‘Icebo Ifyo Cawama mu Nshita Iiyene Iya Ciko!’
‘Icebo Ifyo Cawama mu Nshita Iiyene Iya Ciko!’
ILYO baali pa kulongana kukalamba ukwa Nte sha kwa Yehova akasuba konse, baKim balyeseshe sana na maka ukukutika ku malyashi no kulemba ifishinka, kabili ninshi uku balesakamana umwana wabo umwanakashi uwali ne myaka ibili na hafu ukuti ekale tondolo. Ilyo ukulongana kwapwile, nkashi wa Bwina Kristu uwaikele mupepi na baKim apilibukile kuli bene no kubatasha ukufuma pa nshi ya mutima pa fyo bena na bena mwabo basakamene umwana wabo ilyo balelongana. Yalya mashiwi ya kutasha yali ayacindama sana kuli baKim ica kuti na ino ine nshita, nangu palipita ne myaka iingi, basoso kuti: “Nga naumfwa ukunaka ilyo ndi pa kulongana, njibukisha amashiwi nkashi ulya anjebele. Amashiwi yakwe ayasuma yacili yalankoselesha ukutwalilila ukusambilisha umwana wesu.” Ca cine, amashiwi ya pa nshita iiyene yalakoselesha. Baibolo itila: “Icebo, ifyo cawama mu nshita iyene ya ciko!”—Amapinda 15:23.
Nomba fwe bamo, ukutasha bambi kuti kwatukosela. Limo, ukwishiba ukuti tatubomba bwino muli fimo kulalenga cayafya ukutasha bambi. Umwina Kristu umo atila: “Nga ndetasha sana bambi, ndaimona ukuba uwa cabe cabe, e lyo njimona sana uwa pa nshi.” Ifintu pamo nge nsoni, ukukanaicetekela, nangu umwenso wa kuti abo twalatasha balalosha mumbi kuti fyalenga cayafya ukutasha bambi. Na kabili, nga ca kuti ilyo twali abaice tabaletutasha nangu nga baletutasha fye limo limo, kuti catukosela ukutasha bambi.
Na lyo line, ukwishiba ukuti ukutasha kulaleta ubusuma ku uletasha no uletashiwa, kuti kwalenga twabombesha ukutasha bambi pa nshita iiyene. (Amapinda 3:27) Nomba busuma nshi bwaba mu kutasha bambi? Natulande pa busuma bumo mu kwipifya.
Ubusuma Bwaba mu Kutasha Bambi
Ukutasha bambi mu nshila isuma kulalenga baicetekela. Elaine, Umwina Kristu uwaupwa, atila: “Abantu nga bantasha, ndomfwa ukuti kanshi balincetekela, kabili ndacita bwino.” Kanshi, ukutasha umuntu uushaicetekela kuti kwalenga akwata amaka ya kwansha amafya kabili kuti aba ne nsansa. Abalumendo na bakashana maka maka balamwenamo mu kutashiwa pantu na bo bene balakabila ukutashiwa. Umupungwe umo uwafuupwilwe pantu aleimona uwa cabe cabe atila: “Ndesha lyonse ukubombesha ukusekesha Yehova, lelo limo mona kwati nangu mombe shani, tapali ifisuma ifyo ncita. Nga bantasha, ndomfwa bwino sana.” Ipinda lya mu Baibolo lya cine ilitila: “Nga maapele ya golde mu fipe ifyacekwa fya silfere, icebo icasoswa apayene e fyo caba.”—Amapinda 25:11.
Ukutasha kulakoselesha. Umwaume umo uwaba mu mulimo wa kushimikila inshita yonse atila, “Ukuntasha kulalenga nabombesha kabili kulalenga nawamyako ne mibombele yandi.” Umufyashi umo uwakwata abana babili asanga ukuti abana bakwe nga babatasha ku ba mu cilonganino ilyo ba-asukapo pa kulongana, balafwaya sana ukula-asukapo lyonse. Ukutasha kuti kwalenga abana balunduluka mu mikalile yabo iya Bwina Kristu. Na kuba, bonse fye tulafwaya ukutweba ukuti twalicindama kabili twalicindikwa. Tulafuupulwa muli cino calo caisulamo amafya.
Eluda umo atila, “Limo nga nafuupulwa, ukuntasha kuba kwati casuko ku mapepo yandi.” BaElaine na bo batila, “Limo mona ukuti Yehova alanga ukuti alinsenamina ukupitila mu kutasha uko bambi bantasha.”Ukutasha kulalenga umuntu aumfwa ukuti balamupenda. Ukutasha kwa kufuma pa nshi ya mutima kulanga ukuti tulalangulukila bambi kabili kulenga twaba ifibusa na bambi, tulaba abacingililwa, kabili abacindikwa. Kushininkisha ukuti cine cine twalitemwa Abena Kristu banensu kabili twalibacindamika. BaJosie, abakwata abana batila: “Kale, nali fye neka mu cine pantu aba mu ng’anda yandi balepepa kumbi. Pali ilya nshita, ukwishiba ukuti aba bwananyina bakosoka aba ku mupashi balempenda, kwalingafwile ukutwalilila.” Ca cine, “tuli filundwa fya banensu.”—Abena Efese 4:25.
Ukufwaya ukutasha bambi kulalenga tulemonamo ubusuma muli bena. Tulolesha sana pa busuma bwa bambi, te pa filubo fyabo. Eluda uwe shina lya David atila, “Ukumonamo ubusuma muli bambi no kubatasha, kukalenga ukuti tuletasha bambi lyonse.” Ukulaibukisha ifyo Yehova no Mwana wakwe batasha abantu fye ababembu kukatulenga ukuti na ifwe tuletasha sana bambi.—Mateo 25:21-23; 1 Abena Korinti 4:5.
Abalinga Ukutashiwa
Yehova Lesa, e wawaminwa sana ukutashiwa no kulumbanishiwa pantu e Kabumba. (Ukusokolola 4:11) Nangu ca kuti Yehova takabila ukumulumbanya pa kuti abombeshe nelyo ukuti aicetekele, nga twamulumbanya pa mulandu wa kuti wa kutiinya no kuti alikwato luse, alapalama kuli ifwe kabili ici cilenga twaba bacibusa bakwe. Na kabili, ukutasha Lesa kulatwafwa ukuba abaicefya pa milimo tubomba no kwishiba ukuti fyonse ifyo tubomba bwino mulandu fye wa maka ya kwa Yehova. (Yeremia 9:23, 24) Yehova alitambika isubilo lya bumi bwa muyayaya kuli bonse abayana, kabili ici na co cilingile ukutulenga ukumulumbanya. (Ukusokolola 21:3, 4) Imfumu Davidi iya ku kale yalefwaisha ‘ukutashishe shina lya kwa Lesa’ no “kumulumbila ku lwa kutootela.” (Amalumbo 69:30) Shi na ifwe e fyo tulefwaisha ukucita.
Bakapepa banensu balilinga ukutashiwa. Ilyo twabatasha, ninshi tulekonka ifyo Lesa aatweba ukuti, “tutontonkanye ifya kucincishanya ku kutemwa kabili ku kubombe milimo isuma.” (AbaHebere 10:24) Umutumwa Paulo e fyo acitile. Alembeele aba ku cilonganino ca ku Roma ukuti: “Intanshi, ndetootela Lesa wandi muli Yesu Kristu pali imwe bonse, pantu icitetekelo cenu cilelandwapo pano calo ponse.” (Abena Roma 1:8) Umutumwa Yohane na o atashishe Umwina Kristu munankwe Gai pa ca kumwenako cakwe cishaiwamina ica ‘kwenda mu cine.’—3 Yohane 1-4.
Muno nshiku, ilyo Umwina Kristu munensu alanga imibele isuma iya kwa Kristu, apeela bwino ilyashi nelyo ayasukapo bwino pa kulongana, lilaba lishuko lisuma ilya kumutasha. Nelyo mwana nga aleesha ukufwaya amalembo no kuyabelenga ilyo tuli pa kulongana, tufwile ukumutasha. BaElaine, abo tulandilepo pa kubala, batila: “Fwe bantu twaba ne fya bupe fyapusanapusana. Nga tulemona ifyo bambi balecita, ninshi tuletasha pa fya bupe fyapusanapusana ifyo abantu ba kwa Lesa bakwata.”
Ukutasha aba mu Lupwa
Bushe na ba mu lupwa lwesu na bo balakabila ukutashiwa? Pa kuti umulume no mukashi bapekanishishe aba mu ng’anda yabo Abena Efese 5:33) Ku ca kumwenako, Icebo ca kwa Lesa cilanda pa mwanakashi wa bunyinu ukuti: “Abana bakwe baima no kumulumbwilo kupaalwa; wiba amutasha.”—Amapinda 31:10, 28.
ifya ku mupashi, ukuba pamo na bo e lyo no kubapeela ifyo balekabila, cikakabila inshita, ukubombesha no kutemwa. Ukwabula no kutwishika, abalume bafwile ukutasha abakashi kabili abakashi na bo bafwile ukutasha abalume. Na bana bene bafwile ukulatasha abafyashi babo. (Abana na bo balilinga ukutashiwa. Ica bulanda ca kuti abafyashi bamo balangufyanya ukweba abana babo ifyo bafwaya kuti balecita, nomba ilingi tababatasha pa fyo babombesha ukuba aba mucinshi kabili aba cumfwila. (Luka 3:22) Nga ca kuti umwana balemutasha ukufuma fye ku bwaice, akamona ukuti kanshi balamupenda kabili balimucetekela.
Ca cine ukuti cikabila ukubombesha pa kuti tutashe bambi, na lyo line mwaliba ubusuma ubwingi mu kucite fyo. Na kuba, nga twaba aba mukoosha mu kutasha bambi pa fyo bacita, tukaba ne nsansa icine cine.—Imilimo 20:35.
Muletasha Bambi pa Milimo Isuma, Kabili nga Bamutasha Mwilaituntumba
Kuli bamo, ukutashiwa kuti bwaba bwesho. (Amapinda 27:21) Ku ca kumwenako, kuti kwalenga abantu ba cilumba ukulaimona aba pa muulu ukucila bambi. (Amapinda 16:18) Kanshi, tulekabila ukucenjela. Umutumwa Paulo akonkomeshe ati: “Ndeeba onse muli imwe ukuti eitontonkanishisha ukucila ifyo alingile ukutontonkanya; lelo atontonkanye pa kuti engaba na mano ayatuntulu, umo na umo ifyo Lesa amupeela umulingo wa citetekelo.” (Abena Roma 12:3) Pa kwafwa bambi ukukanawila mu bwesho bwa kuitontonkanishisha ukucila ifyo bafwile ukutontonkanya, kuti cawama ukukanalanda sana pa fyo umuntu acenjela nelyo ifyo ayemba. Lelo, tufwile ukutasha bambi pa milimo yabo iisuma.
Nga ca kuti ukutashiwa kwapeelwa no mutima usuma kabili na bo twatasha bakupokelela fye bwino, kuti mwafuma ubusuma. Kuti kwalenga twasumino kuti Yehova afwile ukutashiwa pa fisuma fyonse ifyo twabomba. Ukutashiwa kuti kwalenga no kuti tutwalilile ne myendele isuma.
Ukutasha bambi ukwa kufuma pa nshi ya mutima ilyo babomba bwino, bupe ubo ifwe bonse twingapeela. Ilyo twatasha bambi, balamwenamo icine cine ukucila na fintu tuletontonkanya.
[Akabokoshi ne Cikope pe bula 18]
Kalata Iyamufikile pa Mutima
Kangalila wa muputule umo alebukisha bwino sana icacitike bushiku bumo ilyo babwelele ku ng’anda no mwina mwakwe ukufuma mu kushimikila ninshi nakutalala apo yali ni nshita ya mpepo. Atila: “Umwina mwandi alyumfwile impepo kabili alifuupwilwe, anjebele no kuti aletontonkanya ukuleka umulimo wa kwenda. Atile, ‘kuti cawama ukuba mu mulimo wa nshita yonse tulebomba pa cilonganino, tuleikala pa cifulo cimo no kulatungulula amasambililo ya Baibolo ayesu.’ Nshafwaile ukupingulapo ne lyo cimo, lelo natile natubombe umulungu onse upwe e lyo tukamone ifyo akalatontonkanya pa kupwa kwa mulungu. Nga ca kuti akatwalilila fye ukufwaya ukuleka umulimo wa kwenda, nkacita ukulingana ne fyo alefwaya. Bulya bwine bushiku, twapitile ku post office kabili twasangile kalata uo aba kwi ofesi lya musambo bamulembeele. Muli kalata, mwali amashiwi ya kutasha sana umukashi wandi pa fyo abombesha mu mulimo wa kushimikila ne fyo ashipikisha, kabili balandile no kuti balishibo kuti calyafya ukukuuka cila mulungu. Aya mashiwi ya kutasha yalimufikile sana pa mutima ica kuti tatalile alanda na kabili pa kuleka umulimo wa kwenda. Na kuba, imiku iingi alenkoselesha ukuti tutwalilile mu mulimo wa kwenda nga natontonkanya pa kuleka.” Aba baupana babombele mu mulimo wa kwenda imyaka napamo 40.
[Icikope pe bula 17]
Ni bani mu cilonganino cenu abalingile ukutashiwa?
[Icikope pe bula 19]
Abana balatemwa nga mulebapoosako amano no kubatasha