Bushe Mulafuluka Isonde Lyabulamo Umwenso?

“Tuleikala mu ‘mwenso no . . . kupelelwa kwa mutatakuya,’ ukulengwa no ‘busanso bushaishibikwa bwino ubwingacitika . . . pa nshita iili yonse kabili mu nshila iili yonse ukwabula ukusoka.’”

AYA mashiwi, aya-ambwilwe umwaka wapwile muli magazini wa Newsweek, yalelangilila ifyo abantu abengi pali lelo bayumfwa ukwikala mwi sonde lya mafya. Yesu Kristu alangilile ukuti ukuyumfwa kwa musango yo kukakulilako ku nshita ya ku ntanshi iipalamine nga nshi. Asobele inshita ilyo kukaba ukukalipwa kwa musango yo ku nko ica kuti tashili na kwishiba inshila ya kufuminamo kabili abantu bakalafwe cipuupu ku mwenso na pa kwenekele fikesapona pa ba pano isonde. Lelo ifwe tatufwile ukuba aba mwenso nelyo abapelelwa, pantu Yesu alandile no kuti: “Ilyo ifi fintu fyatendeka ukucitika, inukeni, no kwinune mitwe, pantu ukulubuka kwenu nakupalama.”—Luka 21:25-28.

Ilyo Yehova Lesa alelondolola ifyo imibele ikaba pe sonde pa numa ya uku kulubulwa kwa bantu bakwe, atile: “Abantu bandi bakekala mu bwikalo bwa mutende, mu mekalo ya mutelelwe, mu fya kutushamo fya cibote.” (Esaya 32:18) Ukubomfya kasesema wakwe Mika, Yehova atile: “Bakekalo muntu onse mwi samba lya mwangashi wakwe, kabili mwi samba lya mukunyu wakwe, tapakabe na wa kututumya.”—Mika 4:4.

Fintu iyi mibele ikapusana ne fyo isonde lyaba ndakai! Takuli ubusanso ubukatiinya abantunse. Ukucila ukuba no mwenso no kupelelwa kwa mutatakuya, kukaba umutende ne nsansa shabule mpela.