“Ifyo Balelemba Amalembo ya mu Baibolo Kale Sana”

PAPITILE imyaka 25, apo abena Israele abashula ifya kushulashula basangile ica baletele insansa nga nshi. Mu ninga baleshikamo abantu iyali mu mupokapoka wa Hinnomu mu Yerusalemu, basangilemo ifimfungwa fibili ifinono ifya silfere apalembelwe Amalembo. Ifi fimfungwa fyapangilwe akale sana ninshi abena Babiloni tabalaonaula Yerusalemu mu 607 B.C.E. Pa fimfungwa palilembelwe amashiwi yamo ayasangwa pa Impendwa 6:24-26. Ne shina lya kwa Lesa, Yehova, lyalisangilwe imiku iingi pa fimfungwa fyonse fibili. Ifi filembo fyalondololwa ukuti “e fyalembwa ifyakokwesha ifyakwata Amalembo ya mu ciHebere.”

Nangu cibe fyo, abasoma bamo balitwishike inshita ifimfungwa fyalembelwe kabili balelanda ukuti fyalembelwe mu mwanda wa mwaka uwalenga bubili B.C.E. Ne calengele ukuti baletwishika ni co ifikope fya kubalilapo ifya ifi fimfungwa tafyalemonekesha ica kuti balifililwe ukwishiba bwino bwino ifyalembelwepo. Pa kuti beshibe inshita fyapangilwe, ibumba lya basoma lyatendeke ukubebeta ifi fimfungwa cipya cipya. Babomfeshe bamashini bakwatisha amaka aya kulenga ifikope ukumoneka bwino pa kuti bamone bwino ifilembo. Ifyo basangile fyasabankanishiwe nomba line. Bushe ibumba lya basoma lyasangile ukuti ni lilali ifimfungwa fyalembelwe?

Ica kubalilapo fye, abasoma basosele ukuti fyalembelwe pa ntanshi abaYuda tabalasendwa bunkole ku Babiloni. Ilyo balolekeshe ifilembo, e kuti ifyo ifilembo fyalembelwe, umusango bafilembelemo, ifyo bafitantike pa kulemba, ifyo imisela ya mashiwi yatantikwe, e lyo no ko baletendekela pa kulemba ifyebo, fyonse ifi filanga ukuti ifi fimfungwa fyapangilwe ku kupwa kwa ba600 B.C.E. Mu kulekelesha, lintu balolekeshe ifyo balesopela amashiwi, aba basoma basondwelela ukuti: “Ukwikatana kwaba pa fyo balesopela ifilembo fyaba pa fimfungwa, icifulo bafishulileko ne milembele kushininkisha kuti fyalembelwe pa ntanshi ya 607 B.C.E.”

Ukusupula ifyo basangile pali ifi fimfungwa, ifyo beta no kuti Ketef Hinnom, ulupapulo lwa Bulletin of the American Schools of Oriental Research lwasondwelela ukuti: “Nomba kuti twasuminisha ku fyo abasoma abengi basondwelele ukuti ifilembo fyaba pali ifi fimfungwa filangilila ifyo balelemba amalembo ya mu Baibolo kale sana.”

[Abatusuminishe Ukubomfya Icikope pe bula 32]

Ininga: Pictorial Archive (Near Eastern History) Est.; ifilembo: Icikope © Israel Museum, Jerusalem; courtesy of Israel Antiquities Authority