Amepusho Ukufuma ku Babelenga

Amalumbo 102:26 yatila isonde ne myulu “fikaloba.” Bushe aya mashiwi yalola mu kuti Isonde likonaulwa?

Ilyo alepepa kuli Yehova, uwaimbile amalumbo atile: “Ku kale mwalimbile pano isonde, kabili imyulu mulimo wa minwe yenu; fyena fikaloba, lelo imwe mukalabelelela, awe, fyonse fiine fikafumuka nge laya; mukafitesha nge ca kufwala, e lyo fikateseshiwapo.” (Amalumbo 102:25, 26) Nga twamona ico uwaimbile amalumbo alelandapo, tusanga ukuti talelanda pa kutila isonde likonaulwa, lelo ico ena alelandapo ca kuti Lesa wa muyayaya. Na kabili, ukumona ico uwaimbile amalumbo alelandapo, kulalenga twaishiba no mulandu ababomfi ba kwa Lesa bengatemenwa sana ukutontonkanya pa cishinka ca kuti Lesa wa muyayaya.

Uwaimbile amalumbo, nakalimo aali muli bunkole ku Babele, pa kutendeka fye alanda pa fyo umwine aalecula. Ailishanya ukuti ubumi bwakwe bwali “nge cushi.” Aleumfwa sana umubili ububi ku mulandu wa masakamika, na mu mafupa yakwe ‘mwalelungula nge cishishi icilelikuka.’ Alinakile icine cine, no ‘mutima wakwe walokwete nge cani,’ kabili tapali wa kumusansamusha. Aali “nge cuni icaba ceka pa mutenge.” Amacushi yalengele ukuti alefilwa no kulya, aleikala uwa nkumbabulili umo shacela. (Amalumbo 102:3-11) Nangu alecula ifyo, uwaimbile amalumbo alishele ne subilo. Mulandu nshi? Pa mulandu wa fyo Yehova alaile ukucitila Sione nelyo Yerusalemu.

Nangu ca kutila Sione alyonawilwe, Yehova alilaile ukuti akakuulwa cipya cipya. (Esaya 66:8) E co uwaimbile amalumbo alandile ne citetekelo kuli Yehova ukuti: “Mukacita Sione inkumbu; pantu ni nshita ya kumusenamina, pantu yaise nshita iyalingilwe: ilyo Yehova akakuula Sione.” (Amalumbo 102:13, 16) Lyena, uwaimbile amalumbo abwelela ku lyashi lyakwe ilya kulanda pa fyo aalecula. Atontonkanyo kuti, kwena, nga ca kutila Yerusalemu uwashala amapopa kuti akuulwa cipya cipya ku maka ya kwa Lesa, ninshi Yehova wine kuti amwafwa na mu bulanda bwakwe. (Amalumbo 102:17, 20, 23) Nomba kuli na cimbi icalengele sana ukuti uwaimbile amalumbo acetekele Yehova icine cine. Cinshi ico? Ca kutila Lesa wa muyayaya.

Yehova wa muyayaya, kanshi tapali na po twingatendekela ukumulinganya ku bumi ubwipi ubwa kwa kemba wa malumbo. Uwaimbile amalumbo alanda pali Yehova ati: “Mu nkulo ya shankulo e mwabe myaka yenu.” (Amalumbo 102:24) Na kabili atila: “Ku kale mwalimbile pano isonde, kabili imyulu mulimo wa minwe yenu.”—Amalumbo 102:25.

Na lyo line, nangu ca kutila imyulu ne sonde fyalikokola nga nshi, te kuti tufilinganye ku myaka ya kwa Yehova. Uwaimbile amalumbo atila: “Fyena [e kutila isonde ne myulu] fikaloba, lelo imwe mukalabelelela.” (Amalumbo 102:26) Umuulu ne sonde kuti fyaonaika. Ca cine ukuti mu malembo yambi Yehova alilanda ukuti fikekala umuyayaya. (Amalumbo 119:90; Lukala Milandu 1:4) Lelo kuti fyaonaika nga ca kutila Lesa afwaya ukuti fyonaike. Nomba Lesa ena te kuti afwe. Ifibumbwa fyonse ‘fibelelela’ pa mulandu wa kuti Lesa alafisunga. (Amalumbo 148:6) Nga ca kutila Yehova aleka ukusunga ifibumbwa, ninshi ‘fyonse fiine kuti fyafumuka nge laya.’ (Amalumbo 102:26) Nga filya ifya kufwala fisapuka umwine ashala, e fyo na Yehova engekala ukucila ifibumbwa fyakwe, nga alefwaya ukucite co. Nomba, amalembo yambi yalatweba bwino bwino kuti uko te kufwaya kwakwe iyo. Icebo ca kwa Lesa calilanda bwino bwino ukuti imyulu ne sonde fikekalilila umuyayaya.—Amalumbo 104:5.

Tulatemwa sana ukwishiba ukuti Yehova akekalilila umuyayaya pa kuti akacite fyonse ifyo alaya. Mu bucushi bonse fye ubwingesa pali ifwe, nga twalilila kuli ena, tukacetekela icine cine ukuti “akaalukila kwi pepo lya wabulwa, kabili takasuule ipepo lyabo.” (Amalumbo 102:17) E ico kanshi, Amalumbo 102 yatweba bwino bwino ukuti Yehova alatusakamana ukucila ne fyo isonde twikalamo litungilila ubumi bwesu.