Bushe Mwaba nge Cimuti ca Lagani Auna?

MU MUSHI umo uwabela ku nse ya musumba wa Port Moresby, ku Papua New Guinea, kwali bakashimikila babili abalefuma mu kushimikila ukubwelelamo ku ng’anda. Ilyo bale-enda, bamwene icimuti icalemoneka bwino sana. Umwaume uwalipo umukalamba atile, “Mona icimuti ca lagani auna!” Apilibukile ku mulumendo bali nankwe kabili atile: “Ili shina lipilibula ukuti ‘icimuti icibalula cila mwaka.’ Ici cimuti tacaba nge miti imbi iisangwa mu fyalo umwakaba sana, pantu cena amabula yalalukuta cila mwaka kabili cimoneka kwati nacuma. Nomba imfula fye nga yaisa, cilapuuka, cabalula no kutendeka ukumoneka bwino na kabili.”

Kuti twasambililako fimo ku cimuti ca lagani auna nelyo ico beta mu fyalo ifingi ukuti royal poinciana. Abasambilila bamo batila, ici cimuti caba pa miti isano iimoneka bwino sana nga yabalula. Nangu ca kuti mu nshita ya lusuba amaluba ya ciko na mabula filalukuta, ici cimuti cilasunga amenshi. Calikwata imishila iyakosa kabili kuti yatabilila na ku mabwe ayaba pa nshi sana mu mushili. Pa mulandu wa kuti cilalimba imishila, nangu kwaisa umwela wa musango shani, taciwa. Kanshi kuti twatila, nangu ifintu fyafye shani, cena tacuma kabili taciwa.

Na ifwe limbi kuti kwaba ifintu ifingesha icitetekelo cesu. Cinshi cikatwafwa ukushipikisha? Ukupala icimuti ca lagani auna, tufwile ukunwa no kusunga amenshi ayengi ayapeela umweo aya Cebo ca kwa Lesa. Na kabili, tufwile ukukakatila fye ku ‘cilibwe cesu,’ Yehova, na ku kuteyanya kwakwe. (2 Samwele 22:3) Ca cine, icimuti ca lagani auna citusambilisha bwino ukuti nangu ifintu fyafye shani, kuti twatwalilila abakosa lwa ku mupashi nga tulebomfya fyonse ifyo Yehova abikako ifya kutwafwa. Nga tulecite fyo, ‘tukapyaninina amalayo’ atulaya, ukubikapo fye no bulayo bwa bumi bwa muyayaya.—AbaHebere 6:12; Ukusokolola 21:4.