Ashimikiile Abo Asambilila na bo Ifyo Asuminamo

BUSHE kuti watemwa ukwafwilisha abo usambilila na bo ukuumfwikisha ifyo wasuminamo ifyashimpwa pali Baibolo? Magdalena, umukashana wa myaka 18 uwa ku Poland uwa pa sukulu lya ku sekondari, ilingi line alalanshanya na bo asambilila na bo pa fyo asuminamo pa kuba Inte ya kwa Yehova. E ico ilingi line, balamwipusha amepusho pamo nga ya kuti, ‘Calola mwi ukuba Inte ya kwa Yehova?’ ‘Bushe mwalisumina muli Yesu Kristu?’ Bushe kuti ayafwilisha shani abo asambilila na bo? Magdalena apepele kuli Yehova ukuti amutungulule kabili abombele ukulingana na mapepo yakwe.—Yakobo 1:5.

Bushiku bumo Magdalena aipwishe kafundisha umo uwacindika ifyo asuminamo, nga kuti atambisha abo asambilila na bo vidio wa Jehovah’s Witnesses—The Organization Behind the Name. * Kafundisha alisumine. Lyene Magdalena aebele abo asambilila na bo ati: “Ndepekanya ukuti umunandi umo akapekanye programu wa maminiti 90 ku baba muli lino ikalasi. Muli iyi programu mukaba ukutamba vidio e lyo no kulanshanya pa Nte sha kwa Yehova. Bushe kuti mwatemwa ukusangwako?” Bonse fye mu kalasi balisumine. Magdalena na Wojciech, kashimikila wa lyonse uwa mbila nsuma wabelesha, batendeke ukupekanya uyu mulimo.

Bapekenye ukuti bakatendeke uyu programu ne lyashi lya maminiti 20 ukufuma muli broshuwa wa Inte sha kwa Yehova—Ni Bani? Finshi basuminamo?* ukukonkapo no kulanshanya kwa mepusho na masuko. Lyene bali no kutamba vidio mu laibrare wa pa sukulu. Umwana we sukulu onse uwa mu kalasi aali no kupeelwa ica bupe e kuti enifulupu iikalamba umwali amabroshuwa, icitabo ca Ifipusho Abacaice Bepusha—Ifyasuko Fibomba,* pamo na matrakiti e lyo na bamagazini.

Ilyo ubo bushiku bwafikile, abo asambilila na bo abasangilweko bali 14 e lyo ukubikapo na kafundisha umo na bana be sukulu bambi bane abalebelenga mu laibrare. Wojciech mu kubalilapo alondolwele ukuti bakalemba bamo aba ku Poland balebomfya ishina lya kwa Lesa, Yehova, mu fitabo fyabo. Kabili alondolwele no kuti mu mafundisho ya kale aya baKatolika mwali ishina lya kwa Lesa. Lyena alondolwele imibombele ya muno nshiku iya Nte sha kwa Yehova, kabili abalangile amabroshuwa yalanga amaofesi yalekanalekana aya baNte ne fikope fya fikuulwa umwa kulonganina ukulongana kukalamba.

Lyene pakonkele ukulanshanya. Magdalena na Wojciech babomfeshe Baibolo pa kwasuka amepusho. Abasangilweko balitemenwe nga nshi kabili basumine ukuti Inte sha kwa Yehova tabasambilisha amano yabo abene. Mepusho nshi yamo abana be sukulu baipwishe, kabili ya-aswikwe shani?

Ubwipusho: Muli Baibolo mwaba mashiwi ayengi ayashaishibikwa bwino ayalondolololwa mu nshila shalekanalekana. Lelo bushe calyanguka ukukonka ifi fyaba muli Baibolo?

Ubwasuko: Bamo batila kuti wabomfya Baibolo ukulosha amashiwi ya iko monse umo ulefwaila. Lelo nga ca kuti ulefwaya ukwishiba umwalola amashiwi yamo, bushe te kuti wipushe uwalembele ayo mashiwi ukukweba umo yalola? Ca cine, abalemba ifitabo abengi balifwa,  lelo Katendeka wa Baibolo, Yehova Lesa, wena e po aba. (Abena Roma 1:20; 1 Abena Korinti 8:5, 6) Ifikomo fili mupepi ne cikomo cilelandwapo e filangilila ubulondoloshi bwa cine. Te ico ceka, Baibolo ilingi line kuti yalanda pa lyashi limo line mu fipandwa fyapusanapusana, e ico ukulinganya amalembo kuti kwatwafwa ukuumfwikisha. Kanshi kuti twaleka Lesa umwine ukutungulula amatontonkanyo yesu, kwati fye aletulondolwela ilembo pa kanwa nkati. Nga tulecita ifyo, kuti twaishiba ifyo afwaya ne fyo twingekala ukulingana no kufwaya kwakwe nga fintu asokolola muli Baibolo, bushe te ifyo?

Ubwipusho: Bupusano nshi bwaba pa Bena Kristu ne Nte sha kwa Yehova?

Ubwasuko: Tuli Bena Kristu! Inte sha kwa Yehova tabaitunga fye ukuba Abena Kristu, lelo balesha na maka ukukonka ifyo basuminamo no kucita ifyo Lesa abasambilisha pa kuti banonkelemo. (Esaya 48:17, 18) Apo ifyo basambilisha fyonse fifuma muli Baibolo, balishiba ukuti balikwata icine.—Mateo 7:13, 14, 21-23.

Ubwipusho: Cinshi mulandila na bantu bambi no kufwaya ukubashimikila? Bushe uko te kubapatikisha ukuti bakonke ifyo mwasuminamo?

Ubwasuko: Bushe mwaliba ububi ubuli bonse nga ca kuti umupita nshila amwipusha mutembo mutembo ukuti mumwebeko fimo? (Yeremia 5:1; Sefania 2:2, 3) (Lyene Wojciech na Magdalena balangilile ifyo baleipusha abapita nshila nga ca kuti Lesa alasakamana balya abaculile kuli mulamba wali mu Poland nomba line.) Nga twaumfwa ifyo umuntu alandapo, tumulosha kuli Baibolo. Nga ca kuti talefwaya ukulanshanya, tulamushalikapo mu mutende no kukonkanyapo ulwendo lwesu. (Mateo 10:11-14) Bushe uko kupatikisha abantu ukulanshanya? Nelyo bushe calilubana ku bantu ukulanshanya na bambi?

Ubwipusho: Nga cinshi ico mushisefeshako amaholide?

Ubwasuko: Tusefya fye ubushiku bumo ubo Baibolo yatukonkomesha ukusefya, e kuti Icibukisho ca mfwa ya kwa Yesu Kristu. (1 Abena Korinti 11:23-26) Kuti mwasanga intuntuko ya maholide nga mwabelenga muli encyclopedia e lyo na mu fitabo fimbi ifyalekanalekana. Nga mwacita ifyo mukasanga umulandu tushisefeshako ifya musango yo.—2 Abena Korinti 6:14-18.

Balipwishe amepusho ayengi kabili yonse fye yalyaswikwe. Ukulanshanya kwalikokwele ica kuti takwali no kutamba vidio, lelo bapekenye ubushiku bumbi ukuti e po bakatambe.

Bushe abana be sukulu baumfwile shani? Magdalena alondolola ati: “Napapile ku bana be sukulu bamo, bacintomfwa kabili abalepontela bambi ifyo baleipusha amepusho ya mano. Nangula balaitunga ukuti ni bamukaanalesa, ilyo twalelanshanya abengi balangile ukuti nabasumina muli Lesa!” Abasangilweko balitootele ilyo bapokele ifya bupe—bapokelele ifitabo fyonse ifyali 35, amabroshuwa 63, na bamagazini 34.

Cine cine, mu kulanshanya kwa pa sukulu mwalifumine ifisuma! Uku kulanshanya takwa-afwile fye abasambilila na Magdalena ukwishiba bwino Inte sha kwa Yehova, lelo kwalikoseleshe abacaice abengi ukutontonkanya pa bufwayo bwa bumi. Na iwe kuti waebako abo usambilila na bo pa kuti beshibe bwino ifyo wasuminamo.

[Futunoti]

Yasabankanishiwa ne Nte sha kwa Yehova.

Yasabankanishiwa ne Nte sha kwa Yehova.

[Icikope pe bula 31]

Magdalena na Wojciech balepekanishisha ukulanshanya