Amepusho Ukufuma ku Babelenga

Ilyo Yesu afundile abakonshi bakwe “ukwashima ukwabula nsonsela, ukwabula ukusubila ukumubwesesha,” bushe aloseshe mu kuti tabafwile fye no kupoka indalama bayashimishe?

Amashiwi ya kwa Yesu ayaba pali Luka 6:35 kuti twayomfwikisha nga twaibukisha Ifunde lya kwa Mose. Muli ili Funde, Lesa aebele abena Israele ukwashimisha indalama ukwabula nsonsela ku bena Israele banabo abapiina nelyo abali mu kukabila. (Ukufuma 22:25; Ubwina Lebi 25:35-37; Mateo 5:42) Uku kwashimisha takwali kwa makwebo nelyo ukwa kufwaya ukusangamo icibwesha. Lelo, kwali kwa kwafwa abapiina nelyo uuli no bwafya. Na kuba, te kuti kube kutemwa ukunonkela pa bupiina bwa umbi. Na lyo line, uuleashimisha indalama aali ne nsambu sha kupoka indalama ayashimishe, kabili limo limo alepoka iciikatilo ku uleashima (pa kuti icipangano cikafishiwepo).—Amalango 15:7, 8.

Ilyo Yesu alekosha ili Funde, alandile inshila na imbi iya kulikonkelamo, ilyo atile uuleashimisha tafwile ukusubila “ukumubwesesha.” Abena Kristu na bo inshita shimo balaba na mafya ya kufilwa ukukumanisha mu mikalile nelyo amafya yambi ayengabasha mu bupiina kwati fye ni filya caleba ku bena Israele. Nga ca kuti Umwina Kristu uuli na yo mafya alomba ubwafwilisho, kuti cawama ukumwafwilisha. Ukutemwa kwa cine cine kuti kwacincisha Umwina Kristu ukwafwa munyina uwaponenwa na mafya yabipisha aya musango yo ayashili ya kuiletelela. (Amapinda 3:27) Kuti cawama no kupeela ubupe kuli munyina uuli mu kukabila kwa musango yo, nangu ca kuti indalama teti shifule nge fyo cali no kuba nga kumukongwesha.—Amalumbo 37:21.

Mu nshiku sha batumwa, umutumwa Paulo na Barnaba bapeelwe umulimo wa kusenda imisangulo yasangwile Abena Kristu ba mu Asia Minor no kutwala kuli bamunyinabo aba mu Yudea umwali cipowe. (Imilimo 11:28-30) Cimo cine e cicitika na lelo. Nga kwaba amafya, ilingi line Abena Kristu balatuma ubupe kuli bamunyinabo abali mu kukabila. Ilyo bacita ico, balacita ubunte busuma kuli bambi. (Mateo 5:16) Kwena, tufwile ukutontonkanya na pa mibele ya ulekabila ukwafwiwa. Cinshi abelele muli uko kukabila? Amashiwi yasosele Paulo yalicindama. Yatila: “Ngo muntu tafwaya kubomba, no kulya elalya.”—2 Abena Tesalonika 3:10.

Nga ca kuti munyina uulefwaya ukwashima indalama tali mu kukabila sana, lelo alefwaya fye ukukongola pa kuti apwishe amafya akwete, kuti caba fye bwino ukumwashimisha ukwabula nsonsela. Nga ca kuti ifintu fili muli uyo musango, ukwashimisha indalama isho mule-enekela ukuti uyo muntu akabwesha, takulepinkana na mashiwi ya kwa Yesu ayaba pali Luka 6:35. Mufwile ukulemba ifyo mwapangana, kabili uwa kongola alingile ukubombesha pa kuti akabweshe indalama ukulingana ne cipangano. Ukutemwa kwa Bwina Kristu kulingile ukucincisha uwakongwele ukubwesha inkongole kwati fye ni filya kwacincishe uwasumina munankwe ukumukongwesha.

Uulefwaya ukukongweshe ndalama (nelyo ukupeelo bupe) na o wine alakabila ukumona ifyo ulupwa lwakwe luli. Ku ca kumwenako, nga ca kuti ayashimisha indalama, bushe kuti alekelesha umulimo wakwe uwa mu Malembo uo alingile ukubomba intanshi, e kutila umulimo wa kusakamana aba mu ng’anda yakwe? (2 Abena Korinti 8:12; 1 Timote 5:8) Lelo kwena, Umwina Kristu afwile ukuba no mutima wa kulanga ukutemwa kuli bambi, te ku mashiwi fye lelo afwile ukucitapo cimo ukulingana fye ne fyo ifishinte fya mu Baibolo filanda.—Yakobo 1:27; 1 Yohane 3:18; 4:7-11.