Pashanyeni Ukutekanya Kwa Kwa Yehova

“Yehova tashingashinga ku kufisha ubulayo bwakwe, . . . lelo alitekanya.”—2 Petro 3:9.

1. Bupe nshi ubwacindama sana ubo Yehova akapeela abantu?

KWALIBA ico Yehova akatupeela ico umuntu nangu umo ashingatupeela. Ico cintu cisuma sana kabili calicindama nga nshi, lelo umuntu te kuti acishite nelyo ukucibombela. Yehova atila akatupeela ubumi bwa muyayaya, kabili fwe bengi tukekala muli paradaise pano isonde. (Yohane 3:16) Ala ico cintu cikawama! Fyonse ifitucusha tafyakabeko, takwakabe inkondo, ulukaakala, ubupiina, imisoka, ukulwala nangu fye ni mfwa. Mu Bufumu bwa kwa Lesa wa kutemwa, abantu bonse bakekala mu mutende wine wine kabili bakalaumfwana. Ala mwe bantu tulafwaisha ukuti uyo Paradaise akese bwangu!—Esaya 9:6, 7; Ukusokolola 21:4, 5.

2. Mulandu nshi na nomba Yehova ashaonawila icalo ca kwa Satana?

² Yehova na o alafwaisha ukuleta Paradaise pano isonde. Na kuba, alitemwa ubulungami no mulinganya. (Amalumbo 33:5) Tasekelamo ukumona ifyo abantu pano calo bakaana ifishinte fya mafunde yakwe ayasuma na pa fyo bakaana ukumumfwila. Tatemwa no kumona ifyo abantu bakwe bacushiwa. Na lyo line, kwaliba umulandu ashaonawila icalo cabipa ica kwa Satana. Ni co Satana aimishe ifikansa fya kuti abantu kuti baipingwila abene icalungama ne calubana kabili kuti baiteka bwino abene ukwabula ukumfwila Lesa. Pa kuti icishinka cishibikwe, Yehova alilanga imibele imo iisuma sana iilenga ukuti tupalame kuli wena. Alilanga imibele ya kutekanya, kabili banono sana shino nshiku abatekanya.

3. (a) Bushe amashiwi yabili, ilya ciGriki ne lya ciHebere, ayapilibulwa muli Baibolo ukuti “ukutekanya,” yalola mwi? (b) Mepusho nshi twalayasuka nomba?

³ Kwaliba ishiwi limo ilya ciGriki ilyo bapilibula imiku itatu muli Baibolo wa Amalembo ya Calo Cipya ukuti “ukutekanya.” Nga kulikonka fye lyalola mu kutila “ukukokola ukukalipa,” kabili ilingi line lyapilibulwa ukuti “ukushishimisha,” na kabili umuku umo lyapilibulwa ukuti, “ukuba uwatekanya.” Kanshi amashiwi yonse yabili, ilya ciGriki ne lya ciHebere, ayapilibulwa ukuti “ukutekanya,” yalola mu kutila ukushipikisha no kukanafulwa bwangu. Bushe twamwenamo shani mu kutekanya kwa kwa Yehova? Finshi twingasambililako ku kutekanya no kushipikisha kwa kwa Yehova no kwa babomfi bakwe aba citetekelo? Twaishiba shani ukuti ukutekanya kwa kwa Yehova kwaliba na pa kupelela? Natwasuke aya mepusho.

Tontonkanyeni pa Kutekanya kwa kwa Yehova

4. Cinshi umutumwa Petro alembele pa kutekanya kwa kwa Yehova?

⁴ Ilyo alelanda pa kutekanya kwa kwa Yehova, umutumwa Petro alembele ukuti: “Mwe batemwikwa, mwiluba ici cishinka cimo, ukuti ubushiku bumo kuli Yehova bwaba nge myaka ikana limo (1,000), ne myaka ikana limo ngo bushiku bumo. Yehova tashingashinga ku kufisha ubulayo bwakwe, filya bamo batila alashingashinga, lelo alamutekanishisha pantu tafwaya umuntu nangu umo ukonaulwa lelo afwaya bonse bafike ku kulapila.” (2 Petro 3:8, 9) Mukwai moneni ifishinka fibili pali ili lembo ifingatwafwa ukwishiba ico Yehova abela uwatekanya.

5. Bushe imimwene ya kwa Yehova iya nshita ilenga ukuti alecita shani ifintu?

⁵ Icishinka ca kubalilapo ca kuti Yehova tamona inshita nge fyo ifwe tuimona. Ku Waikala umuyayaya, imyaka ikana limo yaba fye ngo bushiku bumo. Tacita ifintu kwati aletiina  ati inshita yalapwa, na lyo line tashingashinga ukucitapo cimo nga amona apali ubwafya. Apo e wakwatisha amano, Yehova aleshiba bwino bwino inshita ya kucitilapo ifintu pa kuti bonse bamwenamo, kabili alatekanya no kulolela mpaka iyo nshita yafika. Na lyo line, tatufwile ukumona kwati Yehova tabikako amano ilyo abantu bakwe balecula. Ni Lesa wa “nkumbu,” kabili uwakwatisha ukutemwa. (Luka 1:78; 1 Yohane 4:8) Alikwata amaka ya kufumyapo ububi bonse umupwilapo kabili umuyayaya, fyonse ifyabipa ifyacitika pali aka kashita asuminisha, fikapwa umuyayaya.—Amalumbo 37:10.

6. Cinshi tushifwile kutontonkanya pali Lesa, kabili mulandu nshi?

⁶ Kwena, calyafya ukulolela icintu ico umuntu alefwaisha. (Amapinda 13:12) Kanshi, umuntu nga talecita bwangu ifyo alaile, abengi batila labeniko, tapali ifikacitika. Nomba te kuti ciwame ukutontonkanye fyo pali Lesa! Nga twatendeka ukumona kwati ifi Lesa atekanya ninshi alashingashinga ukucita ifyo alaya, mu kuya kwa nshita kuti twatampa no kumutwishika kabili kuti twafuupulwa, twaleka no kubika amano kuli bukapepa bwesu. Ne cingabipisha, kuti twatendeka no kumfwila ifilanda bakapumya, abashaba na citetekelo, abo Petro asokelepo pa kubala ukuti tufwile ukucenjela na bo. Bena ilyo baletupumya batila: “Kuli kwi ukubapo kwakwe ukwalaiwa? Pantu, ukufuma pa bushiku ifikolwe fyesu fyaponene mu tulo twa mfwa, ifintu fyonse filetwalilila filya fine fye fyali ukufuma pa kutendeka kwa bubumbo.”—2 Petro 3:4.

7. Bushe ukutekanya kwa kwa Yehova kwakuma shani ukufwaya kwakwe ukwa kuti abantu balapile?

⁷ Icishinka ca bubili ico twingasambilila ku mashiwi ya kwa Petro ca kuti umulandu Yehova atekanishisha, afwaya bonse ukufika ku kulapila. Bankosa mitwe abashifwaya kuleka ifyabipa, bena Yehova akabonaula. Na lyo line, Lesa tabekelwa mu mfwa ya babifi. Afwaisha ukuti balapile, baleke ukucita ifyabipa no kupusuka. (Esekiele 33:11) E mulandu abela uwatekanya kabili e co aebela ababomfi bakwe ukushimikila abantu imbila nsuma mwi sonde lyonse ukuti balapile pa kuti bakapusuke.

8. Bushe Lesa atekenye shani ku bena Israele?

⁸ Na kabili, tulamona ifyo Lesa atekanya nga twatontonkanya pa fyo acitile ku luko lwa kale ulwa bena Israele. Balimupondokele imyaka iingi sana lelo tabakandile ilyo line. Muli bakasesema bakwe, imiku ne miku apaapaatile abena Israele ukuti: “Bweleni mu mibele yenu ibi, no kubaka amafunde yandi ne fipope fyandi, umwabela amalango yonse ayo naebele bashinwe, ayo natumine kuli imwe mu kuboko kwa babomfi bandi bakasesema.” Nga bena cinshi  bacitilepo? Ca bulanda ukuti balya bantu “tabaumfwile.”—2 Ishamfumu 17:13, 14.

9. Bushe Yesu aali shani uwatekanya nga filya Wishi aba?

⁹ Na pa kulekelesha, Yehova atumine Umwana wakwe kabili na o alyeseshe sana ukupaapaatila abaYuda ukuti babweshe bucibusa bwabo na Lesa. Yesu na o aali uwatekanya filya fine fye Wishi aba. Ilyo aishibe ukuti aali mupepi no kwipaiwa, Yesu abalilile ubulanda ati: “We Yerusalemu, we Yerusalemu, we wipaya bakasesema no kupoola amabwe abatumwa kuli iwe,—ifyo imiku iingi nafwaile ukulonganika abana bobe, filya nankoko afukatila utwana twakwe mu mapindo yakwe! Lelo imwe tamwalefwaya.” (Mateo 23:37) Ifi Yesu alandile aya mashiwi yaluma aya kusoka te kutila aali umunkalwe kabili alefwaisha ukukanda abantu awe, aali ni cibusa wabo umusuma sana kabili uwatekanya kuli bena. Nga filya Wishi wa mu muulu aba, Yesu na o alefwaya abantu ukulapila pa kuti bakapusuke pa bushiku bwa bupingushi ubwa konaula ababifi. Bamo balyumfwilile ukusoka kwa kwa Yesu kabili balipuswike ubupingushi bwaluma ubwaishile pali Yerusalemu mu 70 C.E.—Luka 21:20-22.

10. Twamwenamo shani mu kutekanya kwa kwa Lesa?

¹⁰ Ala ukutekanya kwa kwa Lesa kulatupapusha! Nangu ca kutila abantu tabomfwila amafunde ya kwa Lesa kabili imicitile yabo yaba fye cimbi cimbi, Yehova alitusuminisha, pamo na bambi abengi nga nshi ukuti tumwishibe kabili alitupeela ne subilo lya kupusuka. Petro alembeele Abena Kristu banankwe ukuti: “Moneni ukutekanya kwa kwa Shikulwifwe ukuti lipusukilo.” (2 Petro 3:15) Bushe tatutasha ukuti ukutekanya kwa kwa Yehova kwalilenga ukuti na ifwe tukapusuke? Bushe tatupepa kuli Yehova ukuti aletutekanishisha cila bushiku ilyo tuletwalilila ukumubombela?—Mateo 6:12.

11. Bushe ukwishiba umulandu Yehova atekanishisha kutulenga ukucita cinshi?

¹¹ Ukwishiba umulandu Yehova atekanishisha kulatwafwa ukutekanya no kulolela ipusukilo, tatutila alashingashinga ukucita ifyo alaya. (Inyimbo sha Bulanda 3:26) Ilyo tutwalilila ukupepa ukuti Ubufumu bwa kwa Lesa bwise, twalicetekela ukuti Lesa alishiba bwino inshita ya kwasuka ifyo tupepa muli ili pepo. Na kabili, ukwishibe fyo kulalenga ukuti na ifwe tulepashanya ukutekanya kwa kwa Yehova mu fyo tucita kuli bamunyinefwe na ku bantu tushimikila. Na ifwe tatufwaya umuntu nangu umo ukonaika, tufwaya abantu ukulapila pa kuti babe ne subilo lya bumi bwa muyayaya ilyo na ifwe twakwata.—1 Timote 2:3, 4.

Tontonkanyeni pa Kutekanya kwa Bakasesema

12, 13. Ukulingana na Yakobo 5:10, kasesema Esaya atekenye shani mu mulimo wa bukasesema?

¹² Ukutontonkanya pa kutekanya kwa kwa Yehova kulatwafwa ukumucindika, kabili na ifwe tulafwaisha ukusambilila ukutekanya. Tacayanguka ku muntu umubembu ukusambilila ukutekanya, lelo kuti asambilila. Ababomfi ba kwa Lesa aba kale balatusambilishako fimo pa kutekanya. Umusambi Yakobo alembele ati: “Mwe bamunyinane, moneni icipasho ca kucula no kutekanya kwa bakasesema, abalandiile mwi shina lya kwa Yehova.” (Yakobo 5:10) Tulasansamuka no kukoseleshiwa ukwishiba ukuti ificitika kuli ifwe fyalicitike na kuli bambi kabili na bo balitwalilile aba cishinka kuli Lesa.

¹³ Umo uo twingalandapo ni kasesema Esaya, afwile alekabila sana ukutekanya pa kubomba umulimo apeelwe uwa bukasesema. Na Yehova alishibe ico pantu amwebele ati: “Kabiye, katile kuli aba bantu: Umfweni no kuumfwa, lelo mwiiluka. Moneni no kumona, lelo mwiishiba. Lenge mitima ya aba bantu ukukutwa, komya na matwi yabo, shingula na pa menso yabo, epali bamona mu menso yabo, baumfwa na mu matwi yabo, ne mitima yabo yailuka, kabili babwela no kuundapwa.” (Esaya 6:9, 10) Nangu ca kutila abantu balikeene ukumfwa, Esaya mu kutekanya abebele ubukombe bwa kwa Yehova ubwa kusoka pa myaka nakalimo 46! Na ifwe bene, ukutekanya kukalenga tukatwalilile ukushimikila abantu nangu ca kutila abengi abo tushimikila tabapokelela imbila nsuma.

14, 15. Cinshi calengele ukuti Yeremia akose ukushipikisha amacushi no kucimfya ukufuupulwa?

¹⁴ Abantu balekaana ukumfwila ubukombe  bwalebila bakasesema, kabili balecusha na bakasesema bene. Yeremia bamubikile mu makusu, bamukakile na mu “ng’anda ya cifungo,” kabili bamupoosele na mu cilindi umwali amatipa. (Yeremia 20:2; 37:15; 38:6) Abamucushishe ifyo ni balya bene bantu alefwaya ukwafwa. Lelo Yeremia tafulilwe kabili tafwaile ukulandula pa fyo bamucitile. Aali uwatekanya kabili alishipikishe imyaka iingi.

¹⁵ Ukumucusha no kumupumya tafyalengele ukuti Yeremia aleke ukusesema, na ifwe tafilenga ukuti tuleke ukushimikila. Kwena, limo kuti twafuupulwa. Na Yeremia wine inshita imo alifuupwilwe. Umwine atile: “Icebo ca kwa Yehova caisaba kuli ine ukuseebanya kabili akawele akasuba konse. [Natile], Nshakamulumbule, nshakasosele kabili mwi shina lyakwe.” Cinshi acitile? Bushe Yeremia alilekele ukusesema? Akonkenyepo ukuti: “Mu mutima wandi [Icebo ca kwa Lesa] caba kwati mulilo uulepya, uwacilikilwa mu mafupa yandi. Ninaka ku kuminina mu nda, kabili nafilwa.” (Yeremia 20:8, 9) Moneni ukuti ilyo abikile sana amano ku fyo abantu balemupumya, alifuupwilwe. Lelo ilyo atontonkenye sana pa busuma bwa bukombe alebila na pa fyo ubukombe bwacindeme, alikosele na kabili. Yehova na o aletungilila Yeremia, “nge mpalume iya kututumya,” alemukosha ukuti abe uwacincila kabili uwashipa ukushimikila abantu icebo ca kwa Lesa.—Yeremia 20:11.

16. Cinshi cikatwafwa ukulabomba ne nsansa umulimo wa kushimikila abantu imbila nsuma?

¹⁶ Bushe kasesema Yeremia aali ne nsansa mu mulimo wakwe? Ee, ukwabula no kutwishika! Alandile kuli Yehova ati: “Fyalisangilwe ifyebo fyenu, na ine nalifiliile, kabili ifyebo fyenu fyaisaba kuli ine ukusekelela, kabili ukwanga kwa ku mutima wandi; pantu nainikwe shina lyenu, mwe Yehova.” (Yeremia 15:16) Yeremia aali ne nsansa pantu asalilwe na Lesa wa cine ukubomba ulya mulimo kabili aleshimikila abantu Icebo ca kwa Lesa. Na ifwe kuti twaba ne nsansa. Na kabili, tulasekelela nge fyo na bamalaika ba mu muulu basekelela pa mulandu wa kuti abengi mwi sonde lyonse balepokelela ubukombe bwa Bufumu, balelapila, no kutendeka ukwenda mu nshila ya ku mweo wa muyayaya.—Luka 15:10.

“Ukushipikisha kwa kwa Yobo”

17, 18. Bushe Yobo ashipikishe shani, kabili cinshi cafuminemo?

¹⁷ Ilyo umusambi Yakobo alandile pali bakasesema ba kale, alandile no kuti: “Mwalyumfwa ukushipikisha kwa kwa Yobo kabili mwalimona ne cafuminemo ico Yehova apeele, ukuti Yehova wa citemwishi nga nshi kabili wa luse.” (Yakobo 5:11) Ishiwi lya ciGriki ilyapilibulwa pano ukuti “ukushipikisha,” lyalipalana na lilya Yakobo abomfeshe mu cikomo 10 ilyapilibulwa ati “ukutekanya.” Ilyo alelanda pa bupusano bwaba pali aya mashiwi yabili, uwasambilila umo atile: “Ishiwi lya ciGriki ilyapilibulwa ukuti “ukutekanya,” libomba sana ilyo abantu baletucusha, lelo ilyapilibulwa ukuti “ukushipikisha,” lyena libomba sana ilyo kuli fimo ifiletucitikila ifilengele ukuti tulecula.”

¹⁸ Yobo aliculile sana. Icuma cakwe conse calisendelwe no konaulwa, abana bakwe bonse balifwile, kabili alwele no bulwele bwabipa. Abanankwe na bo bamubepeshe ukuti kwali fimo ifyo acitile ifyalengele ukuti Yehova amukande. Yobo tafwilile fye mu kati ilyo alecula; ali-ilishenye pa bucushi bwakwe kabili asukile alanda na mashiwi ayalanga ukuti aimwene ukutila alilungama  ukucila na Lesa. (Yobo 35:2) Na lyo line, atwalilile uwa citetekelo kabili uwa cishinka kuli Lesa. Tatukile Lesa nge fyo Satana alandile ukuti e fyo Yobo akacita nga acula. (Yobo 1:11, 21) Cinshi cafuminemo? Yehova “apaalile Yobo pa numa ukucila pa kutendeka.” (Yobo 42:12) Yehova aposeshe Yobo, amupeele icuma icafulile imiku ibili ukucila pa ca kubalilapo, kabili ipaalo lya kwa Yehova lyalengele Yobo na bakashi bakwe na bana ukuba ne nsansa. Ukushipikisha kwa kwa Yobo ne citetekelo cakwe fyalengele aishiba Yehova bwino sana ukucila ne fyo amwishibe pa kubala.

19. Finshi tusambililako ku kushipikisha kwa kwa Yobo na ku kutekanya kwakwe?

¹⁹ Cinshi tusambililako ku kutekanya no kushipikisha kwa kwa Yobo? Nga filya cali kuli Yobo, na ifwe kuti twalwala nelyo kuti twaponenwa na macushi yambi. Limbi te kuti twishibe bwino bwino umulandu Yehova asuminishishe ukuti tweshiwe kuli fimo. Ico tufwile fye ukwishiba ca kuti: Nga twatwalilila aba cishinka, Lesa akatupaala. Nangu cikabe shani, Yehova akalambula abamufwaisha. (AbaHebere 11:6) Yesu atile: “Uwashipikisha ukufika na ku mpela, wene e ukapusuka.”—Mateo 10:22; 24:13.

“Ubushiku bwa kwa Yehova Bukesa”

20. Cinshi tushingatwishikila ukuti ubushiku bwa kwa Yehova bukesa?

²⁰ Nangu Yehova atekanya, tafwaya ulufyengo kabili takaleke ifyabipa ukutwalilila umuyayaya. Ukutekanya kwakwe kwaliba na pa kupelela. Petro alembele ati: “[Lesa] tashimbile ukukanda aba pano calo aba ku kale.” Kwena Noa na ba mu ng’anda yakwe bena balipuswike, lelo aba pano isonde bonse abashalepepa Lesa balifwile ku menshi. Yehova na kabili akandile aba mu Sodomu na Gomora no koca ilya misumba nakalya nakalya. Ifyo apingwile balya bantu ba kale,“cipasho ca fintu ifili no kwishila abashipepa.” Nangu cikabe shani: “Ubushiku bwa kwa Yehova bukesa.”—2 Petro 2:5, 6; 3:10.

21. Kuti twalanga shani ukuti twalitekanya kabili tulashipikisha, kabili cinshi tukalandapo mu cipande cikonkelepo?

²¹ E ico kanshi, natupashanye ukutekanya kwa kwa Yehova pa kwafwa abantu ukufika ku kulapila pa kuti bakapusuke. Natupashanye na bakasesema ba kale pa kuba abatekanya ilyo tuleshimikila abantu imbila nsuma nangu ca kutila bamo tabapokelela ubukombe tubashimikila. Na kabili, Yehova akatupaala nga nshi nga twashipikisha ifya kwesha no kutwalilila aba cishinka nge fyo Yobo acitile. Nga twatontonkanya pa fyo Yehova apaala nga nshi abantu bakwe ilyo balebombesha mu mulimo wa kubila imbila nsuma mwi sonde lyonse, tukatwalilila ukusekelela pa kubomba uyu mulimo. Ilyo line, e lyashi tukalandapo mu cipande cikonkelepo.

Bushe Muleibukisha?

• Mulandu nshi Yehova abela uwatekanya?

• Cinshi tusambililako ku kutekanya kwa bakasesema?

• Bushe Yobo ashipikishe shani, kabili cinshi cafuminemo?

• Twaishiba shani ukuti ukutekanya kwa kwa Yehova kwaliba na pa kupelela?

[Amepusho]

[Icikope pe bula 18]

Yesu aali uwatekanya filya fine fye Wishi aaba

[Ifikope pe bula 20]

Bushe Yehova alambwile shani Yeremia pa kutekanya kwakwe?

[Ifikope pe bula 21]

Bushe Yehova alambwile shani Yobo pa kushipikisha kwakwe?