Kalata Kuli Noa

“KULI Noa, nalibelenga imiku iingi muli Baibolo pali iwe ne fyo wakuulile icibwato umo iwe no lupwa lobe mwapusukile ilyo kwali ilyeshi.”

Ifi e fyo umukashana uuli ne myaka 15 uwe shina lya Minnamaria atendeke kalata wakwe ilyo abasambi ba pa sukulu aba myaka 14 ukufika ku 21 baebelwe ukulemba bakalata. Pa numa baali no kusala kalata iyali no kuwamisha. Uku kulemba kwapekanishiwe na ba Finnish postal services, the Federation for Finnish Mother Tongue, e lyo na ba Finnish Literature Society. Abasambi baali no kulemba kalata ukufuma mu citabo icili conse. Baali no kulemba kuli kalemba wa citabo nelyo ku muntu uwalandwapo muli ico citabo. Bakafundisha basalile amakalata ukucila pali 1,400 no kupeela bakapingula aba kusala abalembele bwino. Lyene abalepingula basalile kalata iyalembelwe bwino sana, kabili basalile na makalata 10 aya bapeelwe icilambu ca bubili, e lyo na yambi 10 aya bapeelwe icilambu ca butatu. Minnamaria alitemenwe sana ukuti na o alipokeleko icilambu ca butatu.

Mulandu nshi Minnamaria, umusambi wacaice, alembeele kalata kuli Noa uwaliko imyaka 5,000 iyapita? Atila: “Ico nabalilepo ukutontonkanyapo ni Baibolo. Abantu abalembwa muli Baibolo nalibeshiba bwino. Nalibabelengapo imiku iingi kabili mbamona kwati ba mweo. Nasalile Noa pantu imikalile yakwe yali iisuma nga nshi kabili yalipusana ne mikalile yandi.”

Minnamaria asondwelela kalata wakwe na mashiwi ya kuti: “Ucili ca kumwenako ca citetekelo ne cumfwila. Ifyo wacitile fikoselesha bonse ababelenga Baibolo ukuba ne citetekelo.”

Uyu kalata uo kabelenga wa Baibolo uwacaice alembele alelangilila bwino ukuti cine cine Baibolo ‘ya mweo, kabili ya maka’ pa bantu, abanono na bakalamba.—AbaHebere 4:12.