Ubufumu bwa kwa Lesa—Buleteeka Pali Leelo

Inyunshipepala ya ku Australia iya The Age, yatile: “Bushe ifyalo ifyafulo musango yu ifyakwata intambi shalekanalekana kabili no buyantanshi bwapusanapusana kuti fyaumfwana? Bashimika ukuti icikekatanya fye abantunse kusansa ukufuma kuli planeti imbi.”

UKUSANSA ukukafuma kuli planeti imbi? Kwena tatwaishiba nga ca kuti ico kuti calenga ifyalo fyonse ukwikatana nelyo iyo, lelo ukusesema kwa mu Baibolo kwena kulanda pa kayofi kapalamishe akakalenga ifyalo fya mwi sonde lyonse ukwikatana pamo. Kabili aka kayofi kakafuma ku fibumbwa fya maka ifyaba ku nse ye sonde.

Davidi Imfumu ya Israele wa pa kale asesemene libela pa filecitika mwi sonde. Pa kupuutwamo na Lesa alembele ukuti: “Imfumu sha pano isonde shaibikako, na bakankaala batekela akabungwe pali Yehova na pa wasubwa wakwe, abati, Tuputaule ififungilo fyabo, tupoose tufumye pali ifwe ne myando yabo.” (Amalumbo 2:2, 3; Imilimo 4:25, 26) Moneni ukuti ishamfumu sha mwi sonde shali no kubungana capamo ku kulwa na Yehova, Kalenga wa myulu, e lyo no wasubwa wakwe kabili Imfumu yasontwa, Yesu Kristu. Bushe ica musango yo kuti cacitika shani?

Ukulingana no kupende nshita ukwa mu Baibolo no kusesema kwafikilishiwa, Ubufumu bwa kwa Lesa bwatampile ukuteeka mu myulu mu 1914 na Yesu Kristu e Mfumu. * Pali iyo nshita  ifyalo fya pano isonde fyakwete fye amatontonkanyo yamo yene. Ukucila ukuinashisha kuli bumulopwe bwa Bufumu bwa kwa Lesa ubwapangilwe, ifyalo fyaipoosele mu kulwila amaka ya kuteeka mu Nkondo Ikalamba, nangula Inkondo ya Calo iya Kubalilapo.

Bushe Yehova Lesa omfwa shani pa fyo bakateeka bacita? “Uwaikala mu muulu aseka, Shikulu abapumya. E lyo asosa kuli bene mu bukali bwakwe, kabili mu cifukushi cakwe abasakamika.” E lyo Yehova akeba Umwana wakwe, Imfumu yasubwa iya Bufumu bwakwe ati: “Lomba, na ine ndekupeele nko e cikwatwa cobe, ne mpela sha pano isonde e camaninwa cobe; ukabafuna ku nkonto ya cela, ukabatobaula nge nongo ya mubumfi.”—Amalumbo 2:4, 5, 8, 9.

Uku kutobaule nko ukwa kulekelesha, ukubomfya inkonto ya cela kukacitika pa Armagedone. Ibuuku lya kulekelesha ilya mu Baibolo ilya Ukusokolola lilondolola ici ilyo cikafika pa kalume ati ikaba ni “nkondo ya bushiku bukalamba bwa kwa Lesa Uwa maka yonse.” (Ukusokolola 16:14, 16) Pa mulandu wa kusongwa ne fibanda, ifyalo fya pano isonde mu kulekelesha fikekatana pa kuba no kufwayo kucitapo cimo—e kutila ukulwa na Lesa Wa maka yonse.

Iyo nshita ilyo abantunse bakalongana capamo ku kulwisha bumulopwe bwa kwa Lesa ilepalama lubilo lubilo. Ku ca bulanda mu “kwikatana” kwabo tapali ico bakasangamo. Lelo ico cikaba e kutendeka kwa mutende untu abantunse bonse balolela pa nshita ntali. Mu nshila nshi? Muli iyi nkondo ya kulekelesha e mo Ubufumu bwa kwa Lesa “bukashonaula no kupesha aya mabufumu yonse [aya pano calo], kabili bukeminina umuyayaya.” (Daniele 2:44) Ubufumu bwa kwa Lesa, e buteeko bukaleta umutende wa mwi sonde lyonse untu abantunse bafwaisha, te kupitila mu kabungwe ka bantunse akali konse iyo.

Cilolo Mukalamba uwa Bufumu bwa kwa Lesa

Ubufumu bwa kwa Lesa e bo abantunse abengi abafumaluka bapepela ilyo batila: “Ubufumu bwenu bwise. Ukufwaya kwenu kucitwe pano isonde nga mu muulu.” (Mateo 6:10) Ubufumu bwa kwa Lesa te bwa kwelenganya fye mu mutima iyo, lelo bwa cine cine kabili bwalibomba imilimo iisuma iingi ukutula fye pantu bwatendekele ukuteeka mu muulu mu 1914. Natulande pa fishinka fimo fimo ifilanga ukuti Ubufumu bwa kwa Lesa bwa cine cine kabili buleteeka pali leelo.

Ica kubalilapo fye bwalikwata iciputulwa cimo ica maka icitungulule fintu, kabili intungulushi ni Mfumu iileteeka, Yesu Kristu. Mu 33 C.E., Yehova Lesa alengele Yesu Kristu ukubo Mutwe wa cilonganino. (Abena Efese 1:22) Ukutule lyo Yesu alitwalilila ukulangisha bumutwe bwakwe na muli fyo ukulanga ukuti alilinga ukube ntungulushi. Ku ca kumwenako, ilyo kwali icipowe cikalamba mu Yudea mu mwanda wa myaka uwa kubalilapo, icilonganino ca Bwina Kristu calibombele mu kwangufyanya ukwafwilisha aba mu cilonganino. Umulimo wa kukumbusuka walipekanishiwe mu Antioke kabili bwangu bwangu batumine Barnaba na Sauli ku kuyabomba uyo mulimo wa kukumbusuka.—Imilimo 11:27-30.

Apo nomba Ubufumu bwa kwa Lesa buleteeka, kuti twaenekela ifingi ukufuma kuli Yesu Kristu. Ilyo amasanso pamo nga ifinkukuma, ifipowe, ukubunda, ifikuuku, bamulamba, nelyo ukupuuka kwa mpili—yatuponena, icilonganino ca Bena Kristu ica Nte sha kwa Yehova cilabombelapo bwangu bwangu ukwafwilisha abasumina banabo na bambi abali mu ncende sha  mafya. Ku ca kumwenako, ilyo icinkukuma cikalamba capumine icalo ca El Salvador mu January na mu February mu mwaka wa 2001, kwali ukupekanya umulimo wa kwafwilisha abali mu bwafya mu ncende shonse isha calo, kabili amabumba ya Nte sha kwa Yehova ukufuma ku Canada, Guatemala, e lyo na ku calo ca United States yalile mu kwafwilisha. Mu nshita fye iinono amayanda ya kupepelamo yatatu, pamo pene na mayanda ya kwikalamo ukucila pali 500 yalikuulilwe.

Abateekwa ba Bufumu bwa kwa Lesa

Ukutula fye mu 1914 ilyo Ubufumu bwa kwa Lesa ubwa mu myulu bwapangilwe, bwalitendeka ukulonganika no kuteyanya abateekwa ba buko ukufuma mu bantu ba mwi sonde lyonse. Ici caba kufikilishiwa kwa kusesema ukwalembwa muli Esaya ukutila: “Nomba mu nshiku ishikakonkapo, e mo lukalimbo lupili lwa ng’anda ya kwa Yehova [ukupepa kwakwe ukwa cine] pa muulu wa mpili, . . . Shikakonkomokelako inko shonse.” Ukusesema kulangilila ukuti “abantu na bantu abengi” bakaya kuli lulya lupili lwa kwa Yehova ku kusambilila imibele pamo na mafunde yakwe.—Esaya 2:2, 3.

Ica kufumamo cisuma muno nshiku caba libumba likalamba ilya bantu baikatana—aba bwananyina Abena Kristu aba mwi sonde lyonse abacila pali 6,000,000 mu fyalo ukucila pali 230 mwi sonde. Pa kulongana kwa pa kati ka nko ukwa Nte sha kwa Yehova abantu ilingi line balapapa ukumona ukutemwana, umutende, no kwikatana ifiba pa bantu abengi, abashakwata impatila ya mushobo, intambi, nelyo ululimi. (Imilimo 10:34, 35) Bushe tamulesumina ukuti, pa kuti ubuteeko bwikatanye abantu ba mishobo yalekanalekana mu mutende na mu kuumfwana, bufwile ukuba ubwakosa, ubwashansha—kabili ubwa cine cine?

Ubufumu bwa kwa Lesa na Masambililo

Ubuteeko ubuli bonse bwalikwata ifipimo ifyo abateekwa ba buko bafwile ukukonka, kabili onse uulefwaya ukutungululwa na bulya bufumu afwile ukukonka ifyo fipimo. E fyo caba na ku Bufumu bwa kwa Lesa, na bo bwalikwata ifipimo ifyo bonse abafwaya ukuba abateekwa ba buko bafwile ukukonka. Lelo pa kuti abantu abengi kabili abakwata ifikulilo fyapusanapusana balesumina no kulaumfwila amafunde yamo yene, mulimo uwakosa icine cine. Kanshi uyu waba e mulandu na umbi uulangilila ukuti Ubufumu bwa kwa Lesa bwa cine cine, e kutila imisambilishishe isuma iifika umuntu pa mutima no kwalula amatontonkanyo yakwe.

Lelo bushe ubu Bufumu bubomba shani uyu mulimo wakosa? Bubomba nge fyacitile abatumwa, ukushimikila “ku ng’anda ne ng’anda” no kusambilisha umuntu umo na umo Icebo ca kwa Lesa. (Imilimo 5:42; 20:20) Bushe iyi misambilishishe ilabomba bwino? Jacques Johnson, shimapepo wa baKatolika alembele amashiwi yamo mu nyunshipepala ya ku Canada pa fyo alelwisha ukulesha umwanakashi umo ukusambilila ne Nte sha kwa Yehova. Atile: “ Nalifuupwilwe kabili naishileishibo kuti nalelwa ulubuli ulo nshingacimfya. Naishilemona no kuti ilyo  papitile imyeshi imo, aba banakashi Inte sha kwa Yehova baishileba bacibusa basuma aba kwa namayo uyu uwali uwatalalilwa sana. Baikatene nankwe ilyo balemwafwilisha, no kulaumfwana sana nankwe, kabili uku kwali kwikatana kwa cine cine ukwa kufuma pa nshi ya mutima. Bwangu bwangu asangwike kapepa munabo uwakosa kabili nalifililwe ukucitapo conse ico ningacita ku kulesha ica musango yo ukucitika.” Nga fintu fye ubukombe bwa mu Baibolo ubo Inte sha kwa Yehova shisambilisha, pamo ne mibele yabo iya Bwina Kristu fyafikile pa mutima wa kwa namayo wali kale Katolika, e fyo bwafika na pa mitima ya mamilioni ya bantu mwi sonde lyonse pali leelo.

Uyu musango wa kusambilisha—Amasambililo ya Bufumu—washimpwa pali Baibolo, kabili usumbula ifipimo fya iko na mafunde pa lwa mibele isuma. Usambilisha abantu ukutemwana no kucindikana te mulandu no kupusana inkulilo. (Yohane 13:34, 35) Kabili ulafwilisha abantu ukuumfwila ukusoka kwa kuti: “Mwipalana no bwikashi buno, lelo musangulwe pa kwalula amatontonkanyo yenu, ukuti mushininkishe mwe bene icabo kufwaya kwa kwa Lesa icisuma kabili icapokelelwa kabili icapwililika.” (Abena Roma 12:2) Amamilioni ya bantu balisanga umutende ne nsansa pali nomba kabili balaba ne subilo lya nshita iisuma iya ku ntanshi pa kuleka imibele yabo iya kale kabili mu nsansa ukuumfwila amafunde ne fishinte fya Bufumu bwa kwa Lesa.—Abena Kolose 3:9-11.

Icafwilisha sana muli uku kwikatana kwa mwi sonde lyonse ni magazini wine uyu uwa Ulupungu lwa kwa Kalinda. Ukubomfya inshila shisuma isha kupilibwilamo e lyo ne fisolobelo fya kusabankanishishamo mu ndimi shalekanalekana, kwalenga ifipande fikalamba ifya Ulupungu lwa kwa Kalinda ukulasabankanishiwa lubili cila mweshi mu ndimi 135, kabili ukucila pa mapesenti 95 aya bantu abalubelenga mwi sonde lyonse balasambilila ifi fyebo pa nshita imo ine fye mu lulimi lwabo.

Kalemba wa mwi calici lya Mormon alembele umutande wa fya mapepo ifyatunguluka bwino sana ifishaba mwi calici lyakwe. Pa mutande abikilepo Ulupungu lwa kwa Kalinda na Loleni!, ifisabankanishiwa ne Nte sha kwa Yehova, ukuti e bamagazini babilisha sana ilandwe kabili alandilepo no kuti: “Tapali uwingabepa ukuti Ulupungu lwa kwa Kalinda na Loleni! filenga abantu ukucibondola—lelo, filenga abantu ukuba abalola, icintu ico nshatalamona mu mpapulo shimbi isha fya mapepo. Ulupungu lwa kwa Kalinda na Loleni! filapembesula pantu mwaba ifishinka, ifyasapikwa bwino ifya mano kabili filanda pa fintu fya cine ificitika mwi sonde.”

Kwaba ubushininkisho ubwingi ubulanga ukuti Ubufumu bwa kwa Lesa cine cine buleteeka. Inte sha kwa Yehova mu nsansa kabili mu kupambana balashimikila “imbila nsuma iyi ya bufumu” ku bena mupalamano babo ukubakoselesha ukuti na bo babe abateekwa ba Bufumu. (Mateo 24:14) Bushe na imwe e fyo mufwaisha? Kuti mwakwata amapaalo aya kwikatana na bantu abasambilishiwa kabili abafwaisha ukukonka amafunde ya ubu Bufumu. Icacilapo kuwama ca kuti, kuti mwakwata ishuko lya kuba abateekwa ba Bufumu mu calo cipya icalaiwa “umukekala ubulungami.”—2 Petro 3:13.

[Futunoti]

[Icikope pe bula 4, 5]

Mu 1914 ifyalo fyaipoosele mu nkondo ya calo conse

[Ifikope pe bula 6]

Umulimo wa kwafwilisha abalecula bushininkisho ubulanga ifyo ukutemwa kwa Bena Kristu kubomba

[Icikope pe bula 7]

Inte sha kwa Yehova balanonkelamo mu kusambilishiwa fimo fine isonde fye lyonse