Sangeni Insansa mu Kwetetula

ABANTU bamo balatiina ukwetetula. Bamona kwati ni ncito sana ica kuti umuntu afwile ukubikako amano icine cine. Aba bene bantu kuti baleimona no kuti baliba no mulandu pantu tabetetula, maka maka nga babelenga ukuti ukwetetula kwalicindama. (Abena Filipi 4:8) Kwena, ukutontonkanya pa cine twasambilila pali Yehova, imibele yakwe iisuma ne fikalamba ifyo aacita, ifyo afwaya no bufwayo bwakwe ubukalamba, ni nshila iisuma iya kubomfeshamo inshita yesu, kabili e fintu fye cifwile ukuba. Mulandu nshi?

Yehova Lesa e Kateka Mukalamba kabili acili alebombesha ukufikilisha ubufwayo bwakwe ubukalamba. (Yohane 5:17) Nangu ca kuti Yehova alikwata ifingi ifya kucita, alabika amano ku matontonkanyo ya kwa kapepa wakwe umo umo. Kemba wa malumbo Davidi alishibe ici kabili apuutilwemo ukulemba ukuti: “Mwe Yehova, mwafwayafwaya muli ine, no kunjishiba: imwe mwaishibo kwikala kwandi no kwima kwandi, mwailukilo kutontonkanya kwandi ukutali.”—Amalumbo 139:1, 2.

Umuntu nga abelenga fye aya mashiwi ya kwa kemba wa malumbo, kuti amona kwati ya kufuupula. Kuti atontonkanya ukuti, ‘Nangu ca kuti Lesa aba “ukutali,” alamona amatontonkanyo yonse ayabi ayaba muli ine.’ Kwena, ukwishibe co kusuma. Kuti kwatwafwa ukulwisha amatontonkanyo yabipa, kabili ilyo twaba na matontonkanyo ya musango yo, tukayatumbula kuli Lesa, ukucetekela ukuti akatulekelela nga twaba ne citetekelo mwi lambo lya cilubula ilya kwa Yesu. (1 Yohane 1:8, 9; 2:1, 2) Pa nshita imo ine, tufwile ukwibukisho kuti Yehova alaceeceeta ababomfi bakwe pa kuti abasenamine. Alabikako amano ilyo tulemutontonkanyapo no kumutasha.

Napamo kuti mwaipusha ukuti: “Bushe cine cine Yehova alamona amatontonkanyo yonse aya bakapepa bakwe abafule fi?” Ukwabula no kutwishika alamona. Yesu alandile sana pa fyo Yehova atupoosako amano ilyo asosele ukuti Yehova alamona fye ne nseba ishacepesha, lyena alandile no kuti: “Mwalicindama ukucila inseba ishingi.” (Luka 12:6, 7) Inseba tashitontonkanya pali Yehova. Nomba nga alashisakamana, ninshi ifwe afwile ukucilanapo ukutusakamana kabili afwile alomfwa bwino sana nga tulemutontonkanyapo! Cine cine, kuti twapepa nge fyapepele Davidi ukuti: “Lekeni fibe ifyasuminishiwa . . . amatontonkanyo ya mu mutima wandi, mwe Yehova, Icilibwe candi icasansuka, kabili Umulubushi wandi.”—Amalumbo 19:14.

Ubushininkisho na bumbi ubwa kuti Yehova alabika amano ku babomfi bakwe aba cishinka ilyo balemutontonkanyapo busangwa mu mashiwi yapuutwamo aya kwa kasesema Malaki. Aseseme ulwa nshiku shesu ukuti: “E lyo abali na katiina kuli Yehova balesoshanya; na o Yehova alepeepeka, no kuumfwa, ne buuku lya kwibukisha lyalembelwe ku cinso cakwe, ilya babela Yehova akatiina, ilya batontonkanye shina lyakwe.” (Malaki 3:16) Ukulaicinkulako ukuti lyonse Yehova ‘alapeepeka’ ilyo tuletontonkanya pali wena kukalenga ukuti tuleipakisha ukutontonkanya pali Lesa. Kanshi, shi na ifwe twingasosa amashiwi yasosele kemba wa malumbo uwalembele ukuti: “Ndetontonkanyo kubomba kwenu konse, no kwetetule milimo yenu.”—Amalumbo 77:12.