Ukukonkelela Ifyuma

“Nga ca kuti lyonse tulafwailapo na fimbi, ninshi ifintu tafifula.”—E fyacitile lipoti akabungwe ka Worldwatch Institute.

“FINSHI tufwaya? Tufwaya fyonse fye. Tufifwaya lilali? Apo pene fye.” Aya mashiwi yaliseekele sana ku basambi bamo aba pa koleji muli ba1960. Pali lelo, aya mashiwi tayalandwa, lelo ifyo yalelandapo ficili e po fyaba. Ca cine, ukukonkelela ifyuma kwaba kwati e cishibilo cikalamba ica nshita tuleikalamo.

Ku bengi, ukufwaya ifyuma ne fikwata kusangwike e buyo bwacindama. Pa nshita imo, uwali kale Kateka wa ku United States, Jimmy Carter, atile: “Umuntu nomba teshibikilwa ku fintu acita lelo ku fyo akwata.” Bushe kwaliba ifyuma ifyacindama sana ukucila ifikwatwa? Nga e ko fyaba, bushe ni finshi, kabili kuti fyatunonsha shani?