Bushe Ukupandwa Amano Yene Yene Kulakabilwa?

MUNO nshiku, abengi basumino kuti balishiba ifya kulekanya ubusuma no bubi kabili batila balikwate nsambu sha kucita icili conse ico balefwaya. Bambi na bo batila conse calisuminishiwa cikulu fye cilelenga umo ukuumfwa bwino. Icupo e lyo no bumi bwa lupwa, ukutula kale fimonwa ukuba imitantikile apashimpwa ubwikashi bwa bantu, e fikuminwe sana.—Ukutendeka 3:5.

Tontonkanyeni pali baVerónica, * abekala ku Mexico. Balondolola abati: “Ilyo twali fye mupepi no kukumanisha imyaka 15 mu cupo, abena mwandi banjebele ati bale-enda no mwanakashi umbi. Batile apo uyu mukashana ali wacaice kabili alebasansamusha, tabali na kumuleka. Calimponeshe pa musao pantu abalume bandi abo nalemona ukuba bacibusa bandi aba cine cine tabali no kulaba na ine ku kuntungilila. Kale nalemona kwati imfwa ya batemwikwa besu e ilenga sana ubulanda. Lelo ine pa lwandi, ubucende bwalindetele sana ubulanda pantu abo natemenwe sana balimbutwike kabili ne cabipishe ca kuti batwalilile ukucita ifya kunkalifya.”

Lyene moneni ne cacitike ku mwaume uwa myaka 22 uo icupo capwa kale kabili alikwata no mwana lelo tafwaya ukusakamana umwana wakwe. Enekela banyina ukumusakamana e lyo no kusakamana umwana wakwe. Nga bakaana ukucita fyonse ifyo alefwaya, alakalipa no kubapontela. Banyina balayumfwa abapeleelwa ilyo umwana wabo alebakalifya umusango yu.

Ifintu fya musango yu fyaliseeka sana. Ukupaatukana no kulekana kwa mwi funde kulefulilako konse fye. Abana abengi balimona uko umufyashi umo afuma pa ng’anda no kuyatendeka imikalile ipya. Abana bamo balileka ukucindika bambi, kumo na bafyashi babo  bene, kabili balacita ifintu ifishale-enekelwa ukucitwa mu nkulo shapita. Ukucita imisango yonse iya bulalelale na bantu bapusanapusana, ukubomfya imiti bubi bubi, ukusansa kwa bapungwe, e lyo na bana ukwipaya bakafundisha nelyo abafyashi nakufula mu fyalo ifingi. Kabili mufwile namumona ukuti te mu kukansha abana fye na mu fyupo mweka umuli amafya ndakai.

Ilyo tulemona ifya musango yu filecitika mu bwikashi, nalimo kuti twaipusha atuti: Nga ca kuti abantu cine cine balishiba ukulekanya ubusuma no bubi, mulandu nshi amafya yashipwila? Bushe tulakabila ukupandwa amano yene yene? Bushe kwaliba uko twingasanga amano yene yene? Nelyo cingati abengi basoso kuti balisumina muli Lesa na mu Cebo cakwe icalembwa, ifyo bacita fyalipusana ne fyo batunga. Lelo busuma nshi twingasanga ilyo twafwaya no kubomfya ukufunda kwa kwa Lesa? Natulanshanye ifi mu cipande cikonkelepo.

[Futunoti]