Bushe Tulakabila Mesia?

LIMBI kuti mwaipusha amuti, “Bushe tulakabila ukuti Mesia akese?” Kwena caliba fye bwino ukuipusha nga ca kuti tulakabila ukwafwa kwa kwa Mesia.

Abantu abasumina mu fyo na imwe mwasuminamo limbi kuti bamweba ukuti: Mulakabila Mesia, kwati ni fintu na bambi bamukabila. Umwaume waishibishe amafunde ya baYuda, uwaikeleko mu mwanda wa myaka uwa kubalilapo, alembele pali Mesia ukuti: “Amalayo ya kwa Lesa nelyo yafula shani, yaisaba Ee muli wene.” Alandile aya mashiwi ku kulangilila umulimo wacindama uo Mesia abomba mu kuteyanya kwa kwa Kabumba ukwa kupaala inko shonse pano pe sonde. (2 Abena Korinti 1:20) Umulimo wa kwa Mesia walicindama nga nshi ica kuti ukusesema kwa mu Baibolo konse kulanda pa kwisa kwakwe ne fyo ali no kucita. Icitabo calembele Henry H. Halley, ico abengi babelenga pa myaka 70, calanda ukuti: “Icipingo ca Kale calembelwe ku kulenga abantu ukuti baleenekela, no kuipekanishisha ukwisa kwa kwa [Mesia].” Lelo bushe ukwisa kwakwe kwalicindama? Mulandu nshi mulingile ukubikilako amano?

“Mesia” cipilibula “Uwasubwa” kabili ili shiwi cimo cine ne shiwi lyaishibikwa ilya kuti “Kristu.” Icitabo ca Encyclopædia Britannica ica mu 1970, cimwita ukuti “kalubula mukalamba” uwaishile pe sonde pa mulandu wa lubembu ulo Adamu na Efa bacitile. Ilyo babumbilwe, bali abapwililika kabili nga baliipakishe ubumi bwa muyayaya muli Paradaise. Lelo balipanishe ilyo ishuko. Malaika wapondweke, uwitwa Satana Kaseebanya, abebele ukuti Kabumba wabo alebapusula ifisuma, pantu bali no kwikala bwino abene nga ca kuti baleisalila icali icisuma ne cabipa.—Ukutendeka 3:1-5.

Efa alibelelekwe kabili alisumine ifyo bamubepele. Adamu na o, apo alitemwishishe umukashi ukucila ukuba uwa cishinka kuli Lesa, awilile muli bumpulamafunde Kaseebanya atendeke. (Ukutendeka 3:6; 1 Timote 2:14) Ico bacitile calicilile na pa kulufya fye isubilo lya mweo wa muyayaya mu paradaise. Icafuminemo ca kuti bayambukishe abana babo ulubembu ne mfwa.—Abena Roma 5:12.

Lilya line fye babembwike, Yehova ateyenye inshila ya kupwishishamo ifyabipa fyonse ifyali no kulacitika pa mulandu wa bucipondoka. Abantu bali no kuwikishiwa kuli Yehova ukupitila mu kubomfya icipope ca mulinganya icali mwi Funde lya kwa Mose. (Amalango 19:21; 1 Yohane 3:8) Ici cipope cali no kufikilishiwa lintu intuntuko sha kwa Adamu na Efa bali no kwikala ku ciyayaya  pano pe sonde, nge fyo Kabumba ateyanishishe abantunse pa kubala. Kanshi Mesia alekabilwa.

Pa kupingula Kaseebanya, Yehova Lesa alandile mu kusesema kwa kubalilapo ukwa mu Baibolo ukuti: “Kabili ndebika ubulwani pa kati ka iwe no mwanakashi, na pa kati ka bufyashi bobe no bufyashi bwakwe. Bwena bukakulasa ku mutwe nobe ukabulasa ku citende.” (Ukutendeka 3:15, NW) Umwaume umo uwasoma Baibolo alandile ukuti “ilyashi ililanda pa masesemo ya kwa Mesia nga fintu Amalembo yalondolola litendekela na aya mashiwi yali pa muulu.” Na umbi uwasoma atile Lesa akabomfya Mesia ku “kupwisha ububifi bonse ubucitikila abantu,” kabili pa nshita imo ine akapaala umutundu wa muntu.—AbaHebere 2:14, 15.

Nangu cibe fyo, mufwile mwalimona ukuti pali lelo, abantu tabaipakisha amapaalo. Lelo bonse balacula. Icitabo ca The World Book Encyclopedia catila “abaYuda abengi na nomba balenekela Mesia ukwisa” kabili batila “akesafumyapo ububifi bonse kabili akacimfya abalwani abacusha abantu.” Baibolo ilanda ukuti Mesia aliisa kale. Bushe kuti twasumina ico Baibolo isosa? Icipande cikonkelepo calayasuka.