Ukufyalwa Uko Tulingile Ukwibukisha

“Leelo mu musumba . . . namufyalilwa imwe Umupusushi, uyu e Kristu Shikulu.”—Luka 2:11.

IMYAKA mupepi na 2,000 iyapita, umwanakashi umo mu musumba wa Betelehemu afyele umwana mwaume. Bekashi fye abanono aba muli ulya musumba e baishibe ifyo uku kufyalwa kwacindame. Lelo bakacema bamo, abaikele mu mpanga balelinda imikuni yabo ubushiku, bamwene umulalo wa bamalaika kabili baumfwile ulelumbanya Lesa auti: “Kube ubukata kuli Lesa mu myulu iyasansama, na pe sonde pabe umutende mu bantu abo abekelwamo.”—Luka 2:8-14.

Bakacema lyene bailesanga Maria no mulume wakwe, Yosefe, mwi tanga nge fyo bamalaika balandile. Maria ainike umwana ati Yesu, kabili amubikile mu mulimba uwali mwi tanga. (Luka 1:31; 2:12) Nomba palipita ne myaka 2,000, lelo kwaba fye abantu abanono abaitunga ukukonka Yesu Kristu. Kabili ifyacitike ilyo Yesu afyelwe fyalenga kwaba ilyashi nalimo ililandwapo libili libili ukucila amalyashi yambi ayacitika ukutula kale.

Mu calo ca Spain, umo bakonka sana intambi sha baKatolika kabili umo balamuka sana mu kusefya intambi, mwabe nshila ishingi isha kusefeshamo cilya cungulo cacindeme mu Betelehemu.

Ifyo Basefya Krisimasi mu Spain

Ukutendeka mu myaka ya ba1200, ifikope ne fipasho fya bantu abaliko ilyo Yesu afyelwe ni fimo ifyo abena Spain babomfya sana mu kusefya kwabo. Indupwa ishingi balacita icisela ca kwa Yesu ninshi na bamulaalika mu mulimba. Ifipasho fye buumba filanga bakacema na baMagi (nelyo “ishamfumu shitatu”), ukusanshako na Yosefe, Maria na Yesu. Ilingi line, mu nshita sha Krisimasi balabika ifikope ne fipasho ifikulu kwati fye bantu abatuntulu mupepi ne fikuulwa fikalamba ifya mu misumba. Batila Francis uwa ku Assisi e watendeke ulu lutambi mu Italy pa kuti afwilishe abantu ukupoosa mano ku Malandwe ayalanda pa kufyalwa kwa kwa Yesu. Pa numa abashimbe ba fya mapepo abena Francis baletele ulu lutambi mu Spain na mu fyalo fimbi ifingi.

Mu Spain ilyo balesefya Krisimasi, icacindama sana muli uku kusefya ni baMagi. Mu fyalo fimbi abapala kuli baMagi ni Father Krisimasi. Batunganya ukuti baMagi bapeela ifya bupe ku bana mu Spain pa January 6, Día de Reyes (Ubushiku bwa Shamfumu), nga filya abantu bonse basumina ukuti baMagi batwele ifya bupe kuli Yesu ilyo afyelwe. Na lyo line, banono baishiba ukuti Amalandwe tayalanda impendwa ya baMagi abatandalile Yesu. Amalandwe tayalanda ukuti bali shamfumu lelo baishibikwa bwino bwino ukuti ni bakapendula wa ntanda. * Na kabili, pa numa ya kutandala kwa baMagi, Herode aipeye abana baume bonse mu Betelehemu “ukwambila pa ba myaka ibili na bacepeleko” pa kuti fye  engepaya Yesu. Ifi fyalangilila ukuti ukutandala kwa baMagi kwacitike pa numa ninshi Yesu alifyalwa kale.—Mateo 2:11, 16.

Ukutendeka mu myaka ya ba1100, mu misumba imo mu Spain balatambisha icisela icilangilila ukufyalwa kwa kwa Yesu, ukusanshako na bakacema abatandalile Betelehemu ne fyo baMagi bailetandala. Shino nshiku, mu misumba ya mu Spain lyonse pa January 5, “ishamfumu shitatu” shilanina muli motoka uwayemfiwa bwino uuya ulepita mu kati ka musumba, uku ninshi shilepeela na ma switi ku baletamba. Ifimuti ne fibekobeko ifyo bakobaika pa Krisimasi na villancicos (nyimbo shilanda pali Krisimasi) filalenga aka kashita ukuwama.

Indupwa ishingi isha mu Spain shalitemwa ukukwata umulalilo waibela pa 24 December ukutangilila ubushiku bwa Krisimasi. Ifya kulya ifyo batemwa sana ukulya muli iyi nshita ya Krisimasi ma turrón (amaswiti ayapangwa ku buci na almone), marzipan, fisabo fyauma, impaanga iyaocewa, ne fya kulya fya muli babemba. Aba mu lupwa nelyo fye bantu bekala ukutali bonse balaipamfya ukwisasangwa pamo kuli uku kusefya. Mu kusefya kumbi, uko baliila pamo ica kulya, ukubako pa January 6, ulupwa lulalya roscón de reyes, e kutila keke wabulungana uwa “Shamfumu” uukwata ka sorpresa (akantu kamo) ako bafisa mu kati. Pa nshita abena Roma bali mu maka ukusefya kwapalako kwalecitwa kabili kwalelenga umusha uwalepeelwa iciputulwa ca keke umo bafishile kalya kantu ukube “mfumu” pa bushiku fye bumo.

“Inshita ya Nsansa Kabili iya Kupamfiwa Sana mu Mwaka”

Te mulandu ne ntambi shimbi ishabako pali nomba, mwi sonde fye lyonse Krisimasi e yo basefya sana ukucila icili conse cimbi. Icitabo ca The World Book Encyclopedia citila: “Mwi sonde lyonse fye, pa Krisimasi e nshita ya mwaka ilyo Abena Kristu abengi na bashili Bena Kristu baba ne nsansa no kupamfiwa sana.” Bushe kuti mwatila ukusefya kwa musango yo kusuma?

Ca cine ukufyalwa kwa kwa Yesu kwalicindama sana mu lyashi lya buntunse. Filya bamalaika bakulumbenye ukuti kwali cishibilo ca ‘mutende mu bantu abo Lesa abekelwamo,’ kushininkisha ukuti ukufyalwa kwa kwa Yesu kwalicindama.

Juan Arias, kalemba wa lyashi uwa ku Spain, atile: “Mu nshita UbuKristu bwatendeke, tabalesefya ukufyalwa kwa kwa Yesu.” Kanshi nga ca kuti e fyo cali, ukusefya Krisimasi kwafumine kwi? Ni nshila nshi iisuma iya kwibukishishamo ukufyalwa kwa kwa Yesu no bumi bwakwe? Mwalasanga amasuko mu cipande cikonkelepo.

[Futunoti]