Abapomponteka Lelo Abashitompoka

‘Yehova ni Kalenga wa mpela sha pano isonde . . . apeela amaka ku wapomponteka, no kufusho kucincila ku ushakosoboka.’—ESAYA 40:28, 29.

1, 2. (a) Bwite nshi ubusuma ubo abafwaya ukupepa kwasanguluka baitwako? (b) Cinshi cingalenga bumupashi bwesu ukuba mu bwafya bwabipisha?

FWE basambi ba kwa Yesu twalishiba bwino bwino ubwite bwakwe ubusuma ubwa kuti: “Iseni kuli ine imwe bonse mwe balecucutika kabili abafininwa, na ine ndemupuupuutula. . . . Pantu ikoli lyandi lyalipepuka, ne cipe candi calyanguka.” (Mateo 11:28-30) Kabili Abena Kristu balipeelwa “inshita sha kupuupuutulwa ukufuma ku cinso ca kwa Yehova.” (Imilimo 3:19) Ca cine ukuti mwe bene mwalyumfwa ifyo ukusambilila icine ca mu Baibolo, ukuba ne subilo line line ilya ku ntanshi, e lyo no kubomfya ifishinte fya kwa Yehova mu mikalile yenu kupuupuutula.

² Na lyo line, bakapepa ba kwa Yehova bamo balafuupulwa. Inshita shimo uku kufuupulwa kuba fye kwa pa kashita kanono, lelo inshita shimbi kuba kwa pa nshita ntali. Mu kupita kwa nshita, bamo kuti balayumfwa ukuti imilimo yabo iya Bwina Kristu cisendo kabili tailebapuupuutula nga filya Yesu alaile. Ukuyumfwa kushawama ukwa musango yu kuti kwaleta ubwafya ubukalamba pali bucibusa bwa Mwina Kristu na Yehova.

3. Mulandu nshi Yesu alandiile amashiwi ya kufunda ayaba pali Yohane 14:1?

³ Ilyo kwashele inshita inono ukuti Yesu ekatwe no kwipaiwa, aebele abasambi bakwe ukuti: “Mwisakamikwa imitima. Tetekeleni Lesa, tetekeleni na ine pamo.” (Yohane 14:1) Yesu alandile aya mashiwi ilyo abatumwa bali mupepi no kupita mu mafya yene yene. Pa numa ya mafya kwali no kwima ukupakasa. Yesu alishibe ukuti abatumwa bakwe baali no kuipununa pa mulandu wa kufuupulwa nga nshi. (Yohane 16:1) Nga ca kuti abatumwa tabacincintile ubulanda bakwete, nga balinakile lwa ku mupashi kabili ne citetekelo cabo muli Yehova nga calipwile. Ici e cingacitikila na Bena Kristu ba leelo. Ukufuupulwa kwa mutatakuya kuti kwalenga ukukalipwa, kabili ne mitima yesu kuti yafinininwa. (Yeremia 8:18) Kuti twanaka lwa nkati. Uku kutitikishiwa kuti kwalenga twabongoteka mu nkuntu na lwa ku mupashi, nangu fye kufwaisha kwesu ukwa kupepa Yehova kuti kwapwa.

4. Cinshi cingatwafwa ukucingilila imitima yesu iya mampalanya ku kunaka?

⁴ Mwandini kwalilinga ukupanda amano kwa mu Baibolo, ukutila: “Ukucishamo ku kubaka konse, lindo mutima obe, pantu muli wene e mwaba amatuntuko ya mweo.” (Amapinda 4:23) Baibolo itweba ifingatwafwa ukubaka umutima wesu uwa mampalanya ku kufuupulwa no kunaka kwa ku mupashi. Lelo, intanshi, tulingile ukwishiba icilenga ukuti tulepomponteka.

UbuKristu Te Cisendo

5. Cinshi cimoneka ngo kupilikana pa lwa kuba umusambi wa Bwina Kristu?

⁵ Ca cine, ukupilikita kulakabilwa pa kuba Umwina Kristu. (Luka 13:24) Na kuba Yesu atile: “Onse uushisendele icimuti cakwe ica kucushiwilwapo no kunkonka, te kuti abe umusambi wandi.” (Luka 14:27) Aya mashiwi kuti yamoneka nga yalepilika amashiwi ya kwa Yesu aya kuti icipe cakwe calyanguka kabili cilapuupuutula,  lelo ukulanda fye icishinka, aya mashiwi tayalepilikana.

6, 7. Mulandu nshi twingalandila ukuti ukupepa kwesu takutulenga ukupomponteka?

⁶ Nga ca kuti umulimo usuma walenga umuntu ukupilikita no kubombesha, nangu enganaka, kuti aumfwa bwino kabili kuti apuupuutuka. (Lukala Milandu 3:13, 22) Bushe mulimo nshi uwingacila umulimo wa kwebako abantu banensu icine ca mu Baibolo? Kabili, ifisuma ifyo tuipakisha fyalifulisha ica kuti tafingalingana no kubombesha kwesu ukwa kufwaya ukwikala umwabela ifipimo fya kwa Lesa ifya mibele isuma. (Amapinda 2:10-20) Nangu fye lintu twapakaswa, tumona ukupakashilwa pa mulandu wa Bufumu bwa kwa Lesa ngo mucinshi.—1 Petro 4:14.

⁷ Cine cine, icipe ca kwa Yesu cilapuupuutula, sana sana nga twacilinganya ku mfifi ya ku mupashi iyabamo abacili mwi koli lya mipepele ya bufi. Lesa alitutemwa sana kabili tafwaya ifyacilamo kuli ifwe. ‘Amafunde ya kwa Yehova tayaba cisendo.’ (1 Yohane 5:3) UbuKristu bwa cine, ubwa mu Baibolo, tabwaba cisendo. Ukwabula no kutwishika, ukupepa kwesu takutulenga ukupomponteka nelyo ukufuupulwa.

“Tufuule Conse Icafina”

8. Cinshi ilingi line cilenga ukupomponteka kwa ku mupashi?

⁸ Ilingi line, ukupomponteka konse uko tumfwa lwa ku mupashi kufuma ku cisendo na cimbi twasenda ica buno bwikashi bubifi. Apo “icalo conse calaala mu maka ya mubifi,” twashingulukwa ne fintu fitulwisha ifingatulenga ukupomponteka no konaula ukushikatala kwesu ukwa Bwina Kristu. (1 Yohane 5:19) Ukufwaya ifintu ifishikabilwa kuti kwalenga imilimo yesu iya Bwina Kristu ukwafya. Ifi fisendo fyalundwapo kuti fyatunasha no kututitikisha lwa ku mupashi. Kanshi amashiwi tubelenga mu Baibolo ayatila “tufuule conse icafina,” yalilinga.—AbaHebere 12:1-3.

9. Bushe ukufwaisha ifya ku mubili kuti kwatunasha shani?

⁹ Fimo ifilenga ukukanatontonkanya bwino, kufwaisha ukulumbuka, indalama, ukwangala, ukwima inyendo sha kuya mu kwangala e lyo no kufwaisha ifintu. (1 Yohane 2:15-17) Abena Kristu bamo aba mu mwanda wa myaka uwa kubalilapo abalefwaisha icuma balengele imikalile yabo ukwafya icine cine. Umutumwa Paulo alondolola ati: “Abafwaisha ukuba ne fyuma bawila mwi tunko kabili mu citeyo kabili mu lunkumbwa ulwingi ulwa kutumpa kabili ulwa kucena, ifyo fiibisha abantu mu bonaushi kabili mu kupomonwa. Pantu ukutemwe ndalama e shinte lya bubi bwa misango yonse, kabili pa kutinamina ukutemwa kwa musango yu bamo balilufiwa ku citetekelo no kuilasaulamo abene amacushi ayengi.”—1 Timote 6:9, 10.

10. Icilangililo ca kwa Yesu ica kwa katanda, citusambilisha finshi pa fyuma?

¹⁰ Bushe icilenga ukuti tupomponteke no kufuupulwa ilyo tulebombela Lesa mulandu wa kuti tulaleka ukufwaisha ifya ku mubili kwabotelesha bumupashi bwesu? Ici kuti cacitika, nge fyo Yesu alangilile mu cilangililo cakwe ica kwa katanda. Yesu apalenye “amasakamika ya bwikashi buno no longolo lwa fyuma ne fya lunkumbwa lwa fintu fimbi” ku  myunga ‘iingila no kutabilila’ ulubuto lwa cebo ca kwa Lesa mu mitima yesu. (Marko 4:18, 19) E ico, Baibolo itufunda ukuti: “Imikalile yenu ibe iishatemwa ndalama, lelo muteke imitima ku fintu ifilipo. Pantu atila: ‘Nshakakushe nakalya nangu kukulekelesha nakalya.’”—AbaHebere 13:5.

11. Bushe kuti twafumyapo shani ifingatunasha?

¹¹ Limo limo, te kufwaya ifintu fimbi kulenga imikalile yesu ukuba iyayafya, lelo ifyo tucita ne fintu ifyo twakwata kale e kulenga. Bamo kuti bapomponteka pa mulandu wa kulwala amalwele yabipisha, ukufwilwa abatemwikwa babo, nelyo pa mulandu wa mafya yambi. Na lyo line balimona ubucindami bwa kwalula imikalile mu nshita mu nshita. Abaupana bamo basalilepo ukuleka ukucita fimo fimo ifyo batemenwe ukucita. Na kuba baceeceetele ifipe fyabo no kulonga tonse uto batemenwe ukulayangasha. Mu nshita mu nshita, bonse kuti twamwenamo nga twatala twaikala pa nshi no kupituluka mu fyo tucita ne fyo twakwata. Ifyo twamona ukuti tafiletwafwa kuti cawama twafilekako pa kuti tafitunashishe no kutompola imyeo yesu.

Ukunakilila no Bufuuke Filakabilwa

12. Finshi tufwile ukwishiba pa lwa filubo fyesu?

¹² Ifilubo fyesu, nangu fye ni mu tuntu twacepesha, kuti fyalenga imikalile yesu ukwafya. Amashiwi ya kwa Davidi ya cine cine aya kuti: “Amampuulu yandi yampita na pa mutwe; yafina yang’ansha, nge cisendo cafina.” (Amalumbo 38:4) Ilingi line, nga twayalulako fimo ifinono fye kuti twailulukwako ku fisendo fyafina.

13. Bushe ukunakilila kuti kwatwafwa shani ukumona bwino umulimo wesu uwa Bwina Kristu?

¹³ Baibolo itukoselesha ukulundulula “amano no bupanda.” (Amapinda 3:21, 22) Baibolo itila: “Amano ayafuma mu muulu . . . yalinakilila.” (Yakobo 3:17) Bamo balesha ukuilinganya ku fyo bambi babomba mu mulimo wa Bwina Kristu. Lelo Baibolo itweba ati: “Umo na umo ashininkishe umulimo wakwe wine, e lyo akaba na pa kwangila ku mwine eka, te kuilinganya ku muntu umbi iyo. Pantu umo na umo ali no kusenda icipe cakwe umwine.” (Abena Galatia 6:4, 5) Ca cine, ica kumwenako cisuma ica Bena Kristu banensu kuti catukoselesha ukubombela Yehova no mutima onse, lelo amano yene yene no kunakilila fikatwafwa ukwimika amabuyo ayo twingabomba ukulingana na maka yesu.

14, 15. Bushe kuti twalanga shani amano yene yene ilyo tuleyangwa fwe bene ku mubili na mu nkuntu?

¹⁴ Ukunakilila kwesu nangu fye ni mu fintu ifingamoneka ukuba ifishacindama kuti kwatwafwa ukupwisha ukupomponteka. Ku ca kumwenako, bushe tulalundulula imibele isuma iingalenga twaba no bumi ubutuntulu? Moneni ica kumwenako ica baupana bamo ababombela pa maofesi yanono yamo aya Nte sha kwa Yehova. Balimona ubusuma bwa kubomfya amano pa kuti tabalefunshika. Abakashi batila: “Nangu tube ne milimo iingi shani, lyonse tulesha ukulaala pa nshita iyo tulaalilapo.  Kabili lyonse tulatukushako umubili. Ici calitwafwa sana. Twalishiba ifyo tushingacita, kabili tucita ifintu ukulingana na maka yesu. Tatuilinganya kuli bambi abamoneka ukuba na maka sana.” Bushe lyonse tulalya ifya kulya fisuma no kulaala utulo ama-awala umuntu onse alingile ukulaala? Ukubika amano ku butuntulu bwesu ilingi line kulanashako ukunaka kwa mu nkuntu na lwa ku mupashi.

¹⁵ Fwe bamo ifyo tukabila fintu fyaibela. Ku ca kumwenako, nkashi umo Umwina Kristu alibomba imilimo yayafya mu mulimo wa nshita yonse. Alilwalapo amalwele yabipisha, ukusanshako fye no bulwele bwa kansa. Cinshi camwafwa ukushipikisha aya mafya yabipisha? Atila: “Ndomfwa bwino ukusangako inshita ya kuba neka ukwabule congo. Nga natendeka ukumfwa ukupopomenwa no kufunshika, e lyo mfwaisha sana ukuba neka ukwatalala tondolo pa kuti ningabelenga no kutuushako.” Amano yene yene no bupanda filatwafwa ukwishiba ifyo tukabila cila muntu kabili ici cilatwafwa ukukanapomponteka lwa ku mupashi.

Yehova Lesa Alatupa Amaka

16, 17. (a) Mulandu nshi cacindamina sana ukusakamana bumupashi bwesu? (b) Finshi tufwile ukubika pa fyo tucita cila bushiku?

¹⁶ Ukuisakamana lwa ku mupashi kwalicindama sana. Nga twaba bacibusa bene bene aba kwa Yehova Lesa, ukunaka kwena kuti twanaka lwa ku mubili, lelo te kuti tunake ukumupepa. Yehoba ‘e upeela amaka ku wapomponteka, no kufusho kucincila ku ushakosoboka.’ (Esaya 40:28, 29) Umutumwa Paulo uwashininkishe aya mashiwi ukuti ya cine, alembele ati: “Tatunenuka, lelo nelyo ubuntu bwesu ubwa ku nse buleonaika, ubwa mu kati bwena bulelengwa cipya cipya ubushiku no bushiku.”—2 Abena Korinti 4:16.

¹⁷ Tontonkanyeni pa mashiwi ya kuti “ubushiku no bushiku.” Aya mashiwi yaletweba ukuti tuleshukila ifyo Yehova aletupeela cila bushiku. Mishonari umo uwabombele mu busumino pa myaka 43, alenaka no kufuupulwa mu nshita mu nshita. Lelo tanenwike. Atila: “Cila bushiku lyonse ndabuuka ulucelocelo pa kuti napatuulako inshita ya kupepa kuli Yehova no kubelenga Icebo cakwe ilyo nshilayamba umulimo uuli onse. Ukucita ifi cila bushiku e kwanenga ukushipikisha ukufika na leelo.” Kuti twashintilila pa maka ya kwa Yehova ukutupuupuutula nga ca kuti “ubushiku no bushiku,” tulepepa kuli wene no kwetetula pa mibele yakwe iishaiwamina e lyo na pa malayo yakwe.

18. Bushe Baibolo isansamusha shani abakoloci ba busumino nelyo abalwalilila?

¹⁸ Ici cilafwa sana balya bafuupulwa pa mulandu wa bukote no kulwalilila. Aba musango yu balakungumana, te kutila ni co balailinganya kuli bambi iyo, lelo ni pa mulandu wa kuti balebukisha ifyo balebomba kale. Mwandini cilasansamusha ukwishibo kuti Yehova amona abakoloci ukuti balicindama! Baibolo itila: “Umutwe wa mfwi cilongwe icayemba, cisangwa mu mibele ya bulungami.” (Amapinda 16:31) Yehova alishiba ukupelebela kwesu kabili alatasha sana ukumupepa kwesu ukwa mutima onse te mulandu na mabunake yesu. Kabili Lesa takalabe imilimo yesu iisuma iyo twabomba. Amalembo yatulayo kuti: “Lesa tali uushalungama uwa kuti alabe umulimo wenu no kutemwa uko mwalangile kwi shina lyakwe, apo mwalipyungila aba mushilo kabili muletwalilila ukupyunga.” (AbaHebere 6:10) Ala mwandini tulatemwa icine cine ukuba pamo na baba na bucishinka kuli Yehova pa myake ingi!

Mwinenuka

19. Bushe tumwenamo shani mu kupikintika ukucita icisuma?

¹⁹ Abengi basumino kuti ukutukusho mubili cila nshita kulacefyako ukunakuka. Cimo cine, ukulabomba lyonse imilimo ya ku mupashi kuti kwayafwa ukupwisha ukunakuka kwa mu nkuntu nelyo ukwa ku mupashi. Baibolo itila: “Twinenuka mu kucite cawama, pantu mu nshita yalinga tukalobolola nga  tatutompweke. E ico kanshi, lyonse ilyo twaba ne nshita yalinga, tubombe icisuma kuli bonse, lelo maka maka ku ba bwananyina mu citetekelo.” (Abena Galatia 6:9, 10) Tontonkanyeni pali aya mashiwi yaleti “ukucite cawama” e lyo na yaleti “tubombe icisuma.” Aya mashiwi yaletweba ukucitapo cimo. Ukucitila bambi ifisuma kuti kwatwafwa sana ukukanatompoka ilyo tulebombela Yehova.

20. Pa kupwisha ukufuupulwa, ni bani tufwile ukusengauka?

²⁰ Lelo, ukwangala no kucitila pamo ifintu na bantu abasuula amafunde ya kwa Lesa kuti kwatunasha. Baibolo itusoko kuti: “Ilibwe lyalifina, umusensenga walinyoma, lelo ukusonsomba kwa muwelewele kwafino kucila fyonse fibili.” (Amapinda 27:3) Pa kucincintila ukufuupulwa no kupomponteka, tufwile ukuleka ukubishanya na bantu abengatufuupula kabili abalengulula no kufwailisha ifilubo muli bambi.

21. Bushe kuti twakoselesha shani bambi pa kulongana kwa Bwina Kristu?

²¹ Ukulongana kwa Bwina Kristu ni nshila imo iyo Yehova atupeelelamo amaka ya ku mupashi. Nga tuli kulya tulaba ne shuko lya kukoseleshanya ku fyebo fya kupembesula no kubishanya. (AbaHebere 10:25) Bonse mu cilonganino bafwile ukwesha ukulakuula bambi ilyo baleyasukapo nelyo ilyo balelanda amalyashi pa cisebele. Abatungulula mu kusambilisha e bashingamwa sana no mulimo wa kukoselesha bambi. (Esaya 32:1, 2) Nangu ni lintu kuli ukukonkomesha nelyo ukwebaula, ukufunda kulingile ukuba ukwa kupembesula. (Abena Galatia 6:1, 2) Ukutemwa bambi kukatwafwa sana ukubombela Yehova ukwabula ukutompoka.—Amalumbo 133:1; Yohane 13:35.

22. Cinshi twingabela abashipa te mulandu no kukanapwililika?

²² Ukupepa Yehova muli shino nshiku sha mpela kusanshamo ukubombesha. Kabili Abena Kristu na bo bene balanaka, balakalipwa mu nkuntu, kabili balaba na masakamika. Imibele yesu iya kukanapwililika yalinaka kwati cipe ce bumba. Na lyo line Baibolo itila: “Tuli ne cuma ici mu fipe fye bumba, ukuti amaka yacila aya lyonse yabe aya kwa Lesa kabili te yantu yafuma kuli ifwe.” (2 Abena Korinti 4:7) Ca cine, twakulanaka, lelo shi twikatompoka nelyo ukunenuka. Lelo, natube “abashipa no kusosa atuti: ‘Yehova e kaafwa wandi.’”—AbaHebere 13:6.

Ukupitulukamo

• Fintu nshi ifyafina ifyo tulingile ukufuula?

• Bushe kuti twacita shani “icisuma” ku Bena Kristu banensu?

• Bushe Yehova atutungilila shani ilyo twanaka nelyo ilyo twafuupulwa?

[Amepusho]

[Icikope pe bula 23]

Yesu alishibe ukuti ukufuupulwa kwa pa nshita ntali kuti kwalenga abatumwa ukusakamikwa

[Icikope pe bula 24]

Bamo balileka ukucita fimo ifyo batemenwe ukucita

[Icikope pe bula 26]

Yehova amona ukupepa kwesu ukwa mutima onse ukuti kwalicindama te mulandu no kupelebela kwesu