Bushe Tukatala Atuba no Mutelelwe wa Cine Cine?

ABANTU balatemwa nga bamona abana abali ne nsansa baleangala na bafyashi babo ababatemwa. Abana balomfwa ukuti nabacingililwa bwino sana ilyo bali na bafyashi babo ababasakamana. Nalyo line, abana abengi tabatala abakwatapo inshita ya nsansa iya musango yo. Lelo, abana bamo balasakamikwa fye cila bushiku pantu tabakwata ukwa kulaala. Bushe kwaliba isubilo ilili lyonse kuli aba bana na ku bakalamba bamo abashakwata kwa kwikala, kabili ababulwa umutelelwe?

Nangu ca kuti takumoneka isubilo ilili lyonse, Icebo ca kwa Lesa cena cilatupeela isubilo. Kasesema Esaya asobele ukuti inshita ikesa ilyo bonse bakekala mu mutelelwe wa cine cine. Alembele ati: “Bakakuula amayanda no kwikalamo, bakalima na mabala ya myangashi no kulye fisabo fya yako; tabakakuule na bambi abekalamo, tabakalime na bambi abalyako.”—Esaya 65:21, 22.

Lelo bushe ili subilo kwena kuti lyaba lya cine? Pantu na kuba, ishiwi lya kuti “isubilo” te lyonse lilosha ku cintu icashininkishiwa. Ku ca kumwenako, mu Brazil mwaliba insoselo yaseeka iya kuti: “Isubilo e lilekelesha ukufwa.” E kutila, abantu abengi batwalilila ukuba ne subilo na lintu tapali mulandu wine wine uwa kucitile fyo. Lelo, isubilo ilyo Lesa wa mweo atupeela lyena te fyo lyaba. Umutumwa Paulo alembele ati: “Onse uumutetekela [Lesa] takalengwe nsoni.” (Abena Roma 10:11) Amasesemo ya mu Baibolo ayafishiwapo yatupeela ubushininkisho bwa kuti amalayo yonse ayo Yehova Lesa alaya yakafishiwapo. Ilyo ayo malayo yakafishiwapo, fyonse ifilenga abana ukwikala mu misebo fikapwa.

Nangu fye ni pali ino ine nshita, ukufunda kubomba ukwaba mu Baibolo kuti kwayafwa abashaba ne subilo ukuwamya imikalile yabo kabili kuti basanga umutelelwe wa cine cine. Bushe ico kuti cacitika shani? Inte sha kwa Yehova uko kwine mwikala bakatemwa sana ukumwafwa ukwishiba ifyo mwingacite ci.