“Natusanga Mesia”

ABAYUDA babili aba mu mwanda wa myaka uwa kubalilapo balandile ukuti: “Natusanga Mesia.” “Natusanga uo Mose, mu Mafunde, na Bakasesema balembelepo.” Mesia balelolela asukile aisa. Balishininkishe ukuti ali ni Mesia!—Yohane 1:35-45.

Nga mwatontonkanya pa fyo ifintu fyali kale mu fya mapepo na mu bwikashi monse, kuti mwamona umulandu cacindamine ukuti aba babili babe ne citetekelo. Abengi abaleitunga ukulubula abantu balimine kabili abantu abengi balibakonkele no kubacetekela, lelo amasubilo na mapange ya aba baume yalilobele lintu bafililwe ukulubula abaYuda kwi koli lya bena Roma.—Imilimo 5:34-37.

Nangu cibe fyo, Andrea na Filipi bena tabatwishike ukuti uo basangile ni Mesia wa cine. Mu myaka yakonkelepo icitetekelo cabo calikoseleko pantu baliimwenene abene ifipesha mano ifyo uyu muntu acitile ifyalingene ne fya kwishibilako Mesia wa cine.

Cinshi calengele ukuti Andrea na Filipi e lyo na bantu bambi babe ne citetekelo muli wena? Cinshi calengele bacetekele ukuti tali ni Mesia wa bufi? Kabili finshi fyalengele bashininkishe ukuti ali Mesia wa cine?

Ukulingana ne lyashi lya kale, Andrea na Filipi baishibe Yesu wa ku Nasarete, uwali kale kabasa, ukuti e Mesia wasobelwe kabili e o balelolela. (Yohane 1:45) Luka, uwali kalemba waishibishe ifya kulemba ilyashi lya kale pali ilya nshita, alandile ukuti Mesia ali no kwisa mu “mwaka walenga ikumi na isano (15) uwa kuteeka kwa kwa Tiberi Kaisare.” (Luka 3:1-3)  Umwaka walenga 15 uwa kuteka kwa kwa Tiberi watendeke mu September 28 C.E. kabili wapwile mu September 29 C.E. Luka na kabili atwalilile ukusosa ukuti abaYuda pali ilya nshita “baleenekela” ukwisa kwa kwa Mesia. (Luka 3:15) Mulandu nshi balemwenekela pali ilya nshita? Natumone.

Ubushininkisho Ubwa Kwishibilako Mesia

Apo Mesia abomba umulimo uukalamba, kanshi kuti mwamona umulandu Yehova abikileko ifya kwafwa abantu bonse aba cishinka ukwishiba Mesia walaiwe. Mulandu nshi? Pantu ifi fya kumwishibilako, kuti fyayafwa abantu ukukanalufiwa na baMesia ba bufi, nge fyo abengi balufiwe kale.

Umwiminishi wa calo cimbi ilyo aleilondolola ku buteko bwa calo ayako, alakabila ukulangisha ifyalembwa fya kwishibilako ukuti ubuteko bwakwe e bumutumine. Yehova na o alipekanishishe libela ifyo Mesia ali no kufikilisha. E co lintu “Umwiminishi Mukalamba” amoneke, cali kwati aishile ne fyalembwa fya kumwishibilako, pa kuti eshibikwe ukuti e o batumine.—AbaHebere 12:2.

Ifya kumwishibilako ukuti ali ni Mesia wa cine fyalilembelwe mu kusesema kwa mu Baibolo imyaka iingi pa ntanshi talaisa. Ukusesema kwalilandile fyonse pali Mesia, e kuti ifyo ali no kwisa, ifyo ali no kubomba umulimo, ifyo bali no kumucusha, ne fyo ali no kufwa. Kabili kuti mwatemwa no kwishiba ukuti kulya kusesema kwalilandile na pa kubuuka kwakwe, no kubikwa ku kwa kulyo kwa kwa Lesa. Kabili kwalandile fye na pa mapaalo ayo Ubufumu bwakwe bukaleta. Kanshi kuti twatila ukusesema kwa mu Baibolo kwalangilile inshila yaibela iingapashanishiwa ku cifwati ca munwe, icishibisha fye umuntu umo.

Na lyo line, ilyo Yesu amoneke mu 29 C.E., te kusesema konse kwalelanda pali Mesia ukwafikilishiwe lilya line. Ku ca kumwenako, mu 29 C.E. Yesu ali talafwa no kubuushiwa. Nangu cibe fyo, Andrea, Filipi, na bambi abengi balimucetekele pa mulandu wa fyo alesambilisha ne fyo alecita. Balimwene ifingi ifya balengele ukushininkisha ukuti mu cine cine ali ni Mesia. Nga ca kuti eko mwali, no kuimwena ifyo alecita, na imwe bene limbi nga mwalisumine ukuti Yesu e Mesia.

Ifya Kwishibilako Mesia

Bushe nga cinshi camulengele ukusumina ukuti Yesu ali e Mesia? Bakasesema ba kwa Lesa balisobele ifyo Mesia ali no kucita, ifyo bonse bali no kumwishibilako ukuti ni Mesia. Ilyo bakasesema abalekanalekana balelanda pa fya kwishibilako Mesia, abantu basukile baishiba ifyo Mesia akaba. Kalemba Henry H. Halley atile: “Nga ca kuti abantu ukufuma ku fyalo fyalekanalekana, abashabala abamonanapo, nelyo ukulanshanyapo mu nshila iili yonse, baingila mu muputule umo, e lyo babika pe tebulo ifiputusha fya Mabwe ayo babashile bwino bwino, kabili ilyo bafilundinkanya, fyapanga icintu cimo icisuma nga nshi. Bushe te kuti mutontonkanye ukutila kwali umo uwalengele ico bali no kupanga no kulangilila umo umo ico akabasa?” Lyena Henry H. Halley aipusha ukuti: “Bushe ifi ifya kwishibilako ubumi bwa kwa Yesu no mulimo ali no kubomba, ifyalembelwe na bantu bapusanapusana kabili abaikeleko pa nshita shapusanapusana, imyaka iingi nga nshi ilyo Yesu ashilaisa pe sonde, kuti fyalondololwa ukwabula ici cishinka ca kuti Uwakwatisha amano ukucila abantunse e walebeba ifya kulemba? Halley asondwelele ukuti “ Cipesha mano icacila fyonse!”

Ici “cipesha mano” catendekela mwi buuku lya kubalilapo ilya mu Baibolo. Ukulunda pa kusesema kwa kubalilapo ukwa mu Baibolo ukwalanda pa mulimo Mesia akabomba, kalemba we buuku lya Ukutendeka alembele no kuti Mesia ali no kufyalilwa mu lupwa lwa kwa Abrahamu. (Ukutendeka 3:15; 22:15-18) Baibolo na kabili isokolola ukuti Mesia ali no kwishila mu mukowa wa kwa Yuda. (Ukutendeka 49:10) Lesa aebele abena Israele ukupitila muli Mose ukuti Mesia ali no kuba uwa kulandilamo umukalamba kabili kapususha ukucila fye na Mose wine.—Amalango 18:18.

 Mu nshita Imfumu Davidi yaleteka, ukusesema kwasokolwele ukuti Mesia ali no kupyana Davidi pa cipuna ca bufumu kabili ubufumu Bwakwe bwali no “kupampamikwa umuyayaya.” (2 Samwele 7:13-16) Ibuuku lya kwa Mika lyasokolwele ukuti Mesia ali no kufyalilwa mu musumba wa kwa Davidi, mu Betlehemu. (Mika 5:2) Esaya asobele ukuti akafyalwa kuli nacisungu. (Esaya 7:14) Kasesema Malaki na o asobele ukuti ukwisa kwa kwa Mesia kukabilwa no muntu uwapala Eliya.—Malaki 4:5, 6.

Ubulondoloshi bwalundwako pali Mesia busangwa mwi buuku lya kwa Daniele. Ukulanda mu kulungatika umwaka Mesia ali no kumoneka, ukusesema kutila: “E ico ishiba no kushilimuka ukuti ukutula pa kufuma kwa cebo ca kubwesha no kukuula Yerusalemu ukufika kuli Mesia Intungulushi, kukaba imilungu cinelubali (7), e lyo ne milungu amakumi mutanda na ibili (62). Umusumba ukabweshiwa no kukuulwa cipya cipya, pamo no lubansa ne mpembwe, lelo mu nshita sha bucushi.”—Daniele 9:25, NW.

Mu mwaka uwalenga 20 uwa kuteka kwaiko, Artakishashete Imfumu ya Persia yalandile “icebo” ca kubwesha no kukuululula cipya cipya Yerusalemu. Yatendeke ukuteka mu 474 B.C.E., kanshi umwaka uwalenga 20 uwa kuteka kwaiko wali ni 455 B.C.E. (Nehemia 2:1-8) E ico, ubutali bwa ciputulwa ca nshita 69 (7 ukubikapo 62) ica milungu ya mu kusesema bwatendeke pa nshita icebo ca kubweshiwa no kukuulwa cipya cipya ukwa Yerusalemu casoselwe kabili capwile lintu Mesia amoneke. Imilungu ya cine cine amakumi mutanda na pabula (69) yalingana ne nshiku 483, nelyo ukucepako fye panono pa myaka ibili. Lelo ukukonke funde lya mu kusesema ilya “ubushiku bumo ku mwaka umo,” kulangilila ukuti Mesia aali no kumoneka imyaka 483 pa numa, mu 29 C.E.—Esekiele 4:6. *

Nangu ca kuti pa nshita yapusanapusana kwaleba abantu abaleitunga ukuba baMesia, Yesu wa ku Nasarete e waishilemoneka pano calo mu 29 C.E. (Luka 3:1, 2) Muli ulya wine mwaka, Yesu aishile kuli Yohane Kabatisha no kubatishiwa mu menshi. Lilya line Yesu alisubilwe no mupashi wa mushilo ukuba Mesia. Pa numa, Yohane uwasobelwe ukuti akabomba umulimo uwapalene no wa kwa Eliya, alondolwele Yesu kuli Andrea na ku musambi umbi, atile “Moneni, Umwana wa mpaanga wa kwa Lesa, uulesenda ulubembu lwa ba pano calo.”—Yohane 1:29; Luka 1:13-17; 3:21-23.

Ulupwa Mesia Afyalilwemo ne fya Kumwishibilako

Ukusesema kwapuutwamo kwalanda pa ndupwa shimo isha baYuda ukuti e mwali no kufyalilwa Mesia. Kanshi ca mano ukuti Kabumba uwaishiba fyonse ateyanye ukuti Mesia ese pa nshita lintu kuciliko ifyalembwa ifya kwishibilako ifikolwe fyakwe.

Icitabo ca McClintock and Strong’s Cyclopedia calanda ukuti: “Teti tutwishike no kutwishika ukuti ifyalembwa fya baYuda ifya mikowa ne fya ndupwa fyalilobele lintu Yerusalemu yaonawilwe [mu 70 C.E.].” Kwaliba ifishinka ifilangilila ukuti Mateo na Luka balembele amalandwe yabo pa ntanshi ya 70 C.E. Kanshi, limbi balibomfeshe ifi fyalembwa lintu balelemba pa fikolwe fya kwa Yesu. (Mateo 1:1-16; Luka 3:23-38) Apo ili lyashi lyalicindeme, kanshi  abantu abengi abaliko pali ilya nshita nga balitemenwe ukushininkisha nga ca kuti ifyalembelwe pa lwa fikolwe fya kwa Yesu fyali ifya cine.

Bushe Ifyafikilishiwe Muli Yesu Fyali fya Mankumanya?

Na lyo line, bushe kuti caba ca mankumanya ukuti Yesu afikilishe ukusesema konse ukulanda pali Mesia? Lintu baipwishe uwasoma, atile: “Nakalya! Impendwa ya masesemo yalikulisha ica kuti ukufikilishiwa te kuti kube ukwa mankumanya. Bamo balikele pa nshi no kusanga imyaka cingasenda pa kuti amasesemo 8 yafikilishiwe mu muntu umo ku mankumanya, kabili basangile ukutila kuti casenda imyaka 100,000,000,000,000,000.” Alandile no kuti: “Nga mwabula indalama sha silfere ishifulile uyu musango no kushisalanganya, kuti shafimba icalo ca Texas [icalo icicepeleko fye panono pa calo ca Zambia], e lyo kuti shapanga umutika uukalamba uukulile amasentimita 60 [e kuti ukucililako fye panono mu makufi]. Nga ca kuti mwapenta indalama ya silfere imo, e lyo mwakaka umuntu icisalu pa menso no kumweba ukuti ayetoolapo fye indalama imo, bushe kuti cayanguka ukutoola indalama ilya mupentele?” Lyena asosele ukuti “ifi fine e fyo cingafya na ku masesemo 8 fye [ayalanda pali Mesia] ukufikilishiwa mu muntu umo.”

Na lyo line, pa myaka itatu na hafu iya kushimikila kwakwe, Yesu tafikilishe fye amasesemo 8 aya mu Baibolo, afikilishe ayengi nga nshi. Pa mulandu wa ubu bushininkisho bonse, ulya wasoma asondwelele ukuti: “Ukutula na kale ni Yesu fye eka e wafikilisha amasesemo ya Baibolo ayengi nga nshi.”

“Ukwisa” kwa kwa Mesia

Ukwabula no kutwishika, Mesia amoneke mu 29 C.E. nga Yesu wa ku Nasarete. E fyo aishile, umulanda, kabili Umupusushi uwaculile nga nshi. Taishile kwati ni Mfumu iya maka ku kupwisha ukuteka kwa bukalushi ukwe koli lya bena Roma, nga fintu abaYuda abengi na basambi bakwe baleenekela. (Esaya, icipandwa 53; Sekaria 9:9; Imilimo 1:6-8) Nangu cibe fyo, ukulingana no kusesema, ukwisa kwakwe kwali no kuba ukwa maka icine cine.—Daniele 2:44; 7:13, 14.

Ukumfwikisha bwino ukusesema kwa mu Baibolo kwalenga abafumacumi ukusumina ukuti Mesia alishile mu mwanda wa myaka uwa kubalilapo, no kuti ali no kubwela. Ubushininkisho bulanga ukuti ukwisa kwakwe ukwasobelwe, e kuti intendekelo ya “kubapo” kwakwe, kwacitike mu 1914. * (Mateo 24:3-14) Muli ulya mwaka, Yesu alibikilwe pa cipuna ca Bufumu mu muulu kabili atendeke ukuteka. Nomba line, ali no kufumya pe sonde fyonse ifyaletwako na bucipondoka ubwacitike mu Edeni. Pa mpela fye ya Myaka Ikana Limo, bonse abamucetekela ukuti e Lubuto lwalaiwe kabili Mesia ‘uusenda ulubembu lwa ba pano calo’ bakapaalwa.—Yohane 1:29; Ukusokolola 21:3, 4.

Inte sha kwa Yehova bakatemwa ukulanshanya pali ubo bushininkisho kabili bakamulanga ifyo Baibolo isosa pa fyo ukuteka kwa kwa Mesia kukapilibula kuli imwe na batemwikwa benu.

[Amafutunoti]

[Icikope/Ifikope pe bula 6, 7]

455 B.C.E., 29 C.E., 1914, Nomba line Mesia

“icebo ca Mesia amoneka Mesia aba ali no kupwisha

kubweshiwa Imfumu mu ububifi kabili ali

. . . muulu no kupanga isonde

Yerusalemu” paradaise

Imyaka 483

(imilungu 69 iya

mu kusesema)

—Daniele 9:25