“E Cawamisha Ico Mulingile Ukucita”

ALEXIS ni kalume wa myaka isano uwa mu musumba wa Morelia, ku Mexico, kabili abafyashi bakwe balasambilila Baibolo, e lyo no kulongana pamo ne Nte sha kwa Yehova. Ilyo balelongana ukulongana kwa muputule no lupwa lwakwe, amwene icilangililo ca kushimikila ku ng’anda ne ng’anda. Apo pene fye apilibukile kuli bawishi no kubepusha ati “Tata, Tata, cinshi ico mushi-ila mu kushimikila?” Bawishi bamwaswike ati, “Ncili ndesambilila Baibolo pa kuti na ine wine nkaleshimikila.” Mu kucincimuka Alexis ayaswike ati, “Tata, e cawamisha ico mulingile ukucita.”

Uyu mwana umunono alimwene ifyo cacindama ukucita ifileumfwana ne fyo eshibe pali Yehova. Mu ng’anda yabo bekalamo na bana ba banyina mwaice. Atalile apepa kuli Yehova e lyo atendeke ukubasambilisha ifyo abafyashi bakwe bamusambilishe mu citabo ca Icitabo Candi ca Malyashi ya mu Baibolo. Nangu cingati Alexis ali talaishiba ukubelenga, alishibe bwino bwino ifyali muli ici citabo, ukupitila mu fikope ifilangilila aya malyashi. Alandile no kuti alefwaisha ukulatandalila abantu mu mayanda yabo ukuti alebebako ifyo alesambilila pa bufwayo bwa kwa Lesa.

Ca cine abacaice pamo na bakalamba kuti bacita ifyo Yehova, “Uwa Mushilo,” enekela bene ukucita kabili kuti bakwate shuko lyacindamisha ilya kuba Inte shakwe mu nko. (Esaya 43:3; Mateo 21:16) Cine cine, ico e cawamisha ico umuntu alingile ukucita.