Amepusho Ukufuma ku Babelenga

Ilyo umutumwa Yohane alembele ukuti “ukutemwa kwapwililika kupoosa umwenso ku nse,” ni mwi aloseshe ilyo atile “ukutemwa kwapwililika,” kabili “mwenso” wa musango nshi uupooswa ku nse?

Umutumwa Yohane alembele ukuti: “Mu kutemwa tamwaba mwenso, lelo ukutemwa kwapwililika kupoosa umwenso ku nse, pantu umwenso ulacilikila. Cine cine, uuli no mwenso taba uwapwililika mu kutemwa.”—1 Yohane 4:18.

Aya mashiwi yalangilila ukuti Yohane alelosha mu kuti tufwile ukulanda ukwabula umwenso—maka maka alelosha pa kuumfwana kwaba pa kutemwa Lesa e lyo no kulanda na Wena ukwabulo mwenso. Kuti twashininkisha ici ilyo twabelenga amashiwi yaba pa cikomo 17 ayatila: “Ifi e fyo ukutemwa kwalengwa ukupwililika muli ifwe, ukuti tube abalandikisha mu bushiku bwa bupingushi.” Ukutemwa Lesa ukwa Mwina Kristu e lyo no kwishiba ukuti na o alitemwikwa kuli Lesa, kuti kwamulenga alanda ukwabula umwenso ilyo alepepa kuli Lesa.

Amashiwi ya kuti “ukutemwa kwapwililika” yalikwata ubupilibulo. Nga fintu ishiwi lya kuti “ukupwililika” limo limo libomfiwa muli Baibolo, talilosha ku kupwililika kwa cine cine, e kuti ukupwililika kwafikapo, lelo lyabomfiwa mu mampalanya. Ku ca kumwenako, mu Lyashi lya pa Lupili, Yesu atile: “E ico na imwe mufwile ukuba abapwililika, ifyo na Shinwe wa mu muulu aba uwapwililika.” Yesu aleeba abakonshi bakwe ukuti nga ca kuti baletemwa fye ababatemwa, ninshi ukutemwa kwabo kuti kwaba ukwapelebela kabili ukwabamo akalema. Bafwile baba no kutemwa kwapwililika nelyo ukuba no kutemwa kwafikapo ilyo baletemwa na balwani babo bene. E ico, nangu fye ni Yohane ilyo alembele ukuti “ukutemwa kwapwililika,” alelanda pa kutemwa Lesa ukwa kufuma pa nshi ya mutima, ukwa cine cine, kabili ukutungulula imibele yonse iya muntu.—Mateo 5:46-48; 19:20, 21.

Ilyo Umwina Kristu alepepa kuli Lesa, aleshiba ukuti mubembu kabili tapwililika. Lelo takasuminishe ukuyumfwa kwa kuti mubembu kabili uwakaanwa kuli Lesa ukumulenga ukukanapepa kuli wene nga ca kuti cine cine alitemwa Lesa kabili aliluka ukuti na o alimutemwa. Lelo alaipakisha ukulanda na Lesa mu kushipa ukulondolola ifili mu mutima wakwe no kulomba ubwelelo pa cishinte ce lambo lya cilubula ilyo Lesa atupeela ukupitila muli Yesu Kristu. Alacetekela ukuti Lesa alakutika ku kulomba kwakwe.

Lelo bushe umuntu kuti aba shani “uwapwililika mu kutemwa” ica kuti ‘apoosa ku nse’ umwenso wa kuti mubembu kabili alikaanwa kuli Lesa? Umutumwa Yohane atile: “Onse uubaka icebo [ca kwa Lesa], cine cine muli wene ukutemwa Lesa kwalipwililika.” (1 Yohane 2:5) Tontonkanyeni pali ci: Apo Lesa atutemenwe ilyo twali tucili ababembu, bushe te kuti atutemwe ukucilapo nga ca kuti twalapila icine cine kabili ‘tulebaka icebo cakwe’? (Abena Roma 5:8; 1 Yohane 4:10) Cine cine, kulila fye twatwalilila ukuba aba busumino, na ifwe bene kuti twacetekela nge fyo umutumwa Paulo acitile ilyo alandile pali Lesa ukuti: “Uyo uushakeenye Umwana wakwe wine lelo apeele wene pa mulandu wa ifwe bonse, cinshi ico ku cikuuku ashingatupeelela ne fintu fyonse pamo nankwe?”—Abena Roma 8:32.