Calicila pa Kwangala

ABANA balitemwo kwangala. Icitabo citila The Developing Child cilondolola ukuti: “Ukwangala kwa baice kwalicindama icine cine. E ntendekelo ya kulunduluka konse e lyo no kwishiba ifintu.” Ilyo abana baleangala, balasambilila ifya kubomfya amano yabo, ukwishiba ifyo icalo cabo caba, ne fya kumfwana na bantu bambi.

Ilyo abana bafika pa myaka ine nelyo isano, mu kwangala kwabo balatendeka ukupashanya imilimo ibomba abakalamba. Inshita imo Yesu alandile pa baice abaleangala. Bamo balefwaya ukwangala nga bakwete “ubwinga,” bambi na bo balefwaya ukwangala nga bakwete “amalilo,” kabili nga filya fine abaice bacita, balekansana abene beka pantu bamo tabalefwaya ukwangalako. (Mateo 11:16, 17) Ukwangala kwa musango yu kuti kwalenga umwana uulekula ukwishiba sana imilimo yacindama.

Abaice abali pa fikope, baleangala icangalo ca kwa kasambilisha no musambi wa Baibolo. Apa tabaletungulula isambililo lya Baibolo ilya cine cine, lelo icaba mu mano yabo caba kwebako bambi ubukombe bwa mu Baibolo. Kabili ili lisambililo lyalicindama icine cine, pantu na Yesu akonkomeshe abakonshi bakwe ukupanga abasambi no kusambilisha abantu ukubaka fyonse ifyo abasambilishe.—Mateo 28:19, 20.

Abafyashi bakwata abana abangala amangalo ya kutungulula amasambililo ya Baibolo, ukulanda amalyashi mu kulongana, nangula ukushimikila ku ng’anda ne ng’anda balatemwa. Mu cifyalilwa fye, abaice bakonkelesha ificita abakalamba abo bekala na bo. E ico, ukwangala kwa baice ukwa kubomfya ifyaba muli Baibolo kulangilila ukuti balakushiwa “ne sambilisho no kufunda uko Shikulu atemwa.”—Abena Efese 6:4, Charles B. Williams.

Yehova afwaya abana ukuisansha mu kupepa kwa cine. Aebele Mose ukusanshamo “abaice” ilyo balebelenga Amafunde. (Amalango 31:12) Icikalenga ukuti mwishibe ukuti abana abanono balasanshiwa mu kupepa, myangalile yabo. Kabili umwana uwatemwa ukupashanya umubomfi wa kwa Lesa ninshi kale kale natendeka ukucita ifya kubalilapo ififwaikwa pa kuba umubomfi wa musango yo.