Bushe Muleibukisha?

Bushe mwaliipakisha ukubelenga bamagazini ba nomba line aba Ulupungu lwa kwa Kalinda? Moneni nga kuti mwaasuka amepusho yakonkapo.

• Bushe Complutensian Polyglot yali cinshi, kabili mulandu nshi yacindamine?

Yali ni Baibolo yapulintwa, umwali indimi ishingi ishali mu mikululo yalingana. Ishi ndimi shali ciHebere, iciGriki, ne ciLatin, pamo no lulimi lwa ciAramaiki mumo mumo, kabili ulu lupapulo e lwali ulwawamisha pali ilya nshita. Iyi Baibolo ya polyglot yali mulimo ukalamba ku kukwata amalembo ayalungika aya mu lulimi Baibolo yalembelwemo.—4/15, amabula 28-31.

• Bushe abantu kuti balenga shani Lesa ukusekelela?

Apo Yehova muntu wa cine cine kabili wa mweo, alatontonkanya, alacita ifintu, kabili aliba no kuyumfwa. Ni “Lesa wa nsansa” kabili afwaya ukufishapo ubufwayo bwakwe. (1 Timote 1:11; Amalumbo 104:31) Nga twasambilila sana pa fyo Lesa ayumfwa pa fintu, e lyo twingeshiba sana ifyo twingacita pa kulenga umutima wakwe ukusekelela.—5/15, amabula 4-7.

• Cinshi Davidi asuminishishe umukashi wakwe Mikali ukukwata icimpashanya?

Ilyo Imfumu Shauli yapangile ukwipaya Davidi, Mikali ayafwile Davidi ukufyuka. Abikile icimpashanya icapalile umwaume pa ca kukuwamapo. Afwile alikwete icimpashanya pantu umutima wakwe tawali wa cishinka kuli Lesa. Davidi napamo taishibe ulwa ici cimpashanya nelyo asuminishe Mikali ukucikwata pantu ali mwana wa Mfumu Shauli. (1 Imilandu 16:25, 26)—6/1, ibula 29.

• Bushe ifipope fya kwa Lesa pa mulopa fyalelosha ku cintu nshi icacindamisha?

Ifyo Lesa alandile pa numa ye Lyeshi, mu Malango ya kwa Mose, e lyo na mu cipope cisangwa pa Imilimo 15:28, 29, fyalelosha kwi lambo lya mulopa wa kwa Yesu uwasuumiwa. Kupitila fye muli uyu mulopa e mo twingalekelelwa imembu no kuba no mutende na Lesa. (Abena Kolose 1:20)—6/15, amabula 14-19.

• Fipesha mano finga ifyo Yesu acitile ifyalembwa mu Baibolo?

Mu Malandwe mwalembwa ifipesha mano 35 ifyo Yesu acitile. Lelo impendwa ya cine cine iya fipesha mano ifyo Yesu acitile, ukusanshako ne fishalandwapo, tayaishibikwa. (Mateo 14:14)—7/15, ibula 5.