapeelwa!

[Amafutunoti]