Ilyashi Lya Bakabilisha Ba Bufumu

“Abantu Abaculile, Lelo Abo Balabako” Baibukishiwa

KUKUTENDEKA kwa mwaka wa 2001, Haykaz, Inte ya kwa Yehova iya myaka 15, atandalile uko bakambatika ifikope fya “Bantu Abaculile, Lelo Abo Balabako.” Ubu bulangisho bwabelele ku Bern, Switzerland, kabili bwalelanda pa fyo abaNazi bacushishe Inte sha kwa Yehova. Pa kupwa ukutandala, Haykaz atile: “Nalyumfwa ulwa kulungulusha no bucushi bwabipisha ifyaculile Inte sha kwa Yehova ku mitekele ya baNazi, lelo uyu wali e muku wa kubalilapo namwene fyalembwa fya cine cine ne fikope fya pa nshita baculilemo. Ifi fine bakambatike, ifyalembelwe na bansangwapo, e lyo na balemba ifyacitike kale, fyanengele ukukanalaba bwangu.”

Pa nshita imbi ilyo Haykaz bamwebele ukulembela abo alesambilila na bo ilyashi, alembele pa lyashi lyaleti “Inte sha kwa Yehova—Abantu Abaculile ku baNazi, Lelo Abo Balabako.” Kafundisha wakwe asumine lilya lyashi nomba aebele Haykaz ukutila alekabila no kubikamo ifitabo fya ku calo umwafumine ifyebo fyakwe. Haykaz alisumine ukucite fyo. “Nalembele ifitabo fimo fimo ifilanda pa Nte sha kwa Yehova mu nshita ya kuteka kwa baNazi ifyo napitulwikemo. Kabili nalembele ne fyo naimwenene ne mwine ilyo naile ku bulangisho bwa ‘Bantu Abaculile, Lelo Abo Balabako.’ Ilyashi lyalembelwe pa mabula 43 kabili mwali ne fikope fyalekanalekana.”

Mu November 2002, Haykaz abelengele ilyashi lyakwe ku basambi banankwe, bakafundisha, aba pa ng’anda, ne fibusa. Pa numa ya ico, kwali nshita ya kwipusha no kwasuka, ne ci camupeele inshita ya kulondolola ifyo asumina muli Baibolo. Ilyo umukashana wali mu sukulu amwipwishe ico alembeele ili lyashi, Haykaz alondolwele ati ifitabo ifingi ifyalanda pa fyacitike kale tafyalumbulamo Inte sha kwa Yehova kanshi wena alefwaya abantu ukwishiba ukuti baNte balishipile no kusoselako icisumino cabo ica buKristu. Nomba cinshi cakonkelepo pa numa ya kubelenga ili lyashi?

Haykaz atile: “Abana be sukulu banandi balisungwike. Tabaishibe ukutila Inte sha kwa Yehova umo babelele baliculile icabipisha. Kabili, abengi tabaishibe ukuti baNte abali mu nkambi sha kucushiwilwamo balefwala aka kubeshibilako akaibela, akaleitwa purple triangle.”

Pa numa ya kulondolola ilyashi lyakwe, Haykaz alikwete nshita na imbi iya kulanda ku bana be sukulu banankwe no kulanshanya ifyo Inte basumina ukulingana na Baibolo pa kubikwamo mulopa, pa bwalwa, na pa misango isuma. Haykaz asosele ukuti, “Tapali abansekele mu bana be sukulu banandi atemwa ukumpumya.” Kabili, ilyashi lyakwe nomba balisungila muli laibrare wa pa sukulu. Ilyashi lilya likafwilisha abantu ukulaibukisho kushipa uko Inte sha kwa Yehova shashipile.