Yehova, E ca ‘Kushinamo Cesu mu Nshita ya Kumanama’

“Ukupusuka kwa balungama kufuma kuli Yehova, e ca kushinamo cobe mu nshita ya kumanama.”—AMALUMBO 37:39.

1, 2. (a) Cinshi Yesu apepeleko abasambi bakwe? (b) Cinshi Lesa afwaya ku bantu bakwe?

YEHOVA wa maka yonse. Alikwata amaka ya kucingilila bakapepa bakwe mu nshila ili yonse engatemwa. Kuti afumya abantu bakwe pa calo no kubatwala ku cifulo cimbi icacingililwa bwino kabili ica mutende. Na lyo line, Yesu apepeleko abasambi bakwe kuli Wishi wa mu muulu ukuti: “Nshilemulomba ukuti mubafumye pano calo, lelo ukuti mubabake ku mubifi.”—Yohane 17:15.

² Yehova asalapo ‘ukukanatufumya pano calo.’ Lelo, afwaya ukuti twikale mwi sonde na bantu bonse pa kuti tubilishe ubukombe bwakwe ubwe subilo ne cisansamushi kuli bambi. (Abena Roma 10:13-15) Na lyo line, nge fyo Yesu asosele mwi pepo lyakwe, ukwikala muli cino calo kutulenga ukuba abashacingililwa ku “mubifi.” Abantu bacipondoka ne fimipashi fibifi filacululusha abantu icine cine, kabili Abena Kristu tabalubukako ku masakamika.—1 Petro 5:9.

3. Finshi ifyo na bakapepa ba busumino aba kwa Yehova bafwile ukulolenkana na fyo, lelo kusansamusha nshi tusanga mu Cebo ca kwa Lesa?

³ Kwena, ca cifyalilwa ukufuupulwa limo limo ilyo tuli na mesho ya musango yu. (Amapinda 24:10) Mu Baibolo mwaba amalyashi ayengi nga nshi aya bantu ba busumino abalesakamikwa. Kemba wa malumbo atile: “Ifibi ifiponeno walungama fingi, lelo kuli ifyo fyonse Yehova alamupokolola.” (Amalumbo 34:19) Ca cine, ifibi filacitika na ku ‘muntu walungama.’ Nge fyo cali kuli kemba wa malumbo Davidi, limo limo kuti ‘twalopota, no kufwantwa apakalamba.’ (Amalumbo 38:8) Lelo, tulasansamuka ukwishiba ukuti “Yehova aba mupepi na ku baputuke misana, kabili abafunshike mitima alabapususha.”—Amalumbo 34:18; 94:19.

4, 5. (a) Ukulingana na Amapinda 18:10, cinshi tufwile ukucita pa kuti Lesa engatucingilila? (b) Ni nshila nshi shimo isho tulingile ukukonka pa kuti Lesa engatwafwa?

⁴ Ukumfwana ne pepo Yesu apepele, Yehova  alatubaka icine cine. Aba ca ‘kushinamo cesu mu nshita ya kumanama.’ (Amalumbo 37:39) Ibuuku lya Amapinda libomfya amashiwi yamo yene ilyo litila: “Ishina lya kwa Yehova lupungu ulwakosa, e mo abutukilo mulungami no kuba fye.” (Amapinda 18:10) Ili lembo lisokolola icishinka ca kuti Yehova alapoosako amano sana ku fibumbwa fyakwe. Lesa alacingilila, sana sana abalungama abamufwayafwaya kwati balebutukila ukuyauba mu lupungu lwakosa.

⁵ Ilyo twaba na mafya yakalamba, bushe kuti twabutukila shani kuli Yehova ku kucingililwa? Natulande pa nshila shitatu isho tulingile ukukonka pa kuti Yehova engatwafwa. Iya kubalilapo, tulingile ukupepa kuli Shifwe wa ku muulu. Iya bubili, tulingile ukukonka ubutungulushi bwa mupashi wakwe uwa mushilo. Ne ya butatu, tulingile ukunakila ukutantika kwa kwa Yehova ukwa kulabishanya na Bena Kristu banensu abakatwafwa ukucefyanyako amafya yesu.

Amaka ye Pepo

6. Bushe Abena Kristu ba cine bamona shani ipepo?

⁶ Abasambilila sana pa fya butuntulu bwa muntu batila ipepo e muti wa kupopomenwa na masakamika. Kwena, kuti caba ca cine ukuti ukwikala tondolo kwati nalimo tulepepa kuti kwacefyako ukusakamikwa, lelo kuti twacefyako amasakamika na pa kukutika ku kulila kwa fibumbwa pamo nge nyimbo sha tuni na fimbipo, nelyo ukucina bwino inuma. Abena Kristu ba cine tabaceefya ubucindami bwe pepo, ukulalimona kwati ni nshila ya kundapilamo amatontonkanyo. Tumona ipepo nge nshila yacindamisha iya kulanshanishishamo na Kabumba. Ipepo lisanshamo ukuipeelesha no kucetekela Lesa. Ca cine, ipepo lubali lwa kupepa kwesu.

7. Bushe ukucetekela Yehova ilyo tulepepa kwalola mwi, kabili amapepo ya musango yu yatwafwa shani ukupwisha amasakamika?

⁷ Tufwile ukucetekela Yehova ilyo tulepepa amapepo. Umutumwa Yohane alembele ati: “Uku e kucetekela uko twacetekela wene, ukuti, te mulandu ne co twalomba icilingene no kufwaya kwakwe, alatuumfwa.” (1 Yohane 5:14) Yehova, Uwapulamo, Lesa wa cine eka kabili uwa maka yonse, alakutikisha ku mapepo ya mukoosha aya bakapepa bakwe. Ukwishiba fye ukuti Lesa wesu uwa kutemwa alakutika kuli ifwe ilyo tulemweba amafya yesu na masakamika kulatusansamusha.—Abena Filipi 4:6.

8. Cinshi ico Abena Kristu ba busumino bashilingile ukutiinina nelyo ukuimona kwati tabalingile ilyo balepepa kuli Yehova?

⁸ Abena Kristu ba busumino tabafwile ukutiina, ukuimona kwati tabalingile, nelyo ukubulwa icitetekelo ilyo balepepa kuli Yehova. Kwena, ilyo twacita ifintu ifiletulenga insoni nelyo amafya nga yatwansha, nalimo teti tufwaye ukupepa kuli Yehova. Ilyo cabe fyo tufwile ukulaibukisha ukuti Yehova ‘alacite nkumbu ku balanda bakwe’ kabili ‘alasansamusha  abalanda.’ (Esaya 49:13; 2 Abena Korinti 7:6) Nga natusakamikwa icine cine, e lyo tulingile no kupepa no kucetekela sana Shifwe wa mu muulu ukuti aba ca kushinamo cesu.

9. Mulimo nshi icitetekelo cibomba ilyo tulepepa kuli Lesa?

⁹ Pa kuti tumwenemo mwi pepo, tulingile ukuba ne citetekelo cine cine. Baibolo isosa ukuti “uupalamina kuli Lesa afwile ukusumina ukuti e ko aba no kuti aba kalambula wa bamufwaisha.” (AbaHebere 11:6) Ukuba ne citetekelo kwalicila pa kusumina fye ukuti Lesa e ko aba. Icitetekelo cine cine cisanshamo ukushininkisha ukuti Lesa alikwata amaka kabili alafwaisha ukutulambula nga twaba aba cumfwila kuli wena. “Amenso ya kwa Yehova yaba pa balungama, na matwi yakwe yomfwa ukupaapaata kwabo.” (1 Petro 3:12) Ukwishiba ukuti Yehova alitupoosako sana amano kulenga amapepo yesu ukuwaminako.

10. Nga tulefwaya Yehova ukutulama, musango nshi uwa mapepo tufwile ukupepa?

¹⁰ Yehova alakutika ku mapepo yesu nga twapepa no mutima onse. Kemba wa malumbo alembele ati: “Nakuuta umutima onse, njasukeni, mwe Yehova.” (Amalumbo 119:145) Ukupusanako na mapepo ya kusungila ku mutwe ayo bapepa mu mipepele iingi, amapepo yesu te ya mitima ibili kabili tatupepela fye ico cine. Nga tulepepa kuli Yehova no “mutima onse,” ifyebo tukalalanda fikalafuma pa nshi ya mutima. Pa numa ya kupepa amapepo ya musango yo, tulelulukwa pantu ninshi twapoosa pali ‘Yehova icisendo cesu icafina.’ Nge fyo Baibolo yalaya, ‘wene akatulama.’—Amalumbo 55:22; 1 Petro 5:6, 7.

Umupashi wa kwa Lesa Ulatwafwa

11. Ni nshila nshi imo iyo Yehova atwasukilamo nga ‘tulemulomba’ ukuti atwafwe?

¹¹ Yehova te Komfwa fye wa mapepo lelo Alaasuka na mapepo yesu. (Amalumbo 65:2) Davidi alembele ati: “Mu bushiku bwa kumanama kwandi, ndilila kuli imwe; pantu mulanjasuka.” (Amalumbo 86:7) Ukulingana na ya mashiwi, Yesu akoseleshe abasambi bakwe ‘ukulalomba’ ukwafwa kwa kwa Yehova pantu ‘Shifwe wa mu muulu’ akapeela “umupashi wa mushilo ku balemulomba.” (Luka 11:9-13) Ca cine, amaka yabomba aya kwa Lesa yaba ni kaafwa, nelyo kasansamusha, ku bantu bakwe.—Yohane 14:16.

12. Bushe umupashi wa kwa Lesa kuti watwafwa shani nga ca kuti amafya yamoneka ukuba ayakalamba?

¹² Nangu ni lintu twalolenkana na mafya, umupashi wa kwa Lesa kuti watulenga ukuba na “maka yacila aya lyonse.” (2 Abena Korinti 4:7) Umutumwa Paulo uwashipikishe amasakamika pa miku iingi, atile: “Muli fyonse ndi no bukose mu ulenkosha.” (Abena Filipi 4:13) Mu mano yamo yene, Abena Kristu abengi muno nshiku balapepemuka lwa ku mupashi na mu nkuntu ilyo ukupaapaata kwabo kwasukwa. Ilingi line, amafya yatusakamika tayamoneka ukuba ayayafya nga twapokelela ukwafwa kwa mupashi wa kwa Lesa. Pa mulandu wa aya maka Lesa atupeela, kuti twasosa ifyasosele umutumwa, atile: “Monse monse tuli abatitikishiwa, lelo te bafenenkeshiwa ukwabula na pa kusunkanina; tuli abapeshiwa amano, lelo te bashaba na pa kufumina nangu panono; tuli abapakaswa, lelo abashalekeleshiwa; tuli abafuntulwa, lelo abashonaika.”—2 Abena Korinti 4:8, 9.

13, 14. (a) Bushe Yehova aba shani ica kushinamo cesu ukupitila mu Cebo cakwe? (b) Bushe ukubomfya ifishinte fya mu Baibolo kwamwafwa shani pa lwenu?

¹³ Na kabili umupashi wa mushilo walipuuta mu Cebo ca kwa Lesa no kucibakilila pa kuti twingamwenamo. Ukupitila mu kubomfya Icebo cakwe, bushe Yehova aba shani ica kushinamo cesu mu nshita sha kumanama? Ica kubalilapo, ni pa kutupeela amano no bupanda. (Amapinda 3:21-24) Baibolo ilakansha amatontonkanyo yesu kabili ilawamya imipelulwile yesu. (Abena Roma 12:1) Nga tulebelenga no kusambilila Icebo ca kwa Lesa lyonse, no kucita ifyo tulesambilila, ‘tukakansha ukulingulula kwesu ku kulekanya icalungama ne cabipa.’ (AbaHebere 5:14) Nalimo mwe bene mwalimonapo ifyo ifishinte fya mu Baibolo  fyamwafwile ukupingulapo bwino ilyo mwalolenkene na mafya. Baibolo ilatupeela amano ayengatwafwa ukusanga inshila shisuma isha kupwishishamo amafya yakosesha.—Amapinda 1:4.

¹⁴ Icebo ca kwa Lesa cilatupeela na cimbi icitukosha, ne ci caba lisubilo lya kupusuka. (Abena Roma 15:4) Baibolo itweba ukuti ifyabipa tafyakatwalilile ukulacitika lyonse. Ukucula konse uko twingaculako kwa pa nshita inono. (2 Abena Korinti 4:16-18) Twalikwata “isubilo lya bumi bwa muyayaya ubo Lesa uushingabeepa, alaile ilyo takulaba inshita sha ku kale sana.” (Tito 1:2) Nga twasekelela muli li subilo, kabili twaba abaibukila pa lwa nshita ya ku ntanshi ishaiwamina iyo Yehova alaya, kuti twashipikisha amafya.—Abena Roma 12:12; 1 Abena Tesalonika 1:3.

Icilonganino ni Nshila Yehova Alangilamo Ukutemwa

15. Bushe Abena Kristu kuti bayafwana shani?

¹⁵ Na cimbi ico Yehova aatupeela icingatwafwa ilyo tuli na masakamika, kubishanya uko tuipakisha mu cilonganino ca Bwina Kristu. Baibolo itila: “Icibusa citemwa mu nshita yonse, kabili munyina afyalilwo kumanama.” (Amapinda 17:17) Icebo ca kwa Lesa cikoselesha bonse mu cilonganino ukucindikana no kutemwana. (Abena Roma 12:10) Umutumwa Paulo alembele ati: “Umuntu eifwaila icakwe, lelo onse afwaile umunankwe.” (1 Abena Korinti 10:24) Ukuba ne yi mibele kuti kwatwafwa ukubika amano ku fyo bambi batemwa ukucila ifyo tulefwaya. Nga twayafwa bambi, te bamwenamo fye beka, lelo na ifwe tulomfwa bwino kabili tulaba ne nsansa ishilenga icisendo cesu ukwanguka nga nshi.—Imilimo 20:35.

16. Bushe Umwina Kristu onse kuti akoselesha shani bambi?

¹⁶ Abaume na banakashi abakosoka lwa ku mupashi kuti bayafwa sana mu kukoselesha bambi. Icibalenga ukukoselesha bambi ni co baliyangusha. (2 Abena Korinti 6:11-13) Icilonganino cilamwenamo sana nga ca kuti bonse baletasha abacaice, balekoselesha abapya, e lyo na bapopomenwa. (Abena Roma 15:7) Ukutemwa aba bwananyina kukatwafwa ukukanabatunganya. Tatufwile ukwangufyanya ukutontonkanyo kuti ukuba na mafya cilangililo ca kuti umuntu nanaka lwa ku mupashi. Paulo akonkomesha Abena Kristu ‘ukusansamusha abakungumane mitima.’ (1 Abena Tesalonika 5:14) Baibolo ilanga ukuti na Bena Kristu ba busumino na bo balaba na masakamika.—Imilimo 14:15.

17. Mashuko nshi twakwata aya kukosha bucibusa na ba bwananyina ba Bwina Kristu?

¹⁷ Ukulongana kwa Bena Kristu kwaba ni nshita ishaiwamina iya kusansamusha no kukoselesha  bambi. (AbaHebere 10:24, 25) Uku kubishanya ukulanga ukuti twalitemwa bambi takufwile ukubako fye ilyo tulelongana. Ukucila, abantu ba kwa Lesa balafwailisha inshila shalekanalekana isha kwangalila capamo na ba mu cilonganino. Ilyo kwaima amafya yakosa, cikanguka ukwafwana pantu ninshi kale kale twaliba bacibusa abaikatana icine cine. Umutumwa Paulo alembele ati: “Mwiba amalekano mu mubili, lelo . . . ifilundwa fya uko fibe no kusakamanana . . . Kabili icilundwa cimo nga cacula, ifilundwa fyonse fyaculila pamo na cene; atemwa icilundwa cimo nga cacindikwa, ifilundwa fyonse fyasekelela pamo na cene.”—1 Abena Korinti 12:25, 26.

18. Cinshi ico tushilingile ukucita ilyo twasakamikwa sana?

¹⁸ Limo limo, kuti twasakamikwa sana ica kuti nalimo teti tufwaye ukuba pamo na Bena Kristu banensu. Tufwile ukwesha na maka ukupwisha ukuyumfwa kwa musango yo pa kuti tatuipuswile ku cisansamushi no kwafwa ukwa basumina banensu. Baibolo itusoka ukuti: “Uwanunuka afwayo mwa kufwailo lubuli, apaataukila amano yonse.” (Amapinda 18:1) Lesa alatusakamana ukubomfya bamunyinefwe ne nkashi. Nga twapokelela iyi nshila Lesa alangilamo ukutemwa, tukayumfwa abailulukwa mu nshita ya kumanama.

Bakilileni Isubilo Lyenu

19, 20. Bushe Amalembo yatwafwa shani ukupwisha amatontonkanyo yabipa?

¹⁹ Nga mwafuupulwa nelyo ukukalipa, cilanguka ukusungilila amatontonkanyo yabipa. Ku ca kumwenako, ilyo bamo bali na mafya, kuti batendeka ukutwishika bumupashi bwabo, ukusondwelela ukuti ico baleculila ni co Lesa naleka ukubasenamina. Lelo, ibukisheni ukuti Yehova tesha umuntu nangu umo “ku bubi.” (Yakobo 1:13) Baibolo itila: “[Lesa] tacushisha fye ku kutemwa kwa mutima wakwe, nangu kulenga abana ba bantu ubulanda.” (Inyimbo sha Bulanda 3:33) Lelo, Yehova alakalipwa icine cine ilyo ababomfi bakwe balecula.—Esaya 63:8, 9; Sekaria 2:8.

²⁰ Yehova ni “Shifwe wa nkumbu kabili Lesa wa cisansamushi conse.” (2 Abena Korinti 1:3) Alatusakamana, kabili akatusansabika mu nshita yalinga. (1 Petro 5:6, 7) Ukulaibukisha lyonse ukuti Lesa alitutemwa icine cine kukatwafwa ukusungilila isubilo lyesu, kabili tukalasekelela. Yakobo alembele ati: “Moneni ukuti ca kusekelela fye, mwe bamunyinane, ilyo mwaponenwa ne fya kwesha fyalekanalekana.” (Yakobo 1:2) Mulandu nshi tulingile ukusekelela? Ayasuka ati: “Pantu nga aba uwasuminishiwa akapokelela icilongwe ca bumi, ico Yehova alaile abatwalilila ukumutemwa.”—Yakobo 1:12.

21. Nelyo tushingwana na mafya, bulayo nshi Lesa alaya abaishininkisha ukuba aba cishinka kuli wena?

²¹ Yesu atusokele libela ukuti pano calo tukalacula. (Yohane 16:33) Lelo Baibolo yalaya ukuti “ubucushi napamo bulanda napamo kupakaswa napamo ni nsala napamo kusapula napamo busanso” tafyakatupaatule ku kutemwa kwa kwa Yehova no kwa Mwana wakwe. (Abena Roma 8:35, 39) Mwandini tulasansamuka ukwishiba ukuti amasakamika yonse ayo tukwata, ya pa nshita inono! Na kabili, ilyo tulepembelela ukuti ukucula kwa bantunse kukapwe, Shifwe wa kutemwa, Yehova, alatubaka. Nga twayalukila kuli wena ukuti atucingilile, akaba ‘icamba icasansuka ku bafwantwa, icamba icasansuka mu nshita sha kumanama.’—Amalumbo 9:9.

Finshi Twasambilila?

• Finshi Abena Kristu balingile ukulae-enekela ilyo baleikala muli cino calo cibifi?

• Bushe amapepo ya mukoosha kuti yatukosha shani ilyo tuleshingwana na mafya?

• Ni mu mano nshi umupashi wa kwa Lesa wabela kaafwa?

• Finshi tulingile ukucita pa kwafwana?

[Amepusho]

[Icikope pe bula 18]

Tufwile ukufwayafwaya Yehova kwati nalimo tulebutuka ukuyauba mu lupungu lwakosa

[Ifikope pe bula 20]

Abakosoka lwa ku mupashi balabomfya bwino inshita ku kutasha no kukoselesha bambi