Amepusho Ukufuma ku Babelenga

Ni mwi Yesu aloseshe ilyo aebele abasambi bakwe ati: “Namwene Satana alepona nge nkuba mu muulu”?

Yesu e lintu fye asalile abasambi bakwe 70 no “kubatuma babili babili ukumutangilila mu misumba yonse na mu ncende shonse umo ali no kuya umwine.” Ilyo aba 70 babwelele, balesekelela pa fyo umulimo wabombelwe bwino. Batile: “Mwe Shikulu, ne fibanda na fyo filetunakila pa kulumbula ishina lyenu.” E lyo Yesu atile: “Namwene Satana alepona nge nkuba mu muulu.”—Luka 10:1, 17, 18.

Pa kubalilapo, kuti camoneka kwati Yesu alelanda pa cintu icacitika kale. Lelo, pa numa ya myaka 60 ukutula apo Yesu alandile aya mashiwi, umutumwa Yohane umukoloci abomfeshe amashiwi yapalako ilyo alembele ati: “Icing’wena cikalamba capooselwe pa nshi, icisoka ca pa kutendeka, iciitwa Kaseebanya kabili Satana, icilufya aba pano isonde bonse; capooselwe pe sonde, na bamalaika ba ciko bapooselwe pamo na co.”—Ukusokolola 12:9.

Ilyo Yohane alembele aya mashiwi, Satana aleikala mu muulu. Twaishiba shani? Pantu mwi buuku lya Ukusokolola mwaba ukusesema, te lyashi lya kale iyo. (Ukusokolola 1:1) E ico, ilyo Yohane alelemba ibuuku lya Ukusokolola, Satana ninshi talapooswa pe sonde. Na kuba, ifishinka filanga ukuti ici cacitike pa numa fye Yesu abikilwe pa cipuna ca Bufumu bwa kwa Lesa mu 1914. *—Ukusokolola 12:1-10.

Nomba, cinshi Yesu alandile ulwa kutamfiwa kwa kwa Satana ukufuma mu muulu kwati nalimo kwalicitika kale? Abasoma bamo batila Yesu alekalipila abasambi bakwe pantu baleitakisha. Basumino kuti, Yesu afwile alesosa ati: ‘Namucimfya ifibanda, nomba mwilaitakisha pantu icilumba e calengele ukuti Satana apooswe pe sonde.’

Teti tushininkishe pali ici. Lelo, cilemoneka ukuti Yesu alesekelela pamo na basambi bakwe kabili alelanda pa konaulwa kwa kwa Satana ukwa ku ntanshi. Yesu e waishibe bwino ulupato lwabipisha ulwa kwa Kaseebanya ukucila abasambi bakwe bonse. Elenganyeni fintu Yesu asansamwike ilyo bamwebele ukuti ifibanda fya maka fyalenakila abasambi bakwe abashapwililika! Ukunakila kwa fibanda kwalelanga fye ifyo cali no kuba ku ntanshi ilyo Yesu, e kutila Mikaele malaika mukalamba, aali no kulwa na Satana no kumupoosa pe sonde.

Ilyo Yesu atile “namwene Satana alepona,” alekomaila pa kuwa kwa kwa Satana. Ici calipalana no kusesema kumo kumo ukwa mu Baibolo ukulanda pa cali no kucitika ku ntanshi kwati nalimo calicitika kale. Ku kulangilila, moneni ifyo ukusesema kulanda pali Mesia kwalembwa pali Esaya 52:13–53:12. Kwalembwa kwati kwalicitika kale kabili kwati kukacitika ku ntanshi. Yesu afwile alelanga ukuti, ukulingana no kufwaya kwa kwa Wishi, Satana ali no kutamfiwa ukufuma mu muulu. Na kabili, Yesu alishininkishe ukuti pa nshita ya kwa Lesa iyalingwa, Satana ne fibanda fyakwe bakapooswa mu muyenge kabili pa numa bakonaulwa umupwilapo.—Abena Roma 16:20; AbaHebere 2:14; Ukusokolola 20:1-3, 7-10.

[Futunoti]