“Bushe Purple Triangle Imininako Cinshi?”

UMUBOMFI umo uwa mu cipani cilolekesha pa filye mu Seoul, mu Korea alembele ukuti: “Papita fye inshiku ishinono apo napokelele Ulupungu lwa kwa Kalinda kuli umo uwa Nte sha kwa Yehova. Ilyo nabelengele, nasambilileko ifishinka fimo pa fyo Inte sha kwa Yehova shalecushiwa ku buteko bwa ciNazi na ku buteko bwa ciKomyunisti. Lelo ninkwata ilipusho. Pa cikope icili pa nkupo pali Inte sha kwa Yehova, kabili pa fya kufwala fyabo lwa ku kukosa pali purple triangle iyalosha pa nshi. Bushe purple triangle imininako cinshi?”

Lintu ubuteko bwa ciNazi bwaleteka mu Germany, Inte sha kwa Yehova shalikeene ukulapundako ukuti heil Hitler. Kabili tabaibimbile mu fya mapolitiki na mu nkondo. E mulandu wine abaNazi babapakashile icabipisha. BaNte mupepi na 12,000 balipooselwe mu fifungo na mu nkambi sha kucushishamo abantu, kabili balibakakile pa butali bwa nshita ubwapusanapusana. Mupepi na 2,000 balifwile, kabili abengi balibepeye.

Cinshi cintu purple triangle pa ca kufwala ca bafungwa yaleimininako? Icitabo ca Anatomy of the SS State cilondolola ukuti: “Abafungwa abapusanapusana abali mu nkambi sha [baNazi] balefwala ifishibilo ifyaleishibisha umulandu bacitile. Ilyo inkondo ishilatendeka caliseekele sana ukubilila icishibilo ca triangle pa ca kufwala ca mufungwa. Ama triangle yakwete amalangi ayapusanapusana ukulingana no mulandu umufungwa akakilwepo. Ku ca kumwenako, uwakakilwe pa mulandu wa fya mapolitiki pa ca kufwala cakwe paleba icishibilo ca triangle ya kashika; Inte sha kwa Yehova paleba triangle iya purple (cifuungo); abantu bakaluka, balebapeela iyafiita; intalamisoka, yaleba iyakatapakatapa; abalebembuka na baume banabo, yaleba iya kashikila; abafumine ku fyalo fimbi, yaleba iya fiitulukila. Pa fya kufwala fya baYuda paleba triangle iyakwete ilangi limbi e lyo na imbi iya mutuntula, ica kuti aya ama triangle yabili yapangile Ulutanda lwa kwa Davidi.”

Profesa John K. Roth mwi buuku lyakwe ilya Holocaust Politics alembele pali purple triangle ukuti: “Nga ca kuti kukaba ukwibukisha ubucindami bwa iko, kuti yatucingilila ku mafya, kuti yaba bucingo ubwingatulenga ukuba ne mibele isuma iyo abantu bonse batasha.” Inte sha kwa Yehova balipanga vidio iyo babapeelelepo icilambu iitila Jehovah’s Witnesses Stand Firm Against Nazi Assault. Kuti mwaipusha umo uwa Nte sha kwa Yehova ukumutambisha uyu vidio.