Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Nga e fyo cali, moneni nga kuti mwayasuka amepusho yakonkapo:

• Bushe Umwina Kristu kuti acita shani nga apomponteka lwa ku mupashi na mu nkuntu?

Tufwile ukwishiba icilelenga ukuti tupomponteke. Kuti cawama ukulemba ifyo twatemwa ukucita ne fyo twakwata, lyena no kufumyapo ifishilekabilwa. Kuti twaimika amabuyo ayo twingakumanisha ukubomba. Calicindama ukusakamana bumupashi bwesu kabili tulingile ukucite ifi ukupitila mu kupepa lyonse no kwetetula.—8/15, amabula 23-6.

• Mulandu nshi Inte sha kwa Yehova basuminina ukuti impendwa 144,000 ya cine cine?

Ilyo umutumwa Yohane bamwebele pa mpendwa ya 144,000, amwene ibumba na limbi, “ibumba likalamba, ilishingapendwa ku muntu nangu umo.” (Ukusokolola 7:4, 9) Nga ca kuti impendwa ya 144,000 yali ya mampalanya, teti pabe ubupusano bwine bwine pali ishi mpendwa shibili. Yesu alandile pa bakateka na wena ukuti “mukuni unono.” (Luka 12:32)—9/1, ibula 30.

• Cinshi umwina Israele engashitishisha inama yaifwila kuli umbi umbi iyo wena ashingalya?

Umbi umbi nelyo umulebeshi uushali insangu tali pe samba lye Funde. Kanshi umwina Israele alisuminishiwe ukupeela nelyo ukushitisha inama ya musango yo kuli umbi umbi. (Amalango 14:21) Lelo, insangu yalikakililweko ku cipingo ce Funde kabili umuntu wa musango yo teti alye umulopa wa nama yaifwila. (Ubwina Lebi 17:10)—9/15, ibula 26.

• Finshi filanga ukuti abantu ilingi bapashanya ku fyabako kale pa kupange fintu, kabili cinshi Abena Kristu balingile ukupooselako amano?

Ku ca kumwenako Wilbur Wright na munyina Orville Wright bapangile indeke pa numa ya kusoma ifyo ifyuni ifikalamba fipupuka. Kanshi ukupoosa amano kuli ifi fyonse kuti kwalenga Umwina Kristu ukucindika Kabumba.—10/1, ibula 9

• Umwaume walumbulwa pali 2 Abena Korinti 12:2-4 uwaulwilwe ku paradaise nani?

Paulo alandile aya mashiwi ilyo apwile fye ukupeela ifishinka fya kulanga ukuti aali mutumwa wa cine. Apo Baibolo tayalandapo pa muntu umbi uwaulwilwe ku paradaise muli uyo musango, kabili Paulo e walandile ukuti calicitike, kanshi afwile ukuba ni Paulo wine e wamwene ici cimonwa.—10/15, ibula 8.

• Mibele nshi imo Yesu akwete iyamulenga ukube Ntungulushi yafikapo iyasontwa na Lesa?

Yesu atwalilile ukuba na bucishinka, ali mufumacumi, kabili imibele yakwe yali iyatambalala. Ali uwaipeelesha kuli Lesa. Yesu alesakamana sana abantu kabili aleitemenwa ukubomba.—11/1, amabula 6-7.

• Mu Kuteka kwa Myaka Ikana Limo, ni kwi kukaba ifibanda?

Kuti twasondwelela ukuti mu Kuteka kwa Myaka Ikana Limo Ukwa kwa Kristu, ifibanda fikakakwa no kupooswa mu muyenge pamo na Satana. (Ukusokolola 20:1-3) Pa Ukutendeka 3:15 paba ukusesema ukulanda pa kulasa icisoka ku mutwe, ici cisanshamo no kupooswa kwa ciko mu muyenge pa Myaka Ikana Limo. Mu bufyashi bwa kwa Satana mwaba na bamalaika babipa, nelyo ifibanda. Icishinka ca kuti imipashi ibifi yaliba no mwenso sana uwa kupooswa mu muyenge cilanga ukuti yalishiba ukuti pa nshita imo ku ntanshi, ikaleka ukubomba. (Luka 8:31)—11/15, amabula 30-1.

• Mulandu nshi umuntu alingile ukubela uwacenjela pa kunwa ubwalwa, nangu line abantu bambi te kuti beshibe no kwishiba ukuti nanwisha?

Abantu bamo nangu nabanwa sana ubwalwa tabamoneka ukuti nabakolwa. Lelo, mu kuya kwa nshita, kabili panono panono, uwa musango yo kuti atendeka ukumfwa umubili ububi nga tanwine kabili kuti aba ‘uwatekwo busha ku mwangashi uwingi.’ (Tito 2:3) Yesu asokele ukukanaleka ‘imitima ukufinininwa ku buliili no kukolwakolwa.’ (Luka 21:34, 35) Te kutila kano fye umuntu aba cakolwa e lyo engatendeka ukushinshila no kumfwa ubunang’ani, lwa ku mubili na lwa ku mupashi.—12/1, amabula 19-21.