Amepusho Ukufuma ku Babelenga

Cinshi abena Israele abaume babasuminishishe ukuupa abanakashi bambi bambi abasendelwe bunkole ilyo Ifunde lya kwa Mose lyatile tabaali na kuupa abanakashi bambi bambi?—Amalango 7:1-3; 21:10, 11.

Kwali icalengele ukubasuminisha ukuupa abanakashi bambi bambi. Yehova akonkomeshe abena Israele ukonaula imisumba ya nko shimbi 7 isha mu calo ca bena Kanaani, no kwipaya abena musumba bonse. (Amalango 20:15-18) Cimoneka kwati mu nko shimbi, pa bakalamba, banacisungu e balepusuka nga babekata. (Impendwa 31:17, 18; Amalango 20:14) Umwina Israele kuti aupa uyo mukashana, nga abombela fye pa fyo balefwaya.

Pa fyo uyo mukashana aali no kucita, Baibolo itila: “Abeye umutwe wakwe no kuputule ngaala shakwe no kufuule ca kufwala ca bunkole bwakwe; na o kuti aikala mu ng’anda yobe, no kulila wishi na nyina umweshi utuntulu: na pa numa ya ifi kuti waingila kuli wene ku kubo mulume wakwe, na o akabe umukashi obe.”—Amalango 21:12, 13.

Nacisungu injikatwa uo umwina Israele afwaile ukuupa ali no kubeya umutwe wakwe. Ukubeya cali cishibilo ca kuloosha nelyo ukubipilwa. (Esaya 3:24) Na Yobo icikolwe, alibeyele umutwe ilyo abana bakwe bonse bafwile e lyo ne fikwatwa fyakwe fyaonaike nge cishibilo ca kulosha. (Yobo 1:20) Umwanakashi umbi umbi na o ali no kuputule ngaala shakwe, nakalimo ‘ukuputwila mu nama nkati sana,’ ica kutila nelyo shalipentelwe, iminwe yakwe tayali na kulembula bambi. (Amalango 21:12) ‘Ica kufwala ca bunkole’ umwanakashi ali no kufuula ca kufwala nshi? Lwali lutambi lwa banakashi ba mu misumba ya mu fyalo ifisenshi ukufwala ica kufwala icisuma sana nga baba mupepi no kusanswa. Ico balefwalila ifya kufwala fisuma baleenekela ukucebusha abalebekata. Ico ca kufwala capuulama ica mwanakashi injikatwa alecifuula pa nshita ya kuloosha.

Umwanakashi nkole uwali no kuupwa ku mwina Israele ali no kuloosha abatemwikwa bakwe abayashi pa mweshi utuntulu. Imisumba yalecimfiwa yaleonaulwa umupwilapo pa kutila ukwampana na bantu bakwe na bo aishibene na bo kulobe. E ico apo ifita fya bena Israele fyalyonawile ifipasho fya milungu yakwe, ifilubi aleshinshimuna fyalilobele. Umweshi wa kulooshamo kabili waleba mweshi wa kusangululwamo uo umwanakashi nkole ali no kuleka fyonse ifyalecitwa uko aipeeleshe ukupepa kale.

Na lyo line, tacaleba cimo cine ku banakashi bonse bambi bambi. Pali ci, ifunde lyaleti: “Mwikabapeela ku bana bakwe abaume, kabili abana bakwe abanakashi mwikababuulila abana benu abaume.” (Amalango 7:3) Cinshi babakanishe ukuupile fyo? Amalango 7:4 yatila: “Pantu bakapaatula abana benu abaume mu kunkonka, ukuti babombele imilungu imbi.” Kanshi cilya cibindo, cali no kucingilila abena Israele ukukanakowesha ukupepa. Lelo, umwanakashi umbi umbi uwalondololwa muli ili lyashi pa Amalango 21:10-13 tali na kukowesha ukupepa. Abantu bakwe bonse ninshi nabafwa, kabili ifipasho ifyaleimininako tulesa twakwe fyalyonawilwe. Tamwene na pa kumonanina na bakapepa wa bufi. Ilyo cabe fi, umwina Israele balimusuminishe ukuupa umwanakashi umbi umbi.