Ifyo Twingafwaisha Ukwishiba mwi Buuku lya kwa Yoshua
Icebo ca kwa Yehova ca Mweo
Ifyo Twingafwaisha Ukwishiba mwi Buuku lya kwa Yoshua
ILYO abena Israele bacitile nkambi mu Mawanga ya Moabu mu 1473 B.C.E., bafwile balitemenwe sana ukumfwa aya mashiwi: “Ipekanishisheni impao; pantu apo tashilapita inshiku shitatu muleabuka Yordani uyu, ku kwingila ku kukwate calo, ico Yehova Lesa wenu alemupeela ku kucikwata.” (Yoshua 1:11) Ulwendo lwabo ulwa mu matololo umo baendawike pa myaka 40 lwali mupepi no kupwa.
Ilyo papitile myaka ukucila pali 20, Yoshua intungulushi yabo aiminina pa kati na nkati ka calo ca Kanaani no kweba abakalamba ba mu Israele ukuti: “Moneni, ndependwila imwe inko ishi ishashala ku kube cikwatwa ku mikowa yenu, ukutula pa Yordani, ne nko shonse isho nafita, ukufika kuli Bemba mukalamba lubali ukuwa akasuba. Yehova Lesa wenu e ukashitandula ku cinso cenu, no kushipyanununa ku mulola wenu, mukasuke amukwate calo ca shiko, ifyo Yehova Lesa wenu asosele kuli imwe.”—Yoshua 23:4, 5.
Ibuuku lya kwa Yoshua lyalembelwe na Yoshua wine mu 1450 B.C.E., kabili musangwa ilyashi lya kale ilisuma nga nshi ililanda pa fyacitike muli ilya myaka 22. Apo tuli mupepi no kwingila mu calo cipya, inshiku tuleikalamo nashipalana sana na shilya isha bena Israele abali mupepi no kupyana Icalo ca Bulayo. Apo tuli apepi ne calo cipya, natupooseko amano ukubebeta ibuuku lya kwa Yoshua.—AbaHebere 4:12.
MU “MAWANGA YA KU YERIKO”
Yoshua nomba apokelela umulimo wacindama ilyo Yehova amweba ati: “Mose umubomfi wandi alifwa; e ico nomba ima, abuka Yordani uyu, iwe, na aba bantu bonse, ukuya ku calo ico ndepeela kuli bene, ku bana ba kwa Israele.” (Yoshua 1:2) Umulimo wa kwa Yoshua wa kwingisha uluko lwa bantu abengi nga nshi mu Calo ca Bulayo. Pa kuipekanya ukwingila mu calo, atuma inengu shibili ku Yeriko, umusumba bali no kubalilapo ukucimfya. Muli uyu musumba, mwikala cilende Rahabu uwaumfwileko imilimo ya maka Yehova acitiile abantu bakwe. Rahabu acingilila inengu, na bo bamulaya ukuti akapusuka.
Ilyo inengu shabwela, Yoshua na bantu baipekanya ukwabuka Yordani. Nangu ca kuti umumana naupoosa, taubacilikile ukwabuka pantu Yehova alenga amenshi yalefuma ku muulu ukwiminina fye nga yali mu cishiba kabili aleka amenshi yali kwi samba ukuya muli Bemba Wafwa. Ilyo bayabuka Yordani, abena Israele bacite nkambi pa Gilgali mupepi na ku Yeriko. Pa numa ya nshiku shine, mu cungulo pa bushiku bwalenga 14 ubwa mweshi wa Abibu, basefya ica Kucilila mu mawanga ya ku Yeriko. (Yoshua 5:10) Ubushiku bwakonkapo, batendeka ukulya ifisabo fya muli cilya calo, kabili mana yaleka ukupona. Pa nshita yine iyi, Yoshua asembulula abaume bonse abafyalilwe mu matololo.
Amasuko ku Mepusho ya mu Baibolo:
2:4, 5—Cinshi Rahabu abepela abaume bafumine ku mfumu abalefwaya inengu? Rahabu aibika mu kapoosa mweo pa kucingilila inengu pantu nakwata icitetekelo muli Yehova. Kanshi, tali na kusokolola inengu ku baume balefwaya ukwipaya abantu ba kwa Lesa. (Mateo 7:6; 21:23-27; Yohane 7:3-10) Na kuba, Rahabu ‘alungamikilwe ku milimo,’ no mulimo wine uyu uwa kweba abaume bafumine ku mfumu ukulola ku nshila imbi.—Yakobo 2:24-26.
5:14, 15—Nani “mushika wa mulalo wa kwa Yehova”? Mushika uwaisa mu kukoselesha Yoshua pa nshita batendeka ukucimfya Icalo ca Bulayo ni “Cebo”—Yesu Kristu ilyo ashilaba umuntunse. (Yohane 1:1; Daniele 10:13) Ala mwandini tulakoseleshiwa pa kwishiba ukuti Yesu Kristu uwacindamikwa alaba na bantu ba kwa Lesa pali lelo ilyo balwa ubulwi bwa ku mupashi!
Ifyo Twingasambililako:
1:7-9. Ukubelenga Baibolo cila bushiku, ukulaetetula lyonse pa fyo ilanda, no kulacita ifyo tulesambilila kwalicindama pa kuti tutunguluke mu fya ku mupashi.
1:11. Yoshua aeba abantu ukulaipekanisha ifya kulya, na fimbi ifyo balekabila ukucila ukwikala fye no kulalolela ukuti Lesa alabapekanisha. Ukukonkomesha kwa kwa Yesu ukwa kuti mwilasakamikilwe fyo mukabila, pamo no bulayo bwakwe ubwa kuti “ne fi fyonse fikalundwako kuli imwe,” takwalola mu kuti tatufwile ukubombesha pa kuisakamana.—Mateo 6:25, 33.
2:4-13. Ilyo aumfwile imilimo ikalamba iya kwa Yehova no kwiluka ifyo inshita yayafishe, Rahabu asalapo ukuba kuli bakapepa ba kwa Yehova. Nga mwalisambilila Baibolo pa nshita ntali, kabili mwalishiba no kuti tuleikala mu “nshiku sha kulekelesha,” saleni ukubombela Lesa.—2 Timote 3:1.
3:15. Apo inengu ishaile ku Yeriko shaleta ilyashi ilisuma, ilyo line fye Yoshua aima, talolelele ukuti amenshi ya Yordani yacepe. Kanshi, tufwile ukushipa no kubomba imilimo yonse iya kupepa kwa cine, ukwabulo kushingashinga nelyo ukulolela ukuti ifintu fikawame.
4:4-8, 20-24. Amabwe 12 ayo basendele pa kati ka Yordani yali no kuba cibukisho ku bena Israele. Ifyo Yehova alubula abantu bakwe aba muno nshiku ku balwani bakwe na fyo fyaba cibukisho ku bantu bakwe ukuti alaba na bo.
UKUCIMFYA KWATWALILILA
Umusumba wa Yeriko ‘waliisalwa bwino . . . , takuli wa kufumamo nangu wa kwingilamo.’ (Yoshua 6:1) Bushe umusumba kuti wacimfiwa shani? Yehova aeba Yoshua ifya kucita. Mu nshita fye iinono ilinga lyawa kabili umusumba waonaulwa. Rahabu fye na ba mu ng’anda yakwe e bapusuka.
Umusumba wa bufumu uwa Ai e wali no kukonkapo ukucimfiwa. Inengu batumine kulya shatila mu musumba mwaba fye abantu abanono, e co baume fye abanono balekabilwa ukucimfya uyu musumba. Lelo, ifita mupepi na 3,000 ifyatuminwe ku kusansa umusumba fyafulumuka abaume ba mu Ai. Cinshi calenga? Yehova tali na bena Israele. Akani uwa mu mukowa wa kwa Yuda alibembwike ilyo balesansa Yeriko. Ilyo bapwisha ubu bwafya, Yoshua asansa Ai. Apo imfumu ya Ai yalicimfishe abena Israele umuku wafumineko, ili iyaipekanya ukubalwisha. Lelo Yoshua abomfye nshila iisuma sana iyabeleleka abaume baicetekela aba mu Ai kabili apoka umusumba.
Gibeone ‘mushi ukalamba sana ukucila Ai, na baume bonse ba uko ni mpalume.’ (Yoshua 10:2) Lelo, ilyo baumfwile ifyo Israele acimfishe Yeriko na Ai, abaume ba mu Gibeone babepa Yoshua kabili acita icipangano ca mutende na bo. Inko shapalamina na bo shatiina ilyo shaumfwa ukuti nabacita icipangano na bena Israele. Kabili ishamfumu 5 isha muli shilya nko shaumana akapi no kusansa Gibeone. Abena Israele bapususha abena Gibeone no kucimfya shilya nko. Pa misumba Israele acimfishe ilyo Yoshua ali intungulushi paba imisumba ya ku kapinda ka ku kulyo na ku masamba, pamo fye ne shamfumu shaumene akapi isha ku kapinda ka ku kuso. Ku masamba ya Yordani, ishamfumu shonse pamo ishacimfiwe shali 31.
Amasuko ku Mepusho ya mu Baibolo:
10:13—Bushe icipesha amano ca musango yu cacitike shani? “Bushe kuli cintu icingapesha Yehova amano,” Kalenga wa myulu ne sonde? (Ukutendeka 18:14) Yehova nga atemwa kuti acita ico alefwaya ku kushinguluka kwe sonde pa kuti umuntu uuli pe sonde engamona kwati akasuba no mweshi tafile-enda. Nelyo kuti aleka isonde no mweshi fileshinguluka filya fine fishinguluka no kulenga fye ulubuuto lwa kasuba no mweshi ukubalika isonde lyonse. Nangu ca kuti tatwaishiba ico acitile, ‘takwatala akuba ubushiku ubwaba nga bulya.’—Yoshua 10:14.
10:13—Bushe ibuuku lya kwa Yashari libuuku nshi? Ili buuku lyalilumbulwa na kabili pali 2 Samwele 1:18 apaba amashiwi ayalanda pa mushikakulo witwa ‘ulwimbo lwa bulanda’ ulwa pali Shauli Imfumu ya Israele no mwana wakwe Yonatani. Ili buuku nalimo lyalembelwemo inyimbo ne mishikakulo yalekanalekana ifyalecitika mu Israele kale kabili lifwile lyalishibikwe sana ku baHebere.
Ifyo Twingasambililako:
6:26; 9:22, 23. Icitiipu ico Yoshua asosele ilyo Yeriko yaonawilwe cafishiwapo ilyo papita imyaka nalimo 500. (1 Ishamfumu 16:34) Icitiipu ca kwa Noa pa mwishikulu wakwe Kanaani cafishiwapo ilyo abena Gibeone baba abasha. (Ukutendeka 9:25, 26) Lyonse icebo ca kwa Yehova cilafishiwapo.
7:20-25. Bamo kuti batontonkanya ukuti icilubo Akani acitile tacakulile sana, nalimo kuti balanda fye no kuti tacalengele bambi ukuculilamo. Kuti balamona no kuti tacabipa ukwiba utuntu tumo nelyo ukucita ifilubo fimo ifimoneka nge finono ifyo Baibolo yalesha. Lelo, ifwe, tufwile ukuba nga Yoshua ukupampamina pa kukaana ifyabipa.
9:15, 26, 27. Tufwile ukucindika no kufishapo ifyo twasuminishanya.
YOSHUA ATENDEKA UKUBOMBA UMULIMO WAKWE UWACINDAMA UWA KULEKELESHA
Apo Yoshua nomba nakota, alebutukila ku myaka 90, atendeka ukwakanya impanga. Mwandini uyu mulimo uukalamba! Aba mu mukowa wa kwa Rubene na Gadi na hafu wa mukowa wa kwa Manase bena balipoka kale ubupyani bwabo ku kabanga ka Yordani. Aba mu mikowa yasheleko na bo nomba bapeelwa ubupyani bwabo ku masamba ya Yordani pa kupendula.
Ica kwikalamo ica kwa Yehova caimikwa mu Shilo mu mpanga ya kwa Efraimu. Kalebu apeelwa umusumba wa Hebrone, e lyo Yoshua ena abula umusumba wa Timnati-sera. Abena Lebi bapeelwa imisumba 48, pamo ne misumba ya kushinamo 6. Ilyo balebwelelamo ku bupyani bwabo ku kabanga ka Yordani, ifita fya kwa Rubene, Gadi, ne fya muli hafu wa mukowa wa kwa Manase bakuula iciipailo ‘icikalamba mu kumona.’ (Yoshua 22:10) Imikowa yali ku masamba ya Yordani yamona kwati ubu busangu, kabili ubulwi bwati bwime pa kati ka mikowa, lelo ukulanshanya bwino kwalenga ukuti kwiba ukusumya umulopa.
Pa numa ya kwikala mu Timnati-sera pa myaka imo, Yoshua alonganya abaume abakalamba, bakasomo, abapingushi, na bacilolo ba mu Israele no kubeba ukuti bafwile ukushipa no kutwalilila aba cishinka kuli Yehova. Pa numa, Yoshua alonganya imikowa yonse iya kwa Israele ku Shekemu. Apituluka mu fyo Yehova acitile ukutula pali Abrahamu ukufika na mu nshiku shabo, kabili abwekeshapo ukubakonkomesha ‘ukubela Yehova akatiina, no kumubombela muli bumpomfu na mu cishinka.’ Kabili abantu bayankula abati: “Yehova Lesa wesu e o tulebombela, kabili kwi shiwi lyakwe e ko tuleumfwa.” (Yoshua 24:14, 15, 24) Pa numa ya ifi, Yoshua afwa ne myaka 110.
Amasuko ku Mepusho ya mu Baibolo:
13:1—Bushe ifyaba pali ici cikomo tafipinkana ne fyaba pali Yoshua 11:23? Iyo, pantu bali no kucita ifintu fibili pa kupoka Icalo ca Bulayo: ica kubalilapo ca kuti uluko lonse ulwa bena Israele lwacimfishe ishamfumu 31 isha mu Kanaani no kunasha abena Kanaani. Kabili imikowa no muntu umo umo na bo bali no kuipokela abene impanga muli cilya calo. (Yoshua 17:14-18; 18:3) Nangu ca kuti abana ba kwa Israele tabatamfishemo abena Kanaani bonse muli cilya calo, abapuswike tabakwete amaka yakwimina abena Israele. (Yoshua 16:10; 17:12) Pali Yoshua 21:44 patila: “Yehova alengele kube ukutusha kuli bene ukushinguluka.”
24:2—Bushe Tera, wishi wa kwa Abrahamu, alepepa utulubi? Pa kubala Tera talepepa Yehova Lesa. Afwile alepepa lesa mweshi Sini—lesa balepepa sana mu musumba wa Uri. Ukulingana no lutambi lwa baYuda, Tera nalimo alepanga fye no tulubi. Lelo, lintu Abrahamu aumfwila ifyo Lesa amwebele ukuti afume mu Uri, Tera amukonka ku Harani.—Ukutendeka 11:31.
Ifyo Twingasambililako:
14:10-13. Nangu Kalebu ali ne myaka 85, alomba ukubomba umulimo wakosa uwa kucimfya aba mu citungu ca Hebrone. Muli ici citungu mwikala abena Anaki—abaume abatulushi. Apo Yehova alemwafwa, uyu mwaume waishibisha ukulwa acimfya, kabili Hebrone aba mushi wa kushinamo. (Yoshua 15:13-19; 21:11-13) Ukushipa kwa kwa Kalebu kutucincisha ukukanabutuka imilimo ya ku mupashi iyakosa.
22:9-12, 21-33. Tatufwile ukutunganya bambi ukwabulo kwishiba umulandu nelyo ifishinka.
“Takwashala Cintu Nangu Cimo”
Ilyo Yoshua akota, aeba abakalamba ba mu Israele ukuti: “Takwashala nangu cimo ca mu fintu fyonse fisuma ifyo Yehova Lesa wenu asosele ulwa imwe; fyonse fyalimoneke kuli imwe.” (Yoshua 23:14) Mwandini ilyashi lya mwi buuku lya kwa Yoshua lilalangilila bwino bwino ukuti ca cine takwashele nangu cimo ica mu fintu fyonse fisuma ifyo Yehova asosele!
Umutumwa Paulo alembele ukuti: “Fyonse ifyalembelwe libeela fyalembeelwe ku kutufunda, ukuti mu kushipikisha kwesu na mu kusansamusha ukufuma mu Malembo tube ne subilo.” (Abena Roma 15:4) Na ifwe twalicetekela ukuti tatwaluba pa kusubila mu malayo ya kwa Lesa. Takwakashale ubulayo nangu bumo ubushakafishiwepo; yonse yakafishiwapo.
[Mapu pe bula 10]
(Nga mulefwaya ukumona mapu, moneni muli magazini)
Ifyalo fyacimfiwe ilyo Yoshua ali intungulushi
BASHANI
GILEADI
ARABA
NEGEBU
Umumana wa Yordani
Bemba wa Mucele
Umumana wa Yaboke
Umumana wa Arnone
Hasore
Madone
Lasharone
Shimrone
Yokeneamu
Dore
Megido
Kedeshe
Taanaki
Hefere
Tirsa
Afeke
Tapua
Betele
Ai
Gilgali
Yeriko
Gesere
Yerusalemu
Makeda
Yarimuti
Adulamu
Libna
Lakishi
Egelone
Hebrone
Debiri
Aradi
[Icikope pe bula 9]
Bushe mwalishiba umulandu Rahabu cilende alungamikilwe?
[Icikope pe bula 10]
Yoshua akonkomeshe abena Israele ‘ukubela Yehova akatiina, no kumubombela’
[Icikope pe bula 12]
Ubupupu bwa kwa Akani tabwali mulandu uunono, na bantu bambi balifwililemo
[Icikope pe bula 12]
‘Ni ku citetekelo e ko ilinga lya Yeriko lyawilile.’—AbaHebere 11:30