Bushe Mwalishiba Insansa Shaba mu Kupeela?

NKASHI umo uwa busumino abombele mupepi ne myaka 50 mu mulimo wa Bwina Kristu. Nangu ca kutila ubukote bwamulengele ukunakuka, alefwaisha ukuyamonako Ing’anda ya Bufumu iipya. Uyu nkashi aingile mu Ng’anda ya Bufumu ninshi munyina wa Bwina Kristu namwikata pa kuboko, kabili aleenda fye panono panono ukulungama fye uko alefwaya ukuya, ku kabokoshi ka misangulo. Abikilemo indalama ishinono isho alesunga pa kuti akesesangwilako ku Ng’anda ya Bufumu iipya. Nangu ca kuti tabombeleko umulimo wa kukuula Ing’anda ya Bufumu, alefwaisha ukwafwilishako.

Uyu mwanakashi wa Bwina Kristu kuti alenga mwaibukisha umwanakashi umbi uwa busumino—“mukamfwilwa umupiina” uo Yesu amwene alepoosa mu cipao ce tempele utumakobili tubili utwacepesha. Tatwaishiba ifyo imikalile ya uyu mwanakashi yali, lelo pali ilya nshita cifwile cali icayafya ku mwanakashi uwabulo mulume ukukwata indalama. Kwena Yesu alikatilwe uyu mwanakashi ubulanda, pantu alishibe bwino ukucula kwakwe. Pa kulanga abasambi bakwe ukuti ulya mwanakashi ali ca kumwenako kuli bene, alandile ukuti ubupe bwakwe ubwacepesha bwali e “fyonse ifyo akwete, conse ica miliile yakwe.”—Marko 12:41-44.

Mulandu nshi umwanakashi umupiina ngo yu mukamfwilwa mubusu engacitila ica musango yu? Ni pa mulandu wa kuti aliipeeleshe kuli Yehova Lesa, uo balepepela pali lilye tempele mu Yerusalemu. Nangu ca kuti acitile fye ifinono, alefwaya ukutungilila umulimo washila. Kabili afwile alisekelele sana pa kupeela conse ico akwete.

Ukupeela ku Kutungilila Umulimo wa kwa Yehova

Ukusangula ifikwatwa ne ndalama ukufuma na ku kale kwaba lubali lwacindama ulwa kupepa kwa cine, kabili lyonse kulaleta insansa ishingi nga nshi. (1 Imilandu 29:9) Mu Israele wa pa kale, imisangulo yalebomfiwa ku kuyemfya itempele no kulenga fyonse ifyalecitwa pe tempele ifyakumine ukupepa Yehova fitwalilile. Ifunde lyalilungatike ukuti abana ba kwa Israele bali no kulasangula ica pe kumi pali fyonse ifyo basombola ku kutungilila abena Lebi, abalebomba imilimo ya pe tempele. Lelo abena Lebi na bo bene bali no kusangula kuli Yehova ica pe kumi pa fyo babapeele.—Impendwa 18:21-29.

Nangu ca kuti Abena Kristu balilekele ukukonka ififwaikwa fya mwi Funde lya cipingo, icishinte ca kuti ababomfi ba kwa Lesa balesangula indalama ku kutungilila ukupepa kwa cine  tacayalwike. (Abena Galatia 5:1) Na kabili, Abena Kristu ba pa kubala balesekelela ukusangwila bamunyinabo abali mu kukabila. (Imilimo 2:45, 46) Umutumwa Paulo acinkwileko Abena Kristu ukuti apo Lesa abapeele ifintu ifisuma muli bukapekape bwakwe, na bo bali no kuba bakapekape kuli bambi. Alembele ati: “Konkomesha aba fyuma muli buno bwikashi ukukanayumfwa, nangu kusubila ifyuma ifishingacetekelwa, kano Lesa, uutupeela ifintu fyonse ifya kuti tuleipakisha; ubebe ukucite cisuma, ukuba abakankaala mu milimo isuma, ukuba bakapekape, abaiteyanya ukupako bambi, abaibakila abene umufula usuma uwa ku ntanshi, ku kuleka bekatishe ku bumi ubwine bwine.” (1 Timote 6:17-19; 2 Abena Korinti 9:11) Ca cine, ku fyo umwine aimwenene, Paulo alisumine amashiwi ya kwa Yesu aya kuti: “Mwaba insansa ishingi mu kupeela ukucila ishaba mu kupokelela.”—Imilimo 20:35.

Ukupeela kwa Bena Kristu ba Muno Nshiku

Muno nshiku, ababomfi ba kwa Yehova balitwalilila ukubomfya ifikwatwa fyabo ku kwafwana no kutungilila umulimo wa kwa Lesa. Nangu fye ni balya bashakwata ifingi balasangula ifyo bengakumanisha. “Umusha wa cishinka kabili uwashilimuka” alishiba ukuti akalubulula kuli Yehova e co alabomfya bwino indalama shonse ishisangulwa. (Mateo 24:45) Indalama shilabomfiwa ku milimo ya pa maofesi ya misambo, ukupilibula no kutuma ama Baibolo ne mpapulo shilanda pali Baibolo, ukupekanya ukulongana kukalamba ukwa Bena Kristu, ukukansha no kutuma bakangalila benda na bamishonari, ukupayanya ukukumbusuka ku baponenwa no tuyofi, pamo fye ne milimo yacindama imbi iyalekanalekana. Natulande sana pa mulimo umo—uwa kusangula indalama sha kukuulilamo amayanda ya kupepelamo.

Inte sha kwa Yehova balalongana cila mulungu mu Mayanda yabo aya Bufumu ku kusambilishiwa ifya ku mupashi no kuipakisha ukubishanya kusuma. Na lyo line, mu fyalo ifingi, ubupiina bwalilenga ukuti cafye kuli baNte ukuikuulila Amayanda ya Bufumu ukwabula ukupokelelako ubwafwilisho bwa ndalama. E co, mu 1999, Inte sha kwa Yehova shatendeke programu wa kubomfya Indalama ukufuma ku fyalo fyakwata indalama ukwafwilisha ukukuula Amayanda ya Bufumu mu fyalo ifipiina. Kabinge, aba kuitemenwa abengi sana balipeela inshita yabo no kulamuka, kabili ilingi babombela mu fifulo fya muli filya fyalo ifyabela  ukutali. Ilyo balekuula, baNte ba muli ico calo balasambilila ukukuula ne milimo ya kuwamya, kabili Indalama sha Mayanda ya Bufumu shilabomfiwa ukushita ifisolobelo ne fya kukuulila ifilekabilwa. BaNte ababomfya aya Mayanda ya Bufumu ayapya balatasha nga nshi ukuti abasumina banabo balisangwilileko inshita yabo ne ndalama. Na bo bene balasangwilako cila mweshi ku kuwamya Ing’anda ya Bufumu iipya kabili balafwilisha mu kulipila ishapooselwe pa kukuula, kabili ilyo bacite fyo, balafwilishako ukuti Amayanda ya Bufumu na yambi yakuulwe.

Amayanda ya Bufumu yakuulwa ukubomfya ifya kukuulila no musango wa mikuulile ifya muli ico cine calo. Nangu ca kutila aya Mayanda ya Bufumu tayaba aya lulumbi, yalamoneka fye bwino, kabili yasuma. Ilyo iyi programu ya kukuula Amayanda ya Bufumu yatendeke mu 1999, mu fyalo nalimo 40 ifipiina e mo uyu mulimo wali no kubombwa. Ukutule lyo, programu ya kukuula yalilunduluka kabili mwaba ifyalo 116 ifipiina, umwaba ifilonganino ukucila pali hafu wa filonganino fya Nte sha kwa Yehova ifyaba mwi sonde lyonse. Mu myaka 5 iyapita, Amayanda ya Bufumu ukucila pali 9,000 yalikuulwa, e kuti Amayanda ya Bufumu 5 yalakuulwa cila bushiku! Na lyo line, muli ifi fyalo 116, mucili mulefwaikwa Amayanda ya Bufumu 14,500. Kwi paalo lya kwa Yehova, no kuitemenwa na bukapekape bwa baNte aba mwi sonde lyonse, tulesubila ukuti tukakwata indalama ishikakumana ukukuula aya Mayanda ya Bufumu ayalekabilwa.—Amalumbo 127:1.

Amayanda ya Bufumu Yalalenga Kwaba Ukulunduluka

Bushe uku kubombesha kwalenga caba shani kuli baNte na ku mulimo wa kushimikila mu fyalo umo Amayanda ya Bufumu ayapya yakuulwa? Mu fifulo ifingi, abasangwa ku kulongana balafula icine cine ilyo Ing’anda ya Bufumu iipya yakuulwa. Icicitika ilingi line ni ci cili muli iyi lipoti ya ku Burundi: “Ing’anda ya Bufumu nga yapwa fye ukukuulwa, ilesula na paa. Ku ca kumwenako, Ing’anda ya Bufumu imo yakuulilwe ne cilonganino umwali abantu mupepi na 100 abalesangwa lyonse ku kulongana. Muli iyi Ng’anda ya Bufumu iipya kuti mwaikala abantu 150 nga kwikala fye bwino bwino. Pa nshita yalepwishishiwa, abantu 250 e balesangwa ku kulongana.”

Cinshi kubela ukulunduluka kwa musango yo? Umulandu umo wa kuti amabumba ya bakasabankanya ba Bufumu abashakwata apa kulonganina pene pene lelo abalonganina mwi  samba lya fimuti nelyo mu mabala, inshita shimo balabatunganya. Mu calo cimo, utumabumba twa mapepo utwa musango yo tumonwa kwati tumabumba twa bacipondoka, kabili ifunde lya buteko litila aba mipepele bonse bafwile ukulonganina mu mayanda ya mapepo.

Na kabili, ukuikwatila Amayanda ya Bufumu kulafwako Inte sha kwa Yehova ukulanga aba mu bwikashi ukuti te basambi ba ntungulushi iili yonse iya mapepo. Iofesi lya musambo ilya Nte sha kwa Yehova ku Zimbabwe lyatila: “Kale bamunyina muli iyi ncende balelonganina mu mayanda, kabili abantu ba kuli ilya ncende balemona kwati umwine wa ng’anda balelonganinamo e mwine wa cilonganino. Baleita bamunyina ukuti ba mwi calici lya ba Kantwa. Ifi fyonse nomba filealuka ilyo abantu bamona ifipampa fyalembwa bwino pa Mayanda ya Bufumu yonse ifya kuti ‘Ing’anda ya Bufumu iya Nte sha kwa Yehova.’”

Abape ba Nsansa

Umutumwa Paulo alembele ati: “Lesa atemwo mupe wa nsansa.” (2 Abena Korinti 9:7) Ca cine ukuti imisangulo iikalamba ilabombe fingi. Lelo indalama ishingi ishibomfiwa  ku mulimo wa Nte sha kwa Yehova shifuma mu tubokoshi twa misangulo utuba mu Mayanda ya Bufumu. Imisangulo yonse yalicindama, ibe inono atemwa iikalamba kabili taifwile kusuulwa. Ibukisheni ukuti Yesu alimwene uko mukamfwilwa mubusu asangwile utumakobili tubili utwacepesha. Bamalaika na Yehova na bo bene balimumwene. Tatwaishiba ne shina lya uyu mukamfwilwa, lelo Yehova ashininkishe ukuti ilya ncitilo yakwe iyabulamo akaso ilembwe mu Baibolo, ukulembelwa fye umuku wa limo.

Ukulunda pa kwafwilisha umulimo wa kukuula Amayanda ya Bufumu, imisangulo yesu ilatungilila imilimo yonse iya Bufumu iyacindama. Ukubomba muli iyi nshila kulenga tulesekelela no ‘kufusho kutootela ukwingi kuli Lesa.’ (2 Abena Korinti 9:12) Bamunyinefwe ba Bwina Kristu mu Benin batila: “Cila bushiku amapepo ayengi aya kutasha yalaya kuli Yehova pa mulandu wa bwafwilisho bwa ndalama tupokelela ukufuma kuli bamunyinefwe aba mwi sonde lyonse.” Pa nshita imo ine, bonse fwe batungililako umulimo wa Bufumu pa kupeelako indalama tulaba ne nsansa ishaba mu kupeela kwa Bwina Kristu!

[Akabokoshi ne Cikope pe bula 22, 23]

Ifyo Bamo Basangwilako

IMISANGULO YA MULIMO WA MWI SONDE LYONSE

Abengi balapaatwilako libela, nelyo ukupekanishisha libela indalama isho babika mu tubokoshi twa misangulo utwalembwapo ati “Imisangulo ya Mulimo wa Mwi Sonde Lyonse—Mateo 24:14.”

Cila mweshi, ifilonganino filatuma ishi ndalama ku maofesi ya Nte sha kwa Yehova aya mu calo cabo. Imisangulo ya kuitemenwa iya ndalama na yo kuti yatumwa mu kulungatika ku Watch Tower Bible and Tract Society of Pennsylvania, Akabokoshi 33459, Lusaka 10101. Amacheke yafwile ukulembwapo ukuti abafwile ukupoka indalama ni ba “Watch Tower.” Ifibeekobeeko nelyo ifikwatwa fimbi ifya mutengo na fyo fine kuti fyasangulwa. Kalata umwipi uulelondololo kuti ubu bupe bwa kulungatika, alingile ukutumwa pamo ne yi misangulo.

UKUPEKANYA UKUPEELA MU KUITEMENWA

Ukusansha pa kupeela indalama sha kulungatika, kwalibako inshila na shimbi isha kupeelelamo ku kwafwilisha umulimo wa Bufumu mwi sonde lyonse. Pali isho nshila paba:

Inshuwalansi: Watch Tower kuti yalumbulwa ukuti e ikapoka indalama sha cipangano ca inshuwalansi nelyo ica kuleka incito nangu ukupoka penshoni.

Amaakaunti ya ku Banki: Amaakaunti ya ku banki nelyo amasetifiketi ya ndalama sha kulekelapo incito, kuti fyaseekeshiwa nelyo ukulipilwa ku Watch Tower Society ilyo umwine afwa, ukulingana ne fyo ibanki abikishako indalama lifwaya.

AmaStock na MaBond: Amastock na mabond kuti fyasangulwa ku Watch Tower ngo bupe bwa kulungatika.

Impanga ne Fikuulwa: Impanga ne fikuulwa ifingashitishiwa kuti fyasangulwa ngo bupe bwa kulungatika nelyo, nga ni ng’anda, ukwikatila fye ukufikila umwine afwa. Ipusheni ku maofesi ya Nte sha kwa Yehova aya mu calo cenu ilyo mushilalembesha ifipepala fya buteko ifya kupeelelapo Sosaite impanga ne fikuulwa.

Ifya Cishale no Kuseekesha: Ifipe nelyo indalama ifya cishale kuti fyapeelwa ku Watch Tower Society ukupitila mu fipepala fya cishale ifya mwi funde, nelyo Watch Tower Society kuti yalembwa mu cipangano ca kuseekesha ifipe nelyo indalama. Inshita shimo tabalipilisha imisonko nga ca kuti ifipe nelyo indalama fyaseekeshiwa ku filonganino fya mapepo.

Nga fintu amashiwi ya kuti “ukupekanya ukupeela mu kuitemenwa” yalangilila, uulesangula ukubomfya ishi nshila twalandapo alekabila ukupekanishisha kabela.

Nga mulefwaya ukupeela mu kuitemenwa, mulingile ukwipusha iofesi lya Nte sha kwa Yehova ukupitila mu kulemba nelyo ukutuma lamya ukubomfya akeyala kali pe samba.

Treasurer’s Office

Watch Tower Bible and Tract

Society of Pennsylvania Box 33459, Lusaka 10101

Telefoni: (01) 272062

[Ifikope pe bula 20, 21]

Amayanda ya kulonganinamo aya Nte sha kwa Yehova aya kale na yapya

Mu Zambia

Mu Central African Republic