Ifyo Mwingashipikisha Ilyo Mwafuupulwa

BUSHE mwalifuupulwa? Muli ino nkulo yayafya kabili umo ifintu fishaishibikwa, abantu abengi balifuupulwa. Bamo balifuupulwa pa mulandu wa kubulwa incito. Bambi na bo baleshipikisha mafya ya mu busanso. Kabili bambi na bo baleshupikwa na mafya ya pa ng’anda, ukulwala ububi, nelyo ukutalalilwa.

Nga mwafuupuka, ni kuli ani mwingafwaya ubwafwilisho? Abengi mwi sonde lyonse balisanga icibatalalika umutima—ukubelenga Icebo ca kwa Lesa, Baibolo. Imitima yabo yalitalalikwa ku mashiwi ya mutumwa Paulo, uwatile: “Abe uwapaalwa Lesa kabili Wishi wa kwa Shikulwifwe Yesu Kristu, Shifwe wa nkumbu kabili Lesa wa cisansamushi conse, uutusansamusha mu bucushi bwesu bonse.” (2 Abena Korinti 1:3, 4) Kuti mwaibelengela ili lembo na malembo yambi muli Baibolo wenu. Ukubelenga Baibolo wenu ‘kukasansamusha umutima wenu no kumwikasha.’—2 Abena Tesalonika 2:17.

Ubwafwilisho bwa kushipikisha ukufuupuka kuti bwasangwa kabili nga mwaba pamo na balya babombela Yehova. Amapinda 12:25 yasosa ayati: “Ukusakamana kwa mu mutima wa muntu kulaukontamika; lelo icebo cisuma ciulengo kusamwa.” Ilyo twasangwa ku kulongana kwa Bena Kristu, e ko tuumfwa ici “cebo cisuma,” ‘icalowa ku mweo kabili iciposha amafupa.’ (Amapinda 16:24) Mukalonganeko pa Ng’anda ya Bufumu iya Nte sha kwa Yehova pa kuti mukayumfwile mwe bene ifyo mukakoshiwa muli kulya kulongana.

Cimbi icikamunonsha maka ipepo lyakwata. Nga amasakamika ya bwikashi buno yamususula, lanshanyeni ifili ku mukoshi wenu no ‘umfwo kupepa.’ (Amalumbo 65:2) Kabumba wesu, Yehova Lesa, alitwishiba bwino ukucila ne fyo twaishiba fwe bene. Kuti twashintilila pa bwafwilisho bwakwe. Icebo cakwe citulaya aciti: “Poosa pali Yehova icisendo cobe icafina, wene alekulama; pe fye takasuminishe uwalungama ukutelententa.” (Amalumbo 55:22) E fyo caba, “abalolela Yehova bapepemuka amaka.”—Esaya 40:31.

Yehova Lesa alitupa ififwaikwa fyonse ifingatwafwilisha ukushipikisha ilyo twafuupuka. Kuti mwafibomfya.