Lesa Alamusakamana Icine Cine

CA CIFYALILWA fye ukupaapaata Lesa ukuti atwafwe ilyo tuli mu mafya yabipisha. Pantu na kuba, “mukulu, kabili wa maka ayengi; umucetekanya wakwe wabulwe mpendwa.” (Amalumbo 147:5) E wingatwafwa fye ukucimfya amafya. Kabinge, Baibolo itweba ‘ukupongolwela ku cinso cakwe ifya mu mitima yesu.’ (Amalumbo 62:8) Lelo mulandu nshi abengi bayumfwila ukuti Lesa taasuka amapepo yabo? Bushe ici calola mu kuti tatusakamana?

Ukucila ukwangufyanya ukupeela Lesa umulandu pa cimoneka kwati kukanatupoosako mano, ibukisheni ilyo mwali abaice. Ilyo abafyashi benu bashamupeele fyonse ifyo mwalefwaya, bushe mwalitalile amusosa ati tabamutemwa? Abana abengi e fyo basosa. Lelo ilyo mwakulile, mwalikutulwike ukuti ukutemwa kulangwa mu nshila ishingi kabili ukupeela umwana icili conse ico alefwaya te kutemwa kwa cine cine.

Cimo cine na kuli Yehova. Nga ca kuti lyonse taleasuka amapepo yesu ukulingana na fintu tulefwaya, te kuti ninshi tatupoosako mano. Na kuba, Lesa alalanga ifyo ayangwako kuli ifwe mu nshila ishingi.

“Muli Wene E mo Tubela no Bumi”

Ica kubalilapo, Lesa e walenga ukuti ‘tube no bumi no kusunkana no kubako.’ (Imilimo 17:28) Ubumi atupeela bushininkisho bwa kuti alitutemwa icine cine!

Kabinge, Yehova alatupeela ifyo tukabila pa kuti tutwalilile abomi. Tubelengo kuti: “E umesesho mulemfwe ku fitekwa, ne fimena fiteku ku fibomfi fya bantunse; ku kufumye cilyo mu mushili.” (Amalumbo 104:14) Na kuba, Kalenga wesu tatupeela fye ifyo tukabila mu bumi. Muli bukapekape bwakwe alatupeela “imfula ukufuma mu muulu ne nshita sha kutwala ifisabo, ukwisushamo imitima [yesu] ica kulya no kusangalala.”—Imilimo 14:17.

Na lyo line, bamo kuti bapapa abati, ‘Nga ca kuti Lesa alitutemwa sana, mulandu nshi alekela ukuti tulecula?’ Bushe namwishiba ubwasuko kuli ubu bwipusho?

Bushe Lesa E Ulenga Amafya?

Amafya ayengi aya bantunse ya kuiletelela fye. Ku ca kumwenako, amangalo yamo ayengaleta amasanso yalishibikwa bwino bwino. Na lyo line, abantu balaitumpa muli bucisenene, bucakolwa no kubomfya bubi bubi imiti, ukupeepa fwaka, ukwangala amangalo yabika ubumi bwabo mu kapoosa mweo, ukubutusha bamotoka, e lyo no kucita ne fintu fimbi. Nga ca kuti ifya musango yu fyaletako ukucula, bushe nani mwingapeela umulandu? Bushe ni Lesa nelyo uulecita ifyabulamo amano? Icebo ca kwa Lesa icapuutwamo citila: “Mwilufiwa: Lesa tasentekwa. Pantu ico umuntu alebyala, e co kabili akalobolola.”—Abena Galatia 6:7.

Na kabili, ilingi abantu balacitilana ifyabipa. Ilyo mu calo muli inkondo, kwena te kuti tutile Lesa e walenga ukucula kwingafuma mu kulwa. Ilyo ncitatubi acena umwikala calo munankwe, bushe ninshi ni Lesa e walenga kulya kucenwa nelyo imfwa? Awe iyo! Ilyo kateeka aletitikisha abantu, ukubacusha, no kwipaya abo ateka, bushe tufwile ukupeela Lesa umulandu? Teti mube amano mu kucite fyo.—Lukala Milandu 8:9.

Lelo ni shani ulwa minshipendwa ya bantu ababa mu bupiina bwa nakalya nakalya nelyo ababa ne nsala? Bushe ni Lesa e walenga? Awe te Lesa. Isonde lilafumya ifya kulya ifingi ifingakumana bonse. (Amalumbo 10:2, 3; 145:16) Mulandu wa kukana-akanya bwino ifya kulya ifingi ifyo Lesa apeela, e cilenga insala no bupiina ubu bwa-anana. Kabili ubu bwafya  bwalifilwa ukupwa pa mulandu wa kaso ka bantu.

Icikalamba Icalenga

Nomba ninshi nani alenga ukulwala nelyo ukufwa pa mulandu wa bukote? Napamo kuti mwapapa nga mwaumfwo kuti ne fi fine fintu te Lesa alenga ukuti filecitika. Lesa tabumbile umuntu ukuti alekota no kufwa.

Ilyo abantunse ba kubalilapo babili, Adamu na Efa, babikilwe mwi bala lya Edene, Yehova afwaile bene ukwikala ubumi bwa muyayaya pe sonde lya paradaise. Lelo alefwaya isonde ukwikalwamo na bantu abali no kutasha pa bumi bapeelwe. E co, pa kuti Adamu na Efa batwalilile ukwikala muli Paradaise, balekabila ukuba ne cumfwila kuli Yehova, Kalenga wabo uwa kutemwa.—Ukutendeka 2:17; 3:2, 3, 17-23.

Ku ca bulanda, Adamu na Efa balipondweke. Efa asalilepo ukuumfwila Satana Kaseebanya. Alimubepele kabili mu kucite ci Satana alandile ati Lesa aletana Efa icintu cimo icisuma. E co asalilepo ukulaitungulula kabili afwaile ‘ukuba nga Lesa, uwaishibo busuma no bubi.’ Adamu na o alipondweke ngo mukashi wakwe.—Ukutendeka 3:5, 6.

Ilyo Adamu na Efa babembwike pa kucite ci, balangishe fye apabuuta ukuti tabalingile ukwikala umuyayaya. Baliculile ku fyafumine mu lubembu. Amaka no bukose bwabo fyalipwile, na mu kulekelesha balifwile. (Ukutendeka 5:5) Nangula ni fyo, ukupondoka kwabo kwafuminemo ifintu ifingi ifyabipisha. Tucili tulecula ku fyafuma mu lubembu lwa kwa Adamu na Efa. Umutumwa Paulo alembele ati: “Ulubembu lwaingilile mu muntu umo [Adamu] pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.” (Abena Roma 5:12) Pa mulandu wa kupondoka kwa kwa Adamu na Efa, ulubembu ne mfwa fyasalanganine ku bantunse bonse kwati bulwele bwabipisha.

Ubushininkisho Bwine Bwine Ubwa Kuti Lesa Alatusakamana

Bushe ninshi ici calola mu kuti abantunse abo Lesa abumba balyonaikilila fye? Awe iyo, kabili ico cituleta ku bushininkisho bwine  bwine ubwa kuti Lesa alatusakamana. Pa kuipusula umwine apakalamba, Lesa ateyenye inshila ya kupusushishamo abantunse ukufuma ku lubembu ne mfwa. Umutengo wa cilubula wali bumi bwapwililika ubwa kwa Yesu, ubo apeele mu kuitemenwa pa mulandu wa ifwe. (Abena Roma 3:24) E co umutumwa Yohane alembele ati: “Pantu Lesa atemenwe aba pano calo ukutemwa kwa kuti apeele Umwana wakwe uwafyalwa eka, ukuti onse uumutetekela eonaika lelo abe no bumi bwa muyayaya.” (Yohane 3:16) Pa mulandu wa uku kutemwa kwakulisha, twalikwata na kabili isubilo lya kwikala umuyayaya. Paulo alembeele abena Roma ati: “Ku bulungami bumo abantu ba misango yonse bakalungamikilwa ku bumi.”—Abena Roma 5:18.

Kuti twashininkisha ukuti pa nshita ya kwa Lesa iyalingwa, takwakabe na kabili ukucula nangu ni mfwa pe Sonde. Lelo, imikalile yamwenwe kabela mwi buuku lya Ukusokolola e ikaba pe sonde. Baibolo itila: “Moneni! Ihema lya kwa Lesa lili pamo na bantunse, kabili akekala pamo na bo, kabili bakaba abantu bakwe. Na Lesa umwine akaba pamo na bo. Kabili akafuuta ifilamba fyonse ku menso yabo, ne mfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo. Ifya ntanshi nafiya.” (Ukusokolola 21:3, 4) Limbi kuti mwatila, ‘Ilyo ifi fintu fikalacitika, ine ninshi nalifwa.’ Lelo, icishinka ca kutila kuti mwaisasangwako. Kabili nangu mwafwa, Lesa kuti amubuusha ku bafwa. (Yohane 5:28, 29) Ubo e bufwayo bwa kwa Lesa kuli ifwe, kabili e bukacitika. Bufi ubwafiita fititi ukulanda ukuti Lesa tatusakamana!

“Palameni Kuli Lesa”

Ca kusansamusha ukwishiba ukuti Lesa alitendekako kale ukuteyanya inshila ya kupwishishamo amafya ya bantunse umupwilapo. Lelo, ni shani pali ino nshita? Kuti twacita shani nga ca kuti uo twatemwa afwa nangu umwana wesu alwala? Kwena, te ino nshita iya kuti Lesa afumyepo ukulwala ne mfwa. Baibolo ilangilila ukuti tufwile ukulolela ukufikila lintu Lesa akacite fyo. Lelo Lesa taatusha fye. Umusambi Yakobo atile: “Palameni kuli Lesa, na o akapalama kuli imwe.” (Yakobo 4:8) Ca cine, Kalenga wesu alatulaalika ukuti tube na bucibusa bwa pa mutima na wene, kabili abacite fyo balamona lyonse ukuti alabatungilila na lintu bali mu mafya yabipisha.

Tupalama shani kuli Lesa? Imfumu Davidi yaipwishe ilipusho lyapalako mupepi ne myaka 3,000 iyapitapo ati: “Mwe Yehova, . . . nani engekala mu lupili lwenu lwa mushilo?” (Amalumbo 15:1) Davidi ayaswike ilipusho lyakwe ilyo akonkenyepo ukusoso kuti: “Uwendo wa mpomfu, uucito bulungami, uusose cine mu mutima wakwe; uo pa lulimi lwakwe tapali ukukwakwanya, tacita bubi ku munankwe.” (Amalumbo 15:2, 3) Ukulanda fye cishinka, Yehova apokelela abacita ifyo afwaya filya Adamu na Efa bakeene. Apalama ku bacita ukufwaya kwakwe.—Amalango 6:24, 25; 1 Yohane 5:3.

Bushe kuti twacita shani ukufwaya kwa kwa Lesa? Tulingile ukusambilila “icisuma kabili icapokelelwa mu menso ya kwa Lesa, Umupusushi wesu,” no kucita ifyo fine twasambilila. (1 Timote 2:3) Cisanshamo ukwishiba bwino bwino Icebo ca kwa Lesa, Baibolo. (Yohane 17:3; 2 Timote 3:16, 17) Te kubelenga fye Baibolo epela. Tufwile ukupashanya abaYuda ba ku Berea aba mu mwanda wa myaka uwa kubalilapo abaumfwile ilyo Paulo abashimikile. Tubelenga ulwa bene ukuti: “Bena bapokelele icebo ne mitima yaswatuka, balebebeta Amalembo cila bushiku beshibe ifi fintu nga e fyo fyali.”—Imilimo 17:11.

Nangu fye ni ndakai, ukupooseshako amano ku kusambilila Baibolo kulakosha icitetekelo cesu muli Lesa kabili kulatwafwa ukuba na bucibusa bwine bwine na wene. (AbaHebere 11:6) Na kabili kulatwafwa ukuumfwikisha ifyo Yehova abomba na bantunse—te mu kuti bamwenemo fye pa kashita akanono lelo mu kuti bonse abalemenena ku bumi bwa muyayaya bakamwenemo ku ciyayaya.

Moneni fintu Abena Kristu bamo ababa na bucibusa bwa pa mutima na Lesa balanda. Danielle, uuli ne myaka 16 atila: “Yehova nalimutemwa icine cine, kabili fingi mfwile ukumutashishapo.  Alimpeela abafyashi ababa no kutemwa, abatemwa Yehova icine cine kabili balinsambilisha ukwikala umwabela Icebo cakwe.” Umwina Kristu umo mu Uruguay alemba ati: “Umutima wandi waliisulamo kutasha, kabili ndatasha Yehova pa cikuuku cakwe ica bupe fye no kuba cibusa wandi.” Yehova alitemwa na bana abanono. Gabriela uuli ne myaka 7 atila: “Nalitemwa Lesa ukucila icili conse icaba pano isonde ponse! Nalikwata Baibolo yandi. Nalitemwa ukusambilila pali Lesa na pa Mwana wakwe.”

Pali leelo, mwi sonde lyonse, imintapendwa balasuminishanya no mutima onse na kemba wa malumbo uwatile: “Ukupalama kuli Lesa e cawama kuli ine.” (Amalumbo 73:28) Balyafwiwa ukucimfya amafya ayo bakwata ndakai, kabili baliba ne subilo lyashininkishiwa ilya kwikala umuyayaya muli Paradaise pe sonde. (1 Timote 4:8) Kanshi, pampamineni pa ‘kupalama kuli Lesa.’ Cine cine, ifi twaebwa ukuti: “Taba kutali kuli ifwe umo umo” fya cine sana. (Imilimo 17:27) Cine fye, Lesa alamusakamana icine cine!

[Ifikope pe bula 5]

Ifyo Yehova atusakamana fimonekela mu nshila ishingi

[Icikope pe bula 7]

Nangu fye bana abanono kuti bapalama kuli Lesa

[Ifikope pe bula 7]

Pali leelo, Yehova alatwafwa ukushipikisha. Pa nshita yakwe iyalingwa, akafumyapo ukulwala ne mfwa