‘Nalitemwa pa Kukanshiwa Bwino’

KAZUNA umukashana wacaice, alipapile ilyo kafundisha amwebele ukuti akailunde ku bwangalo bwa kucimfyanya mu kulanda amalyashi pa lwalala mu ciNgeleshi. Amasukulu yonse aya ku sekondari aya pa cishi cikalamba ica Hokkaido, ku kapinda ka ku kuso aka Japan yali no kucimfyanyako, lelo isukulu lyabapo Kazuna talyatala alitumako uwa kubemininako. Pa bushiku bwa kucimfyanya, Kazuna aumfwile umwenso icine cine pantu ali no kucimfyanya na bana be sukulu bambi 50. Umwenso walicililemo ilyo amwene abaume babili abaNgeleshi abali no kuceceta imilandile ya balecimfyanya.

Lyene, batendeke ukubilisha abacimfishe, ukubalilapo na bapokele ifilambu finono. Mu kulekelesha ilyo bamupundile ishina, Kazuna alipapile cine cine. Wena na kafundisha wakwe uwaikele mupepi nankwe, baloleshenye mu kupapushiwa. Ninshi nacimupesha amano, Kazuna aile pa cisebele no kupoka icilambu cakwe—icilambu cikalamba!

Kazuna mu nsansa alondolola ukuti: “Napokele ici cilambu pa mulandu wa kukansha kwaba mu kuteyanya kwa kwa Yehova ukupitila mwi Sukulu lya Butumikishi ilya Bulesa. Nalitemwa nga nshi pa kukanshiwa bwino.” IIi sukulu lyasambilisha Kazuna ukutula fye ku bwaice lyaba pa kulongana kwa mu filonganino ukwa Nte sha kwa Yehova. Ilyo Kazuna alepekanya uku kucimfyanya, alipooseleko sana amano ku kubomfya icisoselo, ukulanda mu cikabilila na mu kucincimuka, ukubomfya umubili pa kulanda, no kulalolesha ibumba, na fimbi fye ifyo asambilila mwi Sukulu lya Butumikishi ilya Bulesa.

Mukwai na imwe kuti mwaisamona ifyo ili sukulu litungululwa, libako cila mulungu pa Ng’anda ya Bufumu iya Nte sha kwa Yehova iyabela mupepi no ko mwikala. Mukeseimwena ifyo abaice pamo na bakalamba banonkelamo. Abantu fye bonse kuti basangwako. Nga ca kuti mulefwaya ukwishibilapo na fimbi pali ili sukulu, mukwai ipusheni Inte sha kwa Yehova ishaba kuntu mwikala.