Ifyo Tufwile Ukubelenga—Ukupanda Amano Kusuma Ukwa kwa Solomone

“KU KUCITA amabuuku ayengi takuli mpela, no kwetetulamo ukwingi kufunshika kwa mubili.” (Lukala Milandu 12:12) Ilyo Imfumu ya mano Solomone iya ku Israele yalembele aya mashiwi imyaka nalimo 3,000 iyapita, tayalelesha ukubelenga. Lelo, yaleti fye caliwama ukusala ifya kubelenga. Mwandini uku, kufunda kwa pa nshita yalinga pantu pali lelo ifitabo ifingi nga nshi filasabankanishiwa cila mwaka!

Naciilanga fye ukuti “amabuuku ayengi” ayo Solomone alandilepo ni yalya ayashingafwa umuntu nangu panono. E ico, atila ukuipeelesha ku kubelenga aya mabuuku, takulenga uulebelenga ukunonkelamo ku ciyayaya, lelo kuleta ‘ukufunshika kwa mubili.’

Lelo, bushe Solomone aletila takwaba mabuuku umwaba ubutungulushi busuma kabili ubwingashintililwapo? Iyo, pantu alembele no kuti: “Ifyebo fya ba mano fili nge fya kusoswelako, kabili nge nsunga ishapampaminwa bwino kuli bacibinda ba fyebo ifyalonganikwa, ifipeelwa ukufuma kuli kacema umo.” (Lukala Milandu 12:11) Ca cine, kwaliba ifyebo fyalembwa ifingafwa umuntu kwati fye “fya kusoswelako.” Kuti fyalenga umuntu ukuya mu nshila yalungama. Na kabili, “nge nsunga ishapampaminwa bwino,” kuti fyayafwa ukukosha ifyo umo apingulapo kabili kuti mwafume fisuma.

Ni kwi twingasanga ifyebo fya mano ifya musango yo? Ukulingana na Solomone, ifyebo fyacindamisha sana ni filya fifuma kuli Kacema umo, Yehova. (Amalumbo 23:1) Kanshi, icitabo cisuma ico umo engasangamo ifyebo fya mano ifya musango yo ni Baibolo—icitabo capuutwamo na Lesa. Ukubelenga ifi fyebo fyapuutwamo lyonse kuti kwalenga umuntu ukuba “uwaipangasha umupwilapo ku kubomba umulimo onse uusuma.”—2 Timote 3:16, 17.