“Uwalelulumba ku Kusabankanya Ilandwe” mu Kushipa

CASHIMIKWA ukuti ilyo George Borrow ali ne myaka 18, aishibe indimi 12. Pa numa ya myaka ibili alikwete amaka ya kupilibula “bwino bwino [indimi 20 ishapusanapusana], ukwabula no bwafya.”

Mu 1833 uyu mwaume wakwete ica bupe caibela aliitilwe ukuti bamwipushe amepusho ku kabungwe ka British and Foreign Bible Society aka ku London, mu England. Nangu ca kuti Borrow takwete indalama sha kwendela, alefwaisha ukuyako. E co uyu mwaume wa myaka 30 aendele pa makasa, bakilomita 180, mu ma-awala fye 28 ukufuma ku mwakwe ku Norwich.

Akabungwe ka Bible Society kamupeele umulimo wakosa uwa kuti mu myeshi fye 6 afwile ukusambilila ululimi lwa ciManchu ululandwa mu ncende shimo shimo isha China. Alombele icitabo ca kumwafwa ukusambilila ulo lulimi, lelo bamupeele fye Ilandwe lya kwa Mateo ilya mu ciManchu, e lyo na dikishonari wakwate ciManchu ne ciFrench. Lelo mu milungu fye 19, alembeele aba ku London ukuti, “Ninjishiba iciManchu pa kwafwiwa na Lesa.” Ukucite co kwali kwa kupapusha icine cine pantu pa nshita imo ine alelungika ne Ilandwe lya kwa Luka mu ciNahuatl, icaba pa ndimi sha cikaya isha mu Mexico.

Baibolo mu ciManchu

Mu myaka ya ba1600, ululimi lwa ciManchu lwalilembelwe pa fimfungwa ifyo bapokele ku baUighur aba ku Mongolia. Uyu wali e muku wa kubalilapo ukulemba ulu lulimi pa fimfungwa, kabili ici calengele ukuti iciManchu cibe ululimi lukalamba mu China. Nangu ca kuti mu kupita kwa nshita abengi balilekele ukulanda ulo lulimi, ababa mwi bumba lya British and Foreign Bible Society bali-ipeeleshe ukupulinta no kusabankanya maBaibolo mu ciManchu. Ilyo cali mu 1822 bafwaile indalama no kupanga amabuuku 550 aye Landwe lya kwa Mateo, ilyapilibwilwe na Stepan Lipoftsoff, uwali mu cipani ca buteeko icibombela pa milandu iikumine fyalo fimbi ica mu Russia, kabili aikele mu China imyaka 20. Aya mabuuku yapulintiilwe ku St. Petersburg, lelo basabankenyeko fye amabuuku yanono, kabili ayashelepo yalyonawilwe kuli mulamba.

Pa nshita fye iinono batendeke ukupilibula Amalembo ya Bwina Kristu yonse aya ciGriki. Mu 1834 kwali ukusanga bamanyuskripiti ba kale aba Malembo ya ciHebere, kabili ici calengele abengi ukufwaisha ukwishiba ifyaba muli Baibolo. Lelo nani wali no kutungulula ukulembulula Baibolo wa ciManchu no kupwishishisha ukupilibula amabuuku yasheleko? Aba mu kabungwe ka British and Foreign Bible Society batumineko George Borrow ukuyababombelako yu mulimo.

Ukuya ku Russia

Ilyo afikile fye mu St Petersburg, Borrow apoosele sana inshita ukusambilila iciManchu  pa kuti ilyo alepitulukamo alemona ifilubo filimo no kutantika amalembo ya mu Baibolo bwino bwino. Kwena umulimo walikosele, kabili alebomba ama-awala 13 cila bushiku ukwafwa ukupanga ifya kupulintilako Baibolo wa The New Testament, iyo baishilelondolola ukuti “Baibolo yawamisha iyapilibulwa na bantu ba ku kabanga.” AmaBaibolo 1,000 yalipulintilwe mu 1835. Lelo ipange lya kwa Borrow ilya kutwala aya maBaibolo ku China no kuyasabankanya lyalipumfyanishiwe. Ubuteeko bwa ku Russia bwatiinine ukuti ukusabankanya Baibolo mu ciManchu mu China kuti kwamonwa kwati ni nshila ya konawilamo bucibusa busuma ubo baleipakisha na bena mupalamano babo abena China, e ico bwakeenye Borrow ukufika ku mupaka wa China nga ca kuti alisendele nangu fye ni “Baibolo umo uwa ciManchu.”

Lelo pa numa ya myaka 10, amaBaibolo yanono yalisabankanishiwe, kabili Amalandwe ya kwa Mateo na Marko ayaleba pe bula limo line mu ciManchu na mu ciChinese, yalipulintilwe mu 1859. Pali yo nshita abantu abengi abalebelenga iciManchu batemenwepo kubelenge ciChinese, e ico ne subilo lya kukwata Baibolo onse mu ciManchu lyatendeke ukushibantukila. IciManchu caile cilepwa, kabili tapakokwele papyene iciChinese. Ilyo umwaka wa 1912 walefika, China yaishileba icalo caikatana e lyo ne ciChinese caishileba ululimi lukalamba.

Icisumbu ca Iberia

Ukucincishiwa no mulimo wakwe, George Borrow abwelele ku London. Mu 1835 na kabili bamutumine ku Portugal na ku Spain, “ku kufwailikisha ukumona nga ca kuti abantu kuti bapokelela icine ca buKristu.” Pali iyo nshita, ninshi akabungwe ka British and Foreign Bible Society takalafika kuli fi fyalo fyonse fibili pa mulandu wa kufula kwa fimfulunganya mu fikansa fya calo e lyo na mu bwikashi. Borrow alefwaisha ukulanshanya na bantu pali Baibolo mu mishi ya baPortuguese, lelo pa nshita fye iinono kwaimine aba mipepele abashaleangwako kabili ico camulengele ukwabukila ku Spain.

Ku Spain na ko kwali ubwafya bwapusanako, maka maka ku baGypsy abo Borrow mu kuya kwa nshita atendeke ukumfwana na bo sana, pa mulandu wa kuti alishibe ululimi lwabo. E ico ilyo afikile fye atendeke ukupilibula “Icipingo Cipya” mu lulimi lwa ciGitano ulwa baGypsy ba ku Spain. Ilyo atendeke ukubomba uyu mulimo alombele abanakashi babili abaGypsy ukuti bamwafweko. Alebabelengela iciSpanish e lyo abebo kuti bapilibule. Muli yi nshila asambilile imilandile isuma iya mashiwi ya ciGypsy. Pa mulandu wa kubombesha kwakwe, Ilandwe lya kwa Luka lyalisabankanishiwe mu 1838, kabili ico calengele bishop umo ukulando kuti: “Akaalula Spain yonse ukubomfya ululimi lwa cigypsy.”

George Borrow alisuminishiwe ukufwaya “umuntu wafikapo uwingapilibula Amalembo mu ciBasque.” Uyo mulimo wapeelwe kuli Dokota Oteiza. Borrow alembele ukuti: “Uyu muntu alishibishe sana ululimi ulo na ine naishibako panono.” Mu 1838, Ilandwe lya kwa Luka lyali e buuku lya mu Baibolo ilyabalilepo ukufuma mu ciBasque ca ku Spain.

Ukucincishiwa no kufwaisha kwakwe ukwa kusambilisha balya bantu, Borrow ale-enda  inyendo ishitali ku kusabankanya amabuuku ya mu Baibolo ku balanda mu mishi. Ilingi line, ishi nyendo shaleba isha busanso. Lelo, alefwaisho kuti abantu balubuke ku butuutu bwa kukanapepa no bwa kutiine mipashi. Ukusokololo kuti ukulipila indalama pa kulekelelwe membu takwalimo amano, alebepusho kuti: “Bushe Lesa uushaiwamina kuti asuminisha ukulashitisho lubembu?” Lelo baBible Society baletiino kuti ukusansa ifisumino fyaishibikwa muli uyu musango kwali no kulenga babinda imilimo yabo. E ico, bamwebele ukupoosa sana amano ku kusabankanya Amalembo epela.

Ukwabulo kusaina apali ponse Borrow bamusuminishe ukupulinta ibuuku lya mutwe wa kuti El Nuevo Testamento, e kuti Icipingo Cipya mu ciSpanish umwabula ifisambilisho fya baKatolika. Alisuminishiwe ukupulinta uyu Baibolo nangu ca kuti cilolo mukalamba uwa calo pa kubala alekaanya ilyo yalepilibulwa. Uyu cilolo alondolwele iyi Baibolo ukuti yalibipa kabili “citabo icishalinga.” Lyene Borrow aiswile ituuka mu Madrid umwa kushitisha Icipingo Cipya mu ciSpanish, kabili ico calengele ukupusana na bashimapepo e lyo na ba mu buteko. Bamukakile mu cifungo inshiku 12. Ilyo ailishenye bamwebele ukuti afume mu calo mu mutalalila. Apo alishibe bwino ukuti ukukakwa kwakwe takwali kwa mwi funde, aloseshe ku ca kumwenako ca kwa Paulo kabili asalilepo ukwikala mpaka cishibikwe ukuti wa kaele kabili talefwaya umuseebanya uuli onse ukuba pe shina lyakwe.—Imilimo 16:37.

Pa nshita iyo umuntu wabo Borrow alefuma mu Spain mu 1840 ninshi baBible Society bali nabasalanganya amabuuku ya Malembo mupepi na 14,000 mu Spain mu myaka isano iya kulekelesha.” Apo Borrow e wabombele umulimo uukalamba, asondolwele ifyo apitilemo mu Spain ukuti “e myaka iyo nasangalele sana ukutula apo nafyalilwa.”

The Bible in Spain, iyasabankanishiwe umuku wa kubalilapo mu 1842—kabili na nomba bacili balaipulinta—ya kwa George Borrow iyo abomfeshe indalama shakwe isho asangile mu kwendeuka. Muli ili buuku, ilyo abantu bapokelele bwangu bwangu, George aishileiniko mwine ati “uwalelulumba mu kusabankanya Ilandwe.” Alembele ati “Nalefwaisha ukuya mu ncende ishishaishibikwa ishatalala kabili isha mu mpili no kwebako abantu pa milimo yandi iya buKristu.”

Pa kusabankanya no kupilibula Amalembo mu kupimpa, George Borrow apangile umufula kuli bambi abaali no kusabankanya no kupilibula Amalembo—ilyaba lishuko lyacindama icine cine.

[Mapu pe bula 29]

(Nga mulefwaya ukumona mapu, moneni muli maganizi

Pa kutukuta ukupilibula Baibolo no kuisabankanya George Borrow afumine ku (1) England ukuya ku (2) Russia, (3) Portugal, na (4) Spain

[Abatusuminishe]

Mountain High Maps® Copyright © 1997 Digital Wisdom, Inc.

[Icikope pe bula 28]

Amashiwi ya kwiswila aye Landwe lya kwa Yohane mu ciManchu, ayalembelwe mu 1835, ukubelenga ukufuma pa muulu ukuya pa nshi ukutendekela ku kuso ukuya ku kulyo

[Abatusuminishe]

Ukufuma mu citabo ca The Bible in Every Land, icalembelwe mu 1860

[Abatusuminishe Ukubomfya Icikope pe bula 27]

Ili lyashi lifumine mu citabo ca The Life of George Borrow icalembelwe na Clement K. Shorter, mu 1919