Amepusho Ukufuma ku Babelenga
Amepusho Ukufuma ku Babelenga
Ilyo Yesu abuushiwe, cinshi aebele Toma ukumukumya ilyo pa kubala akeenye Maria ukucite co?
AmaBaibolo yamo ayapilibwilwe kale yalenga camoneka kwati Yesu akeenye Maria umwina Magadala ukumukumya. Ku ca kumwenako, muli Baibele wa Mushilo amashiwi ya kwa Yesu yapilibulwa ati: “Winkumya; pantu nshilanina nje kuli Tata.” (Yohane 20:17) Lelo, ishiwi lya ciGriki, ilipilibulwa ilingi line ati “ukukumya,” na kabili lipilibula “ukwikata nelyo ukukumbatila.” Kanshi, Yesu talekaanya Maria umwina Magadala ukumukumyamo fye, pantu alekele abanakashi bambi abali ku nshiishi ‘ukumwikata ku makasa.’—Mateo 28:9.
AmaBaibolo ayengi aya muno nshiku, pamo nga Amalembo ya Calo Cipya, The New Jerusalem Bible, na The New English Bible, yalatwafwa ukumfwikisha umwalola amashiwi ya kwa Yesu pantu yena yatila: “Winjikatamo.” Cinshi Yesu engasosela ifyo kuli Maria umwina Magadala uo baleba nankwe lyonse?—Luka 8:1-3.
Cilemoneka ukuti Maria umwina Magadala afwile ailwike ukuti Yesu ali mupepi no kuya ku muulu. Apo alefwaisha ukuba na Shikulu wakwe, alimwikatishe ukuti eya. Pa kumulenga ukushininkisha ukuti Yesu tali no kuya pali ilya nshita, Yesu aebele Maria ukuleka ukumwikata no kumucincisha ukuyabila ku basambi ba kwa Yesu imbila ya kubuuka kwakwe.—Yohane 20:17.
Lelo, ukulanshanya kwa kwa Yesu na Toma kwena kwalipuseneko. Ilyo Yesu amoneke ku basambi bakwe, Toma talipo. Pa numa, Toma atwishike ukubuuka kwa kwa Yesu, ukusoso kuti kano fye nga amona ifilonda fya kwa Yesu no kubika umunwe wakwe mu lubafu lwacenenwe, e lyo ali no kusumina. Ilyo papitile inshiku 8, Yesu amoneke ku basambi bakwe na kabili. Uno muku Toma e po ali, kabili Yesu amwebele ukumukumya pa filonda.—Yohane 20:24-27.
E ico, kuli Maria umwina Magadala, Yesu alekaanya uwalefwaisha ukuti eya; lelo kuli Toma, Yesu aleyafwa uwaletwishika ukuti aleke ukutwishika. Kuli ifi fyonse, Yesu alishibe bwino sana ico acitiile filya.