Yehova Asokolwela Ubukata Bwakwe Ku Baiceefya

“Icilambu ca kuiceefya no kutiina Yehova fyuma no bukata no bumi.”—Amapinda 22:4, Nw.

1, 2. (a) Bushe ibuuku lya Imilimo lilanga shani ukuti Stefani ali “umwaume uwaisulamo icitetekelo no mupashi wa mushilo”? (b) Bushininkisho nshi bulanga ukuti Stefani ali uwaiceefya?

TEFANI ali “umwaume uwaisulamo icitetekelo no mupashi wa mushilo.” Kabili ‘aiswilemo no kusenamina na maka.’ Apo ali pa basambi ba kubalilapo aba kwa Yesu, Stefani alecita ifipesha mano fikalamba ne fishibilo mu bantu. Bushiku bumo, kwaimine abantu bamo abaile ku kukansana na wena, “lelo tabali na maka ya kwansha amano no mupashi alelandilamo.” (Imilimo 6:5, 8-10) Ukwabula no kutwishika, Stefani alipooseleko amano mu kusambilila Icebo ca kwa Lesa, kabili alecingilila cena kuli bashimapepo ba ciYuda aba mu nshiku shakwe. Ifyebo asosele, ifyaba mu Imilimo icipandwa 7, filanga ukuti alipoosele sana amano ku kufwaya kwa kwa Lesa ukwalesokololwa.

² Stefani taali nga bashimapepo abaleimona abacindama pa bantu yawe yawe pa mulandu wa kwishiba ne fifulo bakwete, ena ali uwaiceefya. (Mateo 23:2-7; Yohane 7:49) Nangu aishibe bwino Amalembo, alitemenwe ukubomba umulimo apeelwe uwa “kulayakanya ica kulya pa matebulo” pa kuti abatumwa baipeeleshe “ku kupepa na kuli bukapyunga bwa cebo.” Stefani aleshimikwa bwino ku ba bwananyina, kabili e calengele bamusale ukuba pa baume balingwa 7 abali no kulayakanya ica kulya cila bushiku. Apo ali uwaiceefya, alisumine ukulabomba uyu mulimo.—Imilimo 6:1-6.

3. Bushe Lesa alangile shani icikuuku ca bupe fye kuli Stefani mu nshila yaibela?

³ Yehova alimwene ukuiceefya, bumupashi, na bucishinka bwa kwa Stefani. Ilyo Stefani aleshimikila kwi bumba lyakalifiwa ilya bashimapepo abaYuda mu cilye ca Sanhedrini, abalwani bakwe “bamwene [ukuti] icinso cakwe cali kwati cinso ca kwa malaika.” (Imilimo 6:15) Icinso cakwe cali ca nkombe ya kwa Lesa, ica mutende uwafumine kuli Lesa wa bukata, Yehova. Pa numa ya kushimikisha ku ba mu cilye ca Sanhedrini, Stefani alangilwe icikuuku ca bupe fye ica kwa Lesa mu nshila yaibela. “Ilyo aiswilemo umupashi wa mushilo, atontele amenso mu muulu no kumona ubukata bwa kwa Lesa no bwa kwa Yesu naiminina ku kwa kulyo kwa kwa Lesa.” (Imilimo 7:55) Ici cimonwa, cakoseshe ifyo Stefani asumine ukuti Yesu Mwana wa kwa Lesa kabili ni Mesia. Calengele Stefani waiceefya ukushipa no kwishiba ukuti alisenaminwe na Yehova.

4. Ni kuli bani Yehova asokolwela ubukata bwakwe?

⁴ Icimonwa Stefani amwene cilanga ukuti Yehova alasokolola ubukata no kufwaya kwakwe ku bantu baiceefya abatiina Lesa kabili abacindamika bucibusa bwabo na wena. Baibolo itila: “Icilambu ca kuiceefya no kutiina Yehova fyuma no bukata no bumi.” (Amapinda 22:4) E ico, kanshi, nacicindama ukuti twishibe ukuiceefya kwine kwine, ifyo twingalundulula iyi mibele yacindama, ne fyo twinganonkelamo nga twaiceefya mu mikalile yesu yonse.

Ukuiceefya Mibele ya kwa Lesa

5, 6. (a) Ukuiceefya cinshi? (b) Bushe Yehova alanga shani ukuiceefya? (c) Ukuiceefya kwa kwa Yehova kulingile ukutukuma shani?

⁵ Bamo kuti bapapa ukuumfwa ati Yehova Lesa, uwapulishamo kabili uwacilishapo ubukata,  aba ica kumwenako cikalamba ica kuiceefya. Imfumu Davidi yasosele kuli Yehova ati: “Mwampeele nkwela ya kupususha kwenu; kabili ukuboko kwenu kwa kulyo kulantungilila, no [kuiceefya, NW] kwenu kulankusha.” (Amalumbo 18:35) Ilyo Davidi alandile pa kuiceefya kwa kwa Yehova, abomfeshe ishiwi lya mu ciHebere ilipilibula “ukukontama.” Amashiwi yambi aya ciHebere ayapala kwi shiwi lyapilibulwa “ukuiceefya,” mashiwi pamo nga “ubupete,” “ubufuuke,” no “kwinama.” E ico Yehova ali-iceefeshe ilyo aineme pa kuti alebishanya na Davidi umuntu ushapwililika na pa kumucite mfumu ya kumwimininako. Nge fyo utumashiwi twa pa muulu pe Lumbo 18 tulondolola, Yehova alicingilile no kutungilila Davidi, ukumupokolola “mu minwe ya balwani bakwe bonse, na mu kuboko kwa kwa Shauli.” Kanshi, Davidi alishibe ukuti amaka nelyo ubukata ali no kukwata ilyo ali pa bufumu fyali no kufuma kuli Yehova pantu mu kuiceefya Yehova alemwafwa. Ukwishiba ici kwalengele Davidi ukutwalilila ukuba uwaiceefya.

⁶ Nga ifwe, kuti twacita shani ifyo? Yehova alisalapo ukutusambilisha icine, kabili nalimo alitupeela na mashuko yaibela aya kubomba imilimo mu kuteyanya kwakwe, nelyo nalimo aletubomfya mu nshila shimo mu kupwishishisha ubufwayo bwakwe. Bushe tufwile ukuyumfwa shani pali ifi fyonse? Tufwile ukuiceefya. Na kabili tufwile ukutasha sana Yehova pa fyo aiceefya no kukanaba ne cilumba, pantu icilumba kuti catutwala ku boni.—Amapinda 16:18; 29:23.

7, 8. (a) Bushe Yehova alangile shani ukuiceefya kuli Manase? (b) Bushe Yehova na Manase baba shani ifya kumwenako fya kuiceefya ifyo tufwile ukukonka?

⁷ Yehova talanga fye ukuiceefya ukukalamba pa kulabishanya na bantu ababembu. Lelo, alalanga ukuiceefya na pa kuitemenwa ukubela abalanda inkumbu, no kwimya, nelyo ukusumbula abaiceefya. (Amalumbo 113:4-7) Taleni tontonkanyeni ifyacitikile Manase Imfumu ya Yuda. Abomfeshe bubi bubi icifulo cakwe ica bufumu pa kutungilila ukupepa kwa bufi kabili “alecito bubi ubwingi mu menso ya kwa Yehova, ku kumufiisha ku mutima.” (2 Imilandu 33:6) Mu kulekelesha, Yehova akandile Manase ilyo asuminishe imfumu ya bena Ashuri ukumufumya pa bufumu. Ilyo ali mu cifungo, Manase “asengwile ku cinso ca kwa Yehova Lesa wakwe, no kunakilila apakalamba,” e co Yehova amubweseshe pa bufumu mu Yerusalemu, kabili Manase “aishibe ukuti Yehova e Lesa.” (2 Imilandu 33:11-13) Ca cine, mu kulekelesha ukuiceefya kwa kwa Manase kwatemwine Yehova, kabili Yehova  na o ali-icefeshe ilyo alekelele Manase no kumubwesesha pa bufumu.

⁸ Filya Yehova aitemenwe ukulekelela na filya Manase alapiile filatusambilisha amasambililo yacindama. Tufwile ukulaibukisha lyonse ukuti ifyo tucita ku batukalifya ne fyo tuyumfwa nga twabembuka filakuma ifyo Yehova acita kuli ifwe. Nga twaitemenwa ukulekelela bambi amampuulu no kusumina ifilubo fyesu mu kuiceefya, lyena Yehova akatubelele nkumbu.—Mateo 5:23, 24; 6:12.

Ubukata bwa kwa Lesa Bwasokolwelwa ku Baiceefya

9. Bushe ukuiceefya bunake? Londololeni.

⁹ Lelo tatufwile ukumona ukuiceefya, ubufuuke, no kupetama ngo bunake nelyo nge nshila ya kutekeleseshamo ifilubo. Nge fyo Amalembo ya Mushilo yalanga, Yehova ali-icefya, lelo alakalipa ukukalipa kwalungama kabili alalanga na maka yakwe nga cakabilwa. Pa mulandu wa kuiceefya, Yehova alalangulukila sana, nelyo ukupoosa amano ku bapetama, kabili pa nshita imo ine alaitalusha ku ba cilumba. (Amalumbo 138:6) Bushe Yehova alangulukila shani ababomfi bakwe abaiceefya?

10. Nge fyo 1 Abena Korinti 2:6-10 ilanga, cinshi ico Yehova asokolwela abaiceefya?

¹⁰ Mu nshita yalinga, Yehova alisokolwela abaiceefya ifyashika pa fyo akapwishishisha ukufwaya kwakwe. Acita ifi ukupitila mu nshila ya kumfwaninamo iyo umwine asala. Ifi fyashika tafyasokololwa ku ba cilumba abashintilila, nelyo ukukonka amano ya bantunse. (1 Abena Korinti 2:6-10) Lelo, apo abaiceefya balisokolwelwa ukufwaya kwa kwa Yehova ukwa cine cine, balacincishiwa ukucindika Yehova pantu balacindamika sana ubukata bwakwe.

11. Imyaka 2,000 iyapitapo, bamo bafililwe shani ukuiceefya, kabili ici cababipile shani?

¹¹ Imyaka 2,000 iyapitapo, abengi, ukusanshako na baleitunga ukuba Abena Kristu, balifililwe ukuiceefya kabili bali-ipunwine ilyo umutumwa Paulo abasokolwelele ukufwaya kwa kwa Lesa. Icalengele Paulo ukuba “umutumwa wa bena fyalo” te mulandu wa calo afyalilweko, te masomo, te mushinku, kabili te milimo isuma abombele pa nshita ntali. (Abena Roma 11:13) Ilingi line, abantu ba bumubili bamona kwati icalo bafyalilweko, amasomo, umushinku, nelyo imilimo isuma babomba pa nshita ntali e fingalenga umo ukubomfiwa sana kuli Yehova. (1 Abena Korinti 1:26-29; 3:1; Abena Kolose 2:18) Lelo, Paulo asalilwe na Yehova, pa mulandu wa cikuuku ca bupe fye ica kwa Lesa no kufwaya kwakwe ukwalungama. (1 Abena Korinti 15:8-10) Balya Paulo aitile ati “abatumwa abacilamo,” ukusanshako na bambi bakakaanya, bakeene ukupokelela Paulo kabili bakeene no kusumine fyo alepelulushanya na bo mu Malembo. Ukufilwa ukuiceefya kwabalengele ukukanaishiba no kukanaumfwikisha inshila ishaiwamina iyo Yehova acitilamo ukufwaya kwakwe. Shi twilasuula nelyo ukulengulula abo Yehova asala ukupwishishisha ukufwaya kwakwe.—2 Abena Korinti 11:4-6.

12. Bushe icacitikile Mose cilanga shani ukuti Yehova asenamina abaiceefya?

¹² Na lyo line, mu Baibolo mwaba ifya kumwenako ifingi ifilanga ukuti abantu baiceefya balipeelwe ishuko lya kumonako ifimonwa fya bukata bwa kwa Lesa. Mose, ‘uwali uwafuukisha ukucilamo’ mu bantu bonse, amwene ubukata bwa kwa Lesa kabili ali cibusa wakwe uwa pa mutima. (Impendwa 12:3) Uyu mwaume waiceefya, uwabombele umulimo wa bukacema  pa myaka 40, alisenaminwe sana mu nshila ishingi kuli Kalenga. Mose nalimo abombele imyaka iingi iya bucemi bwakwe ukucema imikuni mu Arabia. (Ukufuma 6:12, 30) Pa kutungililwa na Yehova, Mose aishileba uwa kulandilamo kabili kateyanya mukalamba uwa luko lwa bena Israele. Ali-ipakishe ukulanshanya kwa pa kanwa nkati na Lesa. Mu cimonwa, Mose amwene “icipasho ca kwa Yehova.” (Impendwa 12:7, 8; Ukufuma 24:10, 11) Abapokelele uyu mubomfi kabili umwiminishi wa kwa Lesa uwaiceefya na bo balisenaminwe. Cimo cine na kuli ifwe, tukasenaminwa nga twapokelela kasesema uwacila pali Mose, Yesu, e lyo no kulamumfwila, ukusanshako no kuumfwila “umusha wa cishinka kabili uwashilimuka” uo asonta.—Mateo 24:45, 46; Imilimo 3:22.

13. Bushe Yehova asokolwele shani ubukata bwakwe kuli bakacema baiceefya imyaka 2,000 iyapitapo?

¹³ Ni bani ‘ubukata bwa kwa Yehova bwabalikile’ kabili abo malaika abilileko imbila nsuma ya kufyalwa kwa ‘Mupusushi, e kutila Kristu Shikulu’? Te kuli bashimapepo ba cilumba kabili te ku bantu bacindama abaishibikwe sana mu bwikashi, lelo bwabalikile kuli bakacema baiceefya “abaikele mu mpanga balelinda imikuni yabo ubushiku.” (Luka 2:8-11) Aba bantu tabalemonwa abacindama pa mulandu wa mulimo balebomba uwali uwasuulwa. Na lyo line, e bo Yehova abikileko amano kabili e bo abalilepo ukwishibisha ulwa kufyalwa kwa kwa Mesia. Ca cine, Yehova asokolola ubukata bwakwe ku baiceefya kabili abatiina Lesa.

14. Bushe Lesa apaala shani abaiceefya?

¹⁴ Bushe cinshi tusambilila kuli fi fintu? Fitusambilisha ukuti Yehova alasenamina abaiceefya kabili alabalenga ukwishiba no kumfwikisha ukufwaya kwakwe. Asala abantu abashacindama sana no kubabomfya mu kwishibisha ukufwaya kwakwe ukushaiwamina kuli bambi. Ili sambililo lifwile ukutucincisha ukushintilila pa butungulushi bufuma kuli Yehova, mu Cebo cakwe ica kusesema, na mu kuteyanya kwakwe. Twalishininkisha ukuti Yehova akatwalilila ukusokolwela ababomfi bakwe abaiceefya ukufwaya kwakwe ukushaiwamina. Kasesema Amose atile: “Shikulu Yehova tacita kantu, kano abala asokolwele ca nkama cakwe ku babomfi bakwe bakasesema.”—Amose 3:7.

Mulelundulula Ukuiceefya pa Kuti Lesa Alemusenamina

15. Cinshi tulingile ukutwalilila ukuba abaiceefya, kabili ici cilangililwe shani mu fyacitikile Imfumu ya kwa Israele Shauli?

¹⁵ Pa kuti Lesa aletusenamina, tufwile ukutwalilila ukuba abaiceefya. Umuntu nga aiceefya pa nshita imo tacilola mu kuti akatwalilila ukuiceefya. Umuntu kuti aleka ukuiceefya no kuba ne cilumba na matutumuko, ne citumbukamo kuituntumba na mafya. E fyacitile Shauli, uo basubile intanshi pa bufumu mu Israele. Ilyo fye asalilwe, aleimona ‘umunono mu menso yakwe.’ (1 Samwele 15:17) Lelo, lintu atekele fye imyaka ibili, atampile ukuituntumba. Tacindike ifyo Yehova atantike ukuti kasesema Samwele e wali no kulatuula amalambo, kabili atendeke no kuilungamika lintu atuulile ilambo. (1 Samwele 13:1, 8-14) Apa e po atendekele ukucita ifintu ifyalelanga ukuti tatwalilile ukuiceefya. Icatumbwikemo ca kuti Lesa alilekele ukumusenamina kabili afumishe no mupashi wa mushilo pali wena, ne ci calengele afwe imfwa iya museebanya. (1 Samwele 15:3-19, 26; 28:6; 31:4) Isambililo tulesambililako ni ili: Tufwile ukutwalilila ukuba abaiceefya kabili aba cumfwila no kukanaimona kwati twalicindama. Nga twacite fi tukataluka ku micitile ya kuituntumba iilenga Yehova ukuleka ukutusenamina.

16. Ukutontonkanya sana pali bucibusa bwesu na Yehova e lyo na bantu banensu kuti kwatwafwa shani ukulundulula ukuiceefya?

¹⁶ Nangu ca kuti ukuiceefya takwalumbulwa pa fisabo fya mupashi wa kwa Lesa, kwaba mibele ya bukapepa iyo tufwile ukulundulula. (Abena Galatia 5:22, 23; Abena Kolose 3:10, 12) Apo ukuiceefya kulakuma ifyo tutontonkanya, e kutila ifyo tuimona ne fyo tumona bambi, tufwile ukubombesha pa kukulundulula.  Ukutontonkanya sana pali bucibusa bwesu na Yehova e lyo na bantu banensu kukatwafwa ukutwalilila ukuba abaiceefya. Kuli Lesa, abantu bonse abashapwililika baba nge cani icimena pa nshita inono no kubonsa. Abantunse bamoneka kwati fipaso ifili mu mpanga. (Esaya 40:6, 7, 22) Bushe akacani kamo kuti kaba ne cilumba pa mulandu wa kuti kalilepako panono ukucila utubiye? Bushe icipaso kuti caitakisha pa mulandu wa kuti cilatolokesha ukucila ifibiye? Te kuti cicitike! E mulandu wine umutumwa Paulo acinkwilileko Abena Kristu banankwe ati: “Nani amupusanya? Nga kanshi cinshi ukwete ico ushapokelele? Lelo, nga cine cine walicipokelele, cinshi ico waitakishisha ngo ushacipokelele?” (1 Abena Korinti 4:7) Ukutontonkanya sana pa Malembo pamo nga aya kuti kwatwafwa ukulundulula ukuiceefya e lyo no kutwalilila abaiceefya.

17. Cinshi ca-afwile kasesema Daniele ukulundulula ukuiceefya, kabili cinshi cikatwafwa ukucita cimo cine?

¹⁷ Kasesema Daniele, umuHebere, aitilwe “umuntu uwatemwikwa apakalamba” kuli Lesa pantu ‘ali-ipetamike,’ e kutila ali-icefeshe. (Daniele 10:11, 12) Cinshi ca-afwile Daniele ukulundulula ukuiceefya? Ica kubalilapo, ashintilile pali Yehova umupwilapo, alepepa libili libili kuli Lesa. (Daniele 6:10, 11) Na kabili, umutima walungama uwa kwa Daniele walemucincisha ukupoosa amano ku kusambilila Icebo ca kwa Lesa. Ici camwafwile ukutonta amenso ku kufwaya kwa kwa Lesa ukushaiwamina. E lyo ukucila ukulalolesha fye pa filubo fya bantu bakwe, Daniele alemona kabili alesumina ifilubo fyakwe umwine. Na kabili atemenwe sana ukutwala pa ntanshi ubulungami bwa kwa Lesa, ukucila ubulungami bwakwe. (Daniele 9:2, 5, 7) Shi natusambilile ku ca kumwenako cisuma ica kwa Daniele no kubombesha ukulundulula ukuiceefya mu mikalile yesu iya cila bushiku.

18. Bukata nshi abaiceefya ba muno nshiku bakakwata ku ntanshi?

¹⁸Amapinda 22:4 yatila: “Icilambu ca kuiceefya no kutiina Yehova fyuma no bukata no bumi.” Ca cine, Yehova asenamina abaiceefya, kabili icilambu caba bukata no bumi. Asafi  ali fye mupepi no kuleka ukubombela Lesa. Lelo ilyo Yehova amwafwile ukwalula amatontonkanyo yakwe, uyu kemba wa malumbo mu kuiceefya atile: “Ku mano ayo mwapanda mulantungulula, na pa numa mukampokelela mu bukata.” (Amalumbo 73:24) Nga ifwe pali leelo? Bukata nshi abaiceefya bakakwata ku ntanshi? Ukusansha pa kusenaminwa no kuba na bucibusa na Yehova, bakulalolela ukufishiwapo kwa mashiwi yapuutwamo aya Mfumu Davidi ayatila: “Abalanda bakapyaninine calo, no kuilemeno bwingi bwa mutende.” Ala mwandini iyi ni nshita ya ku ntanshi iishaiwamina!—Amalumbo 37:11.

Bushe Muleibukisha?

• Stefani aba shani ica kumwenako ca muntu waiceefya uo Yehova asokolwelele ubukata Bwakwe?

• Ni mu nshila nshi Yehova Lesa aiceefesha?

• Fya kumwenako nshi filanga ukuti Yehova alasokolola ubukata bwakwe ku baiceefya?

• Ica kumwenako ca kwa Daniele kuti catwafwa shani ukulundulula ukuiceefya?

[Amepusho]

[Akabokoshi pe bula 12]

Umwina Kristu Uwali ne Citetekelo Cakosa Lelo Uwaiceefya

Mu 1919, baJ. F. Rutherford bali ne myaka 50, kabili e baleangalila umulimo wa Nte sha kwa Yehova uwa mwi sonde lyonse. Pa kulongana kwa citungu ukwa Basambi ba Baibolo (e fyaishibikwe Inte sha kwa Yehova) ukwabelele pa Cedar Point, mu Ohio, ku U.S.A., baRutherford balembeshe ukubombako umulimo wa kuitemenwa uwa kupokelela no kushindika aba bwananyina baishile ku kulongana ku miputule ya kusendamamo. Uyu mulimo wasanshishemo no kusenda ifipe fya ba bwananyina ukutwala uko balesendama. Pa bushiku bwa kulekelesha ubwa kulongana, baRutherford balengele ibumba lya bantu bali 7,000 ukucankwa ilyo batile: “Ni mwe beminishi ba Mfumu ya shamfumu kabili Shikulu wa bashikulu, ababila kuli bambi . . . ubukata bwa bufumu bwa kwa Shikulu.” Ne lyo baRutherford bali ne citetekelo cakosa, abaishibikilwe ku kulanda amalyashi na maka e lyo na ku kukananashako ifyo basuminemo, na lyo line bali-icefeshe icine cine pa ntanshi ya kwa Lesa. Ilingi line nga balepepa ipepo pa kupepa kwa lucelo ukubako pa Bethel, baleumfwika sana abaiceefya.

[Icikope pe bula 9]

Stefani uwaishibe bwino Amalembo, mu kuiceefya aleakanya ifya kulya pa matebulo

[Icikope pe bula 10]

Ukuiceefya kwa kwa Manase kwatemwine Yehova

[Icikope pe bula 12]

Cinshi calengele Daniele ukuba “umuntu watemwikwa apakalamba”?