Ukupatwa Apabulo Mulandu

“Bampatile apabulo mulandu.”—YOHANE 15:25.

1, 2. (a) Cinshi bamo bapapila ilyo Abena Kristu bapontelwa, lelo cinshi ico ifwe tushipapila? (b) Bushe “lupato” nshi ulo twalalandapo muli cino cipande? (Moneni utulembo twa pe samba.)

INTE SHA KWA YEHOVA balesha na maka ukwikala imikalile yumfwana ne fishinte fyaba mu Cebo ca kwa Lesa. Ne citumbukamo ca kuti balatashiwa mu fyalo ifingi. Lelo, limo limo, balababepesha ubufi. Ku ca kumwenako, umulashi wa mu musumba wa St. Petersburg, ku Russia, ebukisha ukuti: “Baletweba ati Inte sha kwa Yehova cakaniko abacita ifintu mu bumfisolo kabili balaipaya abene no kwipaya abana.” Na lyo line ilyo abombele pamo ne Nte sha kwa Yehova lintu kwali ukulongana kwa pa kati ka nko, umulashi umo wine atile: “Nomba ndemona fye abantu abatuntulu, abasansamuka . . . Bantu ba mutende abashaba ne cimfulumfulu, kabili balitemwana nga nshi.” Asosele no kuti: “Nshishibe ne co abantu bababepesesha ubufi.”—1 Petro 3:16.

² Ababomfi ba kwa Lesa tabatemwa nga bababepesha ubufi ati ni ncitatubi, lelo ilyo babapontela, tabapapa. Yesu asokele abakonshi bakwe libela ilyo atile: “Aba pano calo nga bamupata, mwishibe ukuti babalile bapata ine ilyo bashilapata imwe. . . . Lelo ni pa kuti icebo icalembwa mu Mafunde yabo cifishiwepo, icitila, ‘Bampatile apabulo mulandu.’” * (Yohane 15:18-20, 25; Amalumbo 35:19; 69:4) Mu kubangilila aebele abasambi bakwe ati: “Nga abantu beta umwine ng’anda abati Beelsebuli, pali bufi aba mu ng’anda yakwe!” (Mateo 10:25) Abena Kristu balishiba ukuti ukushipikisha umusaalula wa musango yo kwaba lubali lwa “cimuti ca kucushiwilwapo” ico basumine ukusenda ilyo basangwike abakonshi ba kwa Kristu.—Mateo 16:24.

3. Bakapepa ba cine balapakaswa ukutula lilali?

³ Ukupakasa bakapepa ba cine kwatendeke kale sana, ukutula fye mu nshiku sha kwa “Abele umulungami.” (Mateo 23:34, 35) Ukupakasa bakapepa ba cine takucitwa fye na bantu abanono. Yesu atile abakonshi bakwe bali no ‘kupatwa ku bantu bonse’ pa mulandu we shina lyakwe. (Mateo 10:22) Na kabili, umutumwa Paulo alembele ati ababomfi ba kwa Lesa bonse—ukusanshako na ifwe umo umo—bafwile ukwenekela ukupakaswa. (2 Timote 3:12) Mulandu nshi benekela ukupakaswa?

Uulenga Iyi Mpatila

4. Bushe Baibolo isokolola shani uulenga impatila?

⁴ Icebo ca kwa Lesa citweba ukuti ukutula fye pa kutendeka, kwaliba umo uushimoneka uulenga ukuti bakapepa ba cine babapate. Tontonkanyeni pa fyo umwaume wabalilepo ukuba ne citetekelo, Abele, aipaiwe mu bunkalwe. Baibolo ilondolola ukuti munyina kwa Abele, Kaini, kepaya ‘aali wa mubifi,’ Satana Kaseebanya. (1 Yohane 3:12) Kaini alangile imibele ya kwa Satana, kabili Kaseebanya alimubomfeshe ukufishapo amapange yakwe aya bubifi. Baibolo na kabili ilatweba ifyo Satana acitile pa kuti Yobo na Yesu Kristu basanswe icabipisha. (Yobo 1:12; 2:6, 7; Yohane 8:37, 44; 13:27) Ibuuku lya Ukusokolola lyena lilalondolola bwino bwino uulenga abakonshi ba kwa Yesu ukupakaswa, litila: “Kaseebanya akulapoosa bamo pali imwe mu cifungo ukuti mukeshiwe umupwilapo.” (Ukusokolola 2:10) Ca  cine, Satana e ulenga iyi mpatila yaba pa bantu ba kwa Lesa.

5. Cinshi Satana apatila bakapepa ba cine?

⁵ Cinshi calenga Satana ukupata bakapepa ba cine? Mwi pange lyakwe ililanga ifyo aituntumba, Satana asonsombele “Mfumu ya muyayaya,” Yehova Lesa. (1 Timote 1:17; 3:6) Alepaasha ukuti imitekele ya kwa Lesa tayawamina abantu no kuti abantu tababombela Yehova mu kuitemenwa, lelo ni co balenekelapo fimo ukufuma kuli wena. Satana atunga ukutila kuti ayalula abantu bonse ukufuma kuli Lesa nga ca kuti bamusuminisha ukubeesha. (Ukutendeka 3:1-6; Yobo 1:6-12; 2:1-7) Satana alelwisha ukuba ne nsambu sha kuteeka abantunse ishalingana ne sha kwa Yehova. E calengele asaalule Yehova ukuti wa bufi, alifilwa ukuteeka abantunse kabili alabatitikisha. Kanshi icalenga ukuti apate ababomfi ba kwa Lesa ni co alafwaisha ukuti balemupepa.—Mateo 4:8, 9.

6. (a) Bushe umulandu wa bumulopwe bwa kwa Yehova wakuma shani umo umo uwa ifwe? (b) Bushe ukumfwikisha uyu mulandu kutwafwa shani ukutwalilila aba busumino? (Moneni umukululo uli pe bula 16.)

⁶ Bushe mwamona ifyo uyu mulandu wamukuma? Apo muli babomfi ba kwa Yehova, nalimo mwalimona ukuti cikabila ukubombesha pa kucita ukufwaya kwa kwa Lesa. Na lyo line, amapaalo yaba mu kucita ico yalifulisha nga nshi. Lelo, cinshi mwingacita nga ca kuti fimo fyalenga ukuti cimwafye ukutwalilila ukulanakila amafunde ya kwa Yehova ne fipimo fyakwe? Kabili kuti mwacita shani nga ca kuti camoneka kwati tapali ifyo mulemwenamo mu kubombela Yehova? Bushe kuti mwasondwelela ukuti ca fye ukutwalilila ukubombela Yehova? Nelyo bushe ukutemwa Yehova ne mibele yakwe iishaiwamina kuti kwamucincisha ukutwalilila ukulaenda mu mibele yakwe yonse? (Amalango 10:12, 13) Yehova alisuminisha ukuti Satana aleleta amafya yamo pali ifwe. Ici cipeela umo umo uwa ifwe ishuko ilya kwasuka Satana ukuti ukutunga kwakwe kwa bufi.—Amapinda 27:11.

“Ilyo Abantu Bamupontela”

7. Ni nshila nshi imo iyo Kaseebanya abomfya ilyo esha ukutufumya kuli Yehova?

⁷ Nomba natulande sana pa nshila imo iya mucenjelo iyo Satana atemwa ukubomfya ilyo esha ukushinina ukuti ifyo asosele pali Yehova na babomfi bakwe fya cine. Ne yi nshila yaba kubepa. Yesu aitile Satana ati ‘wishi wa bufi.’ (Yohane 8:44) Ishina lyakwe ilya kuti Kaseebanya, ilyalola mu kuti “Uwa Lwambo,” limwishibisha ukuti alabepesha sana Lesa, ne cebo cakwe icishaiwamina, ukusanshako fye ne shina Lyakwe ilya mushilo. Pa kusonsomba bumulopwe bwa kwa Yehova, Kaseebanya abomfeshe umutunganya no bufi bwafiita fititi, kabili abomfya inshila imo ine pa kusaalula ababomfi ba cishinka aba kwa Lesa. Ukusaalula aba baNte, kuti kwalenga ubwesho bwakosa ukukoselako ica kutila kuti bafilwa ukushipikisha.

8. Bushe Satana asaalwile shani Yobo, kabili cinshi catumbwikemo?

⁸ Tontonkanyeni pa fyacitikile Yobo, uo ishina lyakwe lipilibula ukuti “Uwapatwa.” Ukulunda pa kumulwalika, ukumulofesha ifyuma, no kumwipaila abana, Satana alengele Yobo ukumoneka kwati mubembu uo Lesa alekanda. Nangu abantu bamucindike sana, Yobo  aishileba uwasuulwa ku bantu ukusanshako fye na kuli balupwa na ku banankwe ba pa mutima. (Yobo 19:13-19; 29:1, 2, 7-11) Na kabili, ukubomfya bakasansamusha ba bufi, Satana alefwaya ‘ukufwanta Yobo ku fyebo.’ Abalilepo ukumutunganya ukuti nalimo alicitile ulubembu ulwabipisha, lyena mu kulungatika amwebele ati ni ncitatubi. (Yobo 4:6-9; 19:2; 22:5-10) Mwandini ici cali no kunenuna Yobo!

9. Yesu bamulengele shani ukumoneka kwati mubembu?

⁹ Umwana wa kwa Lesa alipatilwe cibi kuli Satana pantu e usumbula sana bumulopwe bwa kwa Yehova. Ilyo Yesu aishile kwi sonde, Satana ale-esha ukubifya bumupashi bwakwe nge fyo acitile kuli Yobo pa kulenga Yesu ukumoneka kwati mubembu. (Esaya 53:2-4; Yohane 9:24) Abantu balemwita ati umunwi kabili umuliili e lyo kabili baletila ‘ali ne ciwa.’ (Mateo 11:18, 19; Yohane 7:20; 8:48; 10:20) Balimubepeshe no bufi bwa kuti ali wamiponto. (Mateo 9:2, 3; 26:63-66; Yohane 10:33-36) Ici calengele Yesu ukubipilwa pantu alishibe ukuti calesaalula Wishi. (Luka 22:41-44) Na mu kulekelesha, Yesu alipaiwe kwati ni ncitatubi. (Mateo 27:38-44) Pa kuisungilila uwa busumino, Yesu alishipikishe ku ‘fya kupilika fya babembu.’—AbaHebere 12:2, 3.

10. Bushe abashalapo basubwa bapatwa shani kuli Satana muno nshiku?

¹⁰ Na muno nshiku, abashalapo pa bakonshi ba kwa Kristu abasubwa na bo bene balipatwa kuli Kaseebanya. Satana alondololwa ati e ‘ubepesha bamunyina [ba kwa Kristu], uubabepesha akasuba no bushiku ku cinso ca kwa Lesa wesu.’ (Ukusokolola 12:9, 10) Ukutula apo apooselwa pe sonde, Satana alabombesha ukuti abifye ishina lya bamunyina kwa Kristu. (1 Abena Korinti 4:13) Nge fyo cali ku Bena Kristu ba kubalilapo, mu fyalo fimo, abashalapo pa bakonshi ba kwa Kristu balababepesha ubufi no kubeta ati icakaniko ca mipepele yabipa. (Imilimo 24:5, 14; 28:22) Nge fyo tumwene pa kutendeka, balipatwa kabili abantu balakubanya amalyashi ya bufi pali bena. Lelo, “ku bukata no musaalula, ku lwambo na ku malumbo,” bamunyina basubwa aba kwa Kristu, abaafwiwa na banabo aba mu “mpaanga shimbi,” mu kuiceefya balyesha na maka ‘ukubaka amafunde ya kwa Lesa no kubomba umulimo wa kushimika ubunte bwa kwa Yesu.’—2 Abena Korinti 6:8; Yohane 10:16; Ukusokolola 12:17.

11, 12. (a) Cinshi cilenga amafya yamo ayo Abena Kristu bashingwana na yo? (b) Ni mu nshila nshi Umwina Kristu afyengeleshiwa pa mulandu wa citetekelo cakwe?

¹¹ Kwena, ababomfi ba kwa Lesa ngo muntu umo umo balasaalulwa. Nomba amafya yonse bakwata tayesako “pa mulandu wa bulungami.” (Mateo 5:10) Tulaba na mafya yamo pa mulandu wa kukanapwililika. Tatwakatashiwe ‘nga tushipikisha ilyo tulebembuka no kutobwa amapi.’ Lelo, nga Umwina Kristu “ashipikisha ifya bulanda no kufyengeleshiwa, pa mulandu wa kampingu kuli Lesa, ici cena cintu icapokelelwa” kuli Yehova. (1 Petro 2:19, 20) Lelo, ni lilali lintu Umwina Kristu engashipikisha ifya bulanda no kufyengeleshiwa?

¹² Bamo balabacusha pa mulandu wa kukaana intambi sha pa cililo ishishili sha mu malembo. (Amalango 14:1) BaNte bacaice balasaalulwa lyonse pantu balakonka ifipimo fya kwa Yehova ifya mibele isuma. (1 Petro 4:4) Abafyashi ba Bwina Kristu bamo babeba ukuti “ba mulekelesha” nelyo “balacusha abana” pantu balakaana ukundapa abana babo ukubomfya umulopa. (Imilimo 15:29) Abena Kristu balabataluka kuli balupwa lwabo na bena mupalamano pa mulandu fye wa kusanguka ababomfi ba kwa Yehova. (Mateo 10:34-37) Bonse aba bakonka icipasho caimike bakasesema na Yesu abafyengeleshiwe apabulo mulandu.—Mateo 5:11, 12; Yakobo 5:10; 1 Petro 2:21.

Ukushipikisha Ilyo Batupontela

13. Ilyo tule-eshiwa, finshi fingatwafwa ukutwalilila abashikatala lwa ku mupashi?

¹³ Nga batupontela sana pa mulandu wa citetekelo cesu, kuti twanenuka nge fyacitile kasesema Yeremia. Kabili kuti twafwaya no kuleka  ukubombela Lesa. (Yeremia 20:7-9) Cinshi cingatwafwa ukutwalilila abashikatala lwa ku mupashi? Tufwile ukumona ifintu nge fyo Yehova afimona. Tamona abatwalilila aba busumino ilyo bale-eshiwa nge finakabupalu, lelo abamona nga bakacimfya. (Abena Roma 8:37) Muletontonkanya pa bantu abasumbwile bumulopwe bwa kwa Yehova te mulandu na mafya ayo Kaseebanya abaletele—e kutila abantu pamo nga Abele, Yobo, Maria nyina kwa Yesu, na bambi abali aba busumino kale, ukusanshako na babomfi banensu aba muno nshiku. (AbaHebere 11:35-37; 12:1) Mule-etetula pa fyo batwalilile aba cishinka. Ili kumbi likalamba ilya bantu ba cishinka, abacimfya icalo ku citetekelo cabo, lilatucincisha ukuilunda kuli lyena pa kucimfya icalo ku citetekelo cesu.—1 Yohane 5:4.

14. Bushe ipepo lya mukoosha kuti lyatwafwa shani ukutwalilila aba busumino?

¹⁴ Nga ‘amatontonkanyo ya kusakamika yaba ayengi muli ifwe,’ kuti twapepa kuli Yehova mu mukoosha, kabili akatusansamusha no kutukosha. (Amalumbo 50:15; 94:19) Akatupeela amano tukabila pa kupwisha amesho kabili akatwafwa ukulaibukisha umulandu ukalamba, bumulopwe bwa kwa Yehova, uwalenga no kuti ababomfi bakwe bapatwe. (Yakobo 1:5) Na kabili Yehova kuti atupeela no “mutende wa kwa Lesa uwacila amatontonkanyo yonse.” (Abena Filipi 4:6, 7) Umutende Lesa atupeela ulatwafwa ukutwalilila abatekanya no kushansha ilyo tuleshingwana na mesho yatapata, kabili ulatwafwa ukukanatwishika no kukanaba aba mwenso. Ukubomfya umupashi wakwe uwa mushilo, Yehova kuti atutungilila mu mafya yonse ayo engasuminisha ukwisa pali ifwe.—1 Abena Korinti 10:13.

15. Cinshi cingatwafwa ukukanafulwa ilyo twacula?

¹⁵ Cinshi cingatwafwa ukukanafulilwa abatupata apabulo mulandu? Ibukisheni ukuti abalwani besu abakalamba ni Satana ne fibanda. (Abena Efese 6:12) Kwena abantu bamo balatupakasa ku mufulo, lelo abengi abakaanya abantu ba kwa Lesa bacite co mu kukanaishiba nelyo bambi e babatunka ukucite fyo. (Daniele 6:4-16; 1 Timote 1:12, 13) Yehova afwaya ukuti “abantu ba misango yonse” bakwate ishuko lya ‘kupusuka no kufika ku kwishiba bwino bwino icine.’ (1 Timote 2:4) Ici ca cine, pantu bamo abaletukanya kale nomba balisanguka bamunyinefwe Abena Kristu ico bamwene imilimo yesu iisuma. (1 Petro 2:12) Na kabili, kuti twasambililako ku ca kumwenako ca kwa Yosefe mwana Yakobo. Nangu bamunyina bamucushishe apakalamba, tali ne mpatila kuli bena. Cinshi calengele? Ni co ailwike ukuti Yehova e walengele ifintu ukucitika muli ilya nshila pa kuti afishepo ukufwaya Kwakwe. (Ukutendeka 45:4-8) Cimo cine, Yehova kuti aleka ifwe ukufyengeleshiwa pa kuti ishina lyakwe licindikwe.—1 Petro 4:16.

16, 17. Cinshi ico tushilingile ukusakamikilwa sana ilyo bakakaanya babombesha mu kwesha ukulesha umulimo wa kubila?

¹⁶ Tatufwile ukusakamikwa sana nga camoneka kwati abakaanya imbila nsuma bacimfya. Yehova nomba aletenshe nko ukupitila mu mbila nsuma iilebilwa mwi sonde lyonse, kabili ifisuma fya mu nko fileisa. (Hagai 2:7) Kacema Musuma, Yesu Kristu, atile: “Impaanga shandi shilomfwe shiwi lyandi, na ine nalishiishiba, na sho shilankonka. Na ine ndashipeela ubumi bwa muyayaya, . . . kabili takuli uukashisompola mu minwe yandi.” (Yohane 10:27-29) Bamalaika abashila na bo balabombako uyu mulimo ukalamba uwa kulobolola kwa ku mupashi. (Mateo 13:39, 41; Ukusokolola 14:6, 7) E ico, takuli nangu cimo ico bakakaanya bengacita nelyo ukusosa icingacilikila  ukufwaya kwa kwa Lesa.—Esaya 54:17; Imilimo 5:38, 39.

¹⁷ Ilingi line, amapange ya bakakaanya tayabomba. Mu calo cimo ica mu Afrika, Inte sha kwa Yehova balibabepeshe ubufi bwafiita fititi, kabili balebabepesha no kuti bapepa Kaseebanya. Icatumbwikemo ca kuti lyonse ilyo baGrace balebatandalila, balebutuka no kubelama ku lukungu lwa ng’anda ukufikila baNte baya. Bushiku bumo shimapepo wa ku calici ku mwabo aimishe icitabo cesu no kweba bonse abali mu calici ukuti tabafwile ukucibelenga pantu kuti cabalenga ukufuma mwi calici lyabo. Ici calengele baGrace ukufwaisha ukwishiba ico balebakanisha ukubelenga cilya citabo. Ubushiku bumbi ilyo baNte batandele, baGrace tabailebelama, lelo batendeke ukulanshanya na bo no kupokako icitabo balebakaanya ukubelenga. Isambililo lya Baibolo lyalitendeke, kabili mu 1996 balibatishiwe. BaGrace nomba balabombesha ukufwayafwaya bambi ababepwa ubufi pa Nte sha kwa Yehova.

Ino E Nshita ya Kukosha Icitetekelo Cenu

18. Cinshi ico tulingile ukukosesha icitetekelo cesu ilyo amesho yakalamba yashilaimako, kabili kuti twakosha shani icitetekelo cesu?

¹⁸ Nacicindama ukuti tukoshe icitetekelo cesu ino ine nshita pantu Satana kuti atufyengelesha inshita iili yonse. Kuti twakosha shani icitetekelo cesu? Ilyashi lyafumine ku calo cimo uko abantu ba kwa Yehova balepakaswa litila: “Ico twishibe nomba ca kuti: Ababa ne misango iisuma iya ku mupashi kabili abatesekesha icine ca mu Baibolo tacibakosela ukushangila ilyo amesho yaisa. Lelo abo mu ‘nshita iyene’ bapuswa ku kulongana, abashibombako lyonse mu mulimo wa kubila, kabili abanashako ifipimo fya kwa Lesa mu tuntu utunono ilingi line balawa ilyo kwaba  ubwesho ‘ubukalamba.’” (2 Timote 4:2) Nga mwaishibako mumo mumo umo mulekabila ukuwamya, citeni ico bwangu bwangu.—Amalumbo 119:60.

19. Cinshi bucishinka bwa babomfi ba kwa Lesa abale-eshiwa bupwishishisha?

¹⁹ Bucishinka bwa bakapepa ba cine ilyo beshiwa pa mulandu wa lupato lwa kwa Satana, bushininkisho bwine bwine ubwa kuti Yehova fye e walungama, e walinga kabili e wawaminwa ukuba mulopwe. Bucishinka bwabo bulalenga umutima wa kwa Lesa ukusekelela. Nangu abantu babapontele, Yehova uo bukatebebe bwakwe bwapulamo pano isonde na ku muulu ‘taba na nsoni kuli bene, ukwitwa Lesa wabo.’ Ca cine, bonse aba aba cishinka, mu kulinga kuti basoselwako ukuti: “Icalo tacabawamine.”—AbaHebere 11:16, 38.

[Futunoti]

Bushe Kuti Mwalondolola?

• Nani ulenga abantu ukufyenga bakapepa ba cine?

• Bushe Satana abomfeshe shani umusaalula pa kwesha ukupwisha bucishinka bwa kwa Yobo no bwa kwa Yesu?

• Bushe Yehova atwafwa shani ukushangila ilyo tuleshingwana na mafya ya kutufyengelesha ayo Satana aleta pali ifwe?

[Amepusho]

[Akabokoshi ne Cikope pe bula 16]

Balilwike Ico Baleculila

Inte ya kwa Yehova imo iya mu Ukraine, umo babindile umulimo wa kushimikilo Bufumu ukucila pa myaka 50, yatile: “Ukucula uko Inte sha kwa Yehova bacula takufwile ukumonwa kwati kufuma fye ku bantu . . . Abalashi abengi baalecita fye ifyo balebeba ukucita. Ilyo ubuteko bwayalwike, abalashi na bo balyalwike, lelo ifwe twaba fye cimo cine. Twailwike ukuti uulenga ifwe ukuba na ya mafya alisokololwa mu Baibolo.

“Tatwaleimona nga balecushiwa fye ku bantu ba culukusu. Icatwafwile ukushipikisha kumfwikisha umulandu waimineko mwi bala lya Edene—umulandu wa bumulopwe bwa kwa Lesa. . . . Twaletungilila umulandu ushakuma fye abantunse lelo uwakuma na Mulopwe wa kubumbwa konse. Twalyumfwikishe sana umulandu twaleculila. Ici calitukoseshe kabili calengele ukuti tube na bucishinka na lintu ifintu fyabipishe.”

[Icikope]

BaVictor Popovych, balibekete mu 1970

[Icikope pe bula 13]

Nani walengele ukuti Yesu asaalulwe?

[Ifikope pe bula 15]

Yobo, Maria, na babomfi ba kwa Lesa aba muno nshiku, pamo nga baStanley Jones, balisumbula bumulopwe bwa kwa Yehova