Ubwangalishi Ubukafikilisha Ukufwaya kwa kwa Lesa

‘[Lesa] abomba fyonse umwabela ukupanga kwa kufwaya kwakwe.’—ABENA EFESE 1:11.

1. Mulandu nshi aba mu filonganino fyonse ifya Nte sha kwa Yehova bakalonganina pa 12 April, 2006?

PALI Citatu icungulo, pa 12 April, 2006, abantu mupepi na mamilioni 16 bakalongana ku kusefya Umulalilo wa kwa Shikulu. Mu fifulo fyonse ifyo bakalonganinamo, mukaba itebulo apo bakabika umukate ushatutumuka, uwimininako umubili wa kwa Kristu, no mwangashi wa kashika, uwimininako umulopa wakwe uwasuumine. Mupepi na ku mpela ya lyashi ilikalalondolola umulandu kubela Icibukisho ca mfwa ya kwa Yesu, bakapisha ifimpashanya mwi bumba, ukubalilapo no mukate, e lyo bakakonkeshepo umwangashi. Mu filonganino fimo fimo ifya Nte sha kwa Yehova, umuntu umo nelyo abafulilako bakalyako kuli ifi fimpashanya. Lelo, mu filonganino ifingi, pa bakasangwako bonse tapakabe nangu umo uukalyako ifimpashanya. Nomba, mulandu nshi cabela ifi, ukuti Abena Kristu abanono fye abakwata isubilo lya kwikala ku muulu e balyako, ilyo abengi nga nshi, abakwata isubilo lya kwikala pe sonde ku ciyayaya bena tabalyako?

2, 3. (a) Yehova atendeke shani ukubumbe fintu umwabela ukupanga kwa kufwaya kwakwe? (b) Mulandu nshi Lesa abumbile isonde na bantu?

² Yehova Lesa aliba no bufwayo. Pa kufikilisha ubu bufwayo bwakwe, ‘abomba fyonse umwabela ukupanga kwa kufwaya kwakwe.’ (Abena Efese 1:11) Pa kubala abumbile Umwana wakwe uwafyalwa eka. (Yohane 1:1, 14; Ukusokolola 3:14) Ukupitila muli uyu Mwana, Yehova abumbile ulupwa lwa bana bakwe aba ku mupashi, lyena akonkeshepo imyulu, ukusanshako ne calo na bantu abaikalamo.—Yobo 38:4, 7; Amalumbo 103:19-21; Yohane 1:2, 3; Abena Kolose 1:15, 16.

³ Yehova tapangile isonde ukuti libe ica kweseshapo abantu pa kuti balinge ukuba abana bakwe aba ku mupashi no kuyaikala ku muulu, nge fyo amacalici ayengi aya mu Kristendomu yasambilisha. Kwaliba umulandu apangile isonde, alipangile “ukwikalwamo.” (Esaya 45:18) Lesa apangile isonde ukuti abantu baleikalamo, kabili abumbile abantu ukuti baleikala pe sonde. (Amalumbo 115:16) Isonde lyonse lyali no kuba paradaise uwaikalamo abantu abalungama abali no kulaliwamya. Lesa taebele abantunse ba kubalilapo ukuti mu kuya kwa nshita bali no kuya ku muulu.—Ukutendeka 1:26-28; 2:7, 8, 15.

Ukufwaya kwa kwa Lesa Kwasonsombwa

4. Bushe inshila Yehova atekelamo yatwishikwe shani lintu fye abantunse babumbilwe?

⁴ Umwana wa kwa Lesa uwa ku mupashi umo alipondweke kabili aiminine pa kufulunganya ukufwaya kwa kwa Yehova. Abomfeshe bubi bubi ica bupe Lesa amupeele ica kuisalila ica  kuti aletele icimfulumfulu pali bonse abaitemenwa ukunakila bumulopwe bwa kwa Yehova. Satana alengele abantunse ba kubalilapo ukupondokela Lesa. (Ukutendeka 3:1-6) Takeene ukuti Yehova alikwata amaka, lelo atwishike inshila Yehova atekelamo abantunse nelyo insambu Shakwe isha kuteka abantu. Kanshi, Satana aimishe umulandu wakuma bumulopwe bwa kwa Yehova lintu fye abantunse babumbilwe.

5. Mulandu nshi na umbi uo Satana aimishe, kabili wakuma bani?

⁵ Icayampana sana no yu mulandu wa bumulopwe bwa kwa Yehova, mulandu na umbi uo Satana aimishe mu nshiku sha kwa Yobo. Satana atwishike icilenga abantunse ukunakila Yehova no kulamubombela. Atile abantu balabombela Yehova pantu alabacitilapo fimo, lelo nga baeshiwa kuti bamwalukila. (Yobo 1:7-11; 2:4, 5) Nangu ca kuti Satana aletwishika abantunse ababombela Yehova, uyu mulandu walikumine na bana ba kwa Lesa aba ku mupashi, ukusanshako fye no Mwana wa kwa Yehova uwafyalwa eka.

6. Bushe Yehova alangile shani ukuti afwaya ubufwayo bwakwe bukafikilishiwe nga fintu fye ne shina lyakwe lipilibula?

⁶ Apo alefwaya ukuti ubufwayo bwakwe bufikilishiwe, nge fyo ne shina lyakwe lipilibula, Yehova aishileba Kasesema kabili Kapususha. * Aebele Satana ukuti: “Ndebika ubulwani pa kati ka iwe no mwanakashi, na pa kati ka bufyashi bobe no bufyashi bwakwe. Bwena bukakulasa ku mutwe nobe ukabulasa ku citende.” (Ukutendeka 3:15, NW) Ukupitila mu bufyashi bwa “mwanakashi” wakwe, nelyo ukuteyanya kwakwe ukwa mu muulu, Yehova akapwisha umulandu Satana aimishe no kupeela abantunse isubilo lya kulubuka no bumi.—Abena Roma 5:21; Abena Galatia 4:26, 31.

“Inkaama Yashila iya Kufwaya Kwakwe”

7. Kufwaya nshi uko Yehova asokolwele ukupitila mu mutumwa Paulo?

⁷ Muli kalata ou alembele Abena Kristu ba ku Efese, umutumwa Paulo alilondolwele bwino ifyo Yehova angalila ifintu pa kuti afikilishe ukufwaya kwakwe. Alembele ukuti: “Alengele twishibe inkaama yashila iya kufwaya kwakwe. Awe umwabela ukubekwa kwakwe uko afwaile umwine ukuti kube ubwangalishi pa mwisulo wa nshita shasontwa, e kutila, ukulonganya pamo na kabili ifintu fyonse muli Kristu, ifya mu muulu ne fya pano isonde.” (Abena Efese 1:9, 10) Ico Yehova afwaya kwikatanya ifibumbwa fyonse ifinakila kuli bumulopwe bwakwe. (Ukusokolola 4:11) Lyena, ishina Lyakwe likacindikwa, e lyo Satana akasangwa ukuti wa bufi, kabili ukufwaya kwa kwa Lesa ‘kukacitwa pano isonde nga mu muulu.’—Mateo 6:10.

8. Ni mwi mwalola ishiwi lyapilibulwa ukuti “ubwangalishi”?

⁸ “Ukubekwa” kwa kwa Yehova, nelyo ukufwaya kwakwe kukafikilishiwa ukupitila mu “bwangalishi.” Paulo abomfeshe ishiwi ililosha  ku “nshila ya kubombelamo ifintu pa ng’anda.” Ili shiwi talilosha ku buteko, pamo ngo Bufumu bwa buMesia, lelo lilosha ku nshila ya kubombelamo ifintu. * Inshila isuma iyo Yehova akabomfya ukwangalila ifintu pa kufikilisha ukufwaya kwakwe isanshamo “inkaama yashila” iyali no kusokololwa panono panono mu kupita kwa myaka.—Abena Efese 1:10; 3:9.

9. Bushe Yehova alesokolola shani panono panono inkaama yashila iya kufwaya kwakwe?

⁹ Ukupitila mu fipangano fyalekanalekana, Yehova asukile asokolola ifyo ukufwaya kwakwe ukwakuma ubufyashi bwalaiwe mu Edeni kukafikilishiwa. Icipangano apangene na Abrahamu casokolwele ukuti bulya bufyashi bwalaiwe bukesafyalwa pano isonde mu lupwa lwa kwa Abrahamu no kuti muli bwena emo “inko shonse isha pe sonde” shikapaalilwa. Cilya cipangano casokolwele no kuti kukaba na bambi abakabombela pamo no bufyashi bwa kubalilapo. (Ukutendeka 22:17, 18) Icipangano ce Funde ico Yehova apangene na bena Israele cisokolola ukufwaya kwa kwa Yehova ukwa kukwata “ubufumu bwa bashimapepo.” (Ukufuma 19:5, 6) Icipangano apangene na Davidi cilanga ukuti ubufyashi bukaba Intungulushi ya Bufumu ku ciyayaya. (2 Samwele 7:12, 13; Amalumbo 89:3, 4) Lintu icipangano ce Funde catungulwile abaYuda kuli Mesia, Yehova asokolwele na fimbi pa fyo ukufwaya kwakwe kukafikilishiwa. (Abena Galatia 3:19, 24) Asokolwele ukuti abantunse abakabombela pamo no bufyashi bwa kubalilapo e bakapanga “ubufumu bwa bashimapepo” kabili bakatwalwa mu “cipangano cipya” no kuba “Israele” mupya  uwa ku mupashi.—Yeremia 31:31-34; AbaHebere 8:7-9. *

10, 11. (a) Bushe Yehova asokolwele shani Ubufyashi bwalaiwe? (b) Mulandu nshi Umwana wafyalwa eka uwa kwa Lesa aishile kwi sonde?

¹⁰ Pa kufikilisha ubwangalishi bwa kufwaya kwa kwa Lesa, inshita yalifikile iya kuti ubufyashi bumoneke pe sonde. Yehova atumine malaika Gabriele ku kweba Maria ukuti akafyala umwana mwaume uukenikwa ukuti Yesu. Malaika atile kuli Maria: “Uyu akaba umukalamba kabili aketwa Umwana wa Wapulamo; kabili Yehova Lesa akamupeele cipuna ca bufumu ica kwa Davidi wishi, kabili akabe mfumu pe na pe pa ng’anda ya kwa Yakobo, no bufumu bwakwe tabwakabe ne mpela.” (Luka 1:32, 33) Ifi e fyo ubufyashi bwalaiwe bwaishibikwe bwino bwino.—Abena Galatia 3:16; 4:4.

¹¹ Umwana wafyalwa eka uwa kwa Yehova ali no kwisa kwi sonde kabili ali no kweshiwa mpaka ne mfwa. Ubwasuko bwine bwine ku mulandu ulya Satana aimishe bwashintilile pali Yesu. Nomba bushe ali no kutwalilila uwa cishinka kuli Wishi? Yali ni nkaama yashila. Pa numa, umutumwa Paulo alondolwele umulimo Yesu abombele ukuti: “Ica nkaama yashila ica uku kuipeelesha kuli bukapepa cikalamba nga nshi: ‘Alengelwe ukumoneka mu mubili, alungamikilwe ku mupashi, amonekele kuli bamalaika, ashimikilwe mu bena fyalo, atetekelweko mu calo, apokelelwe mu muulu mu bukata.’” (1 Timote 3:16) Ca cine, bucishinka bwa kwa Yesu ukufika na ku mfwa bwali bwasuko bwine bwine ku mulandu Satana aimishe. Lelo kwali na fimbi pa nkaama yashila ifyali no kusokololwa.

“Inkaama Yashila iya Bufumu bwa kwa Lesa”

12, 13. (a) Cinshi casanshiwamo mu “nkaama yashila iya bufumu bwa kwa Lesa”? (b) Cinshi cabimbilwemo ilyo Yehova alesala abantu abanono fye aba kuyaikala ku muulu?

¹² Ilyo Yesu aleshimikila ku Galili, alangilile ukuti inkaama yashila yalyampene sana no Bufumu bwakwe ubwa buMesia. Aebele abasambi bakwe ukuti: “Imwe mwalipeelwa ukumfwikisha ifya nkaama yashila ifya bufumu bwa mu muulu [“ubufumu bwa kwa Lesa,” Marko 4:11].” (Mateo 13:11) Muli iyi nkaama mwasanshiwe ukusala abantu 144,000 aba mu “mukuni unono” abali no kubombela pamo no Mwana wakwe, ukuteka pamo na wena mu muulu.—Luka 12:32; Ukusokolola 14:1, 4.

¹³ Apo Yehova abumbile abantu ukwikala pe sonde, pa kuti bamo baye ku muulu kano abapanga ‘ifibumbwa fipya.’ (2 Abena Korinti 5:17) Umutumwa Petro uwali pa basalilwe ukuyaikala ku muulu alembele ukuti: “Abe uwacindikwa Lesa kabili Wishi wa kwa Shikulwifwe Yesu Kristu, pantu umwabela uluse lwakwe ulukalamba atufyele cipya cipya mwi subilo lya bumi ukupitila mu kubuushiwa kwa kwa Yesu Kristu ku bafwa, ukulola ku bupyani ubushingabola kabili ubushakowela kabili ubushibonsa. Bwabakilwa imwe mu muulu.”—1 Petro 1:3, 4.

14. (a) Bushe abashili baYuda basanshiwamo shani mu “nkaama yashila iya bufumu bwa kwa Lesa”? (b) Mulandu nshi twaishibila ifi “ifyashika fya kwa Lesa”?

¹⁴ Na cimbi icasanshiwemo mu nkaama yashila iyakumine Ubufumu bwa ku nshita ya ku ntanshi cali kufwaya kwa kwa Lesa ukwa kusansha abashili baYuda mu mpendwa iinono fye iya bakateka na Kristu mu muulu. Paulo alondolwele ulu lubali lwa “bwangalishi” bwa kwa Yehova, nelyo inshila ya kubombelamo pa kufikilisha ukufwaya kwakwe ukuti: “Mu nkulo shimbi iyi nkaama tayalengelwe ukwishibikwa ku bana ba bantu nge fyo yasokololwa nomba mu mupashi ku batumwa bakwe na bakasesema bakwe aba mushilo, pa kuti abena fyalo babe impyani shinensu kabili ifilundwa fya mubili umo kabili abakumako pamo na ifwe ku cilayo muli Kristu Yesu icaishile mu mbila nsuma.” (Abena Efese 3:5, 6) Lesa asokolwele ulu lubali lwa nkaama yashila ku ‘batumwa aba mushilo.’ Cimo cine na muno nshiku, ukwabula umupashi wa mushilo, nga tatwaishiba ifi “ifyashika fya kwa Lesa.”—1 Abena Korinti 2:10; 4:1; Abena Kolose 1:26, 27.

15, 16. Mulandu nshi Yehova asalile abakateka pamo na Kristu mu bantunse?

¹⁵ “Aba makana umwanda umo na makana makumi yane na makana yane (144,000)” abaiminina no “Mwana wa mpaanga” pa Lupili lwa Sione wa ku muulu “bashitilwe pe sonde,” “bashitilwe mu bantunse ukuti babe ifisabo fya ntanshi kuli Lesa na ku Mwana wa mpaanga,” Kristu Yesu. (Ukusokolola 14:1-4) Yehova asalile uwa ntanshi pa bana bakwe aba ku muulu ukuba ubufyashi bwalaiwe mu Edeni. Nomba mulandu nshi asalile aba kubomba pamo na Kristu mu bantunse? Umutumwa Paulo alondolola ukuti abapanga iyi mpendwa iinono “baitwa umwabela ukufwaya kwakwe [Yehova],” “umwabela ukubekwa kwa kufwaya kwakwe.”—Abena Roma 8:17, 28-30; Abena Efese 1:5, 11; 2 Timote 1:9.

¹⁶ Icaba ukufwaya kwa kwa Yehova kucindika ishina lyakwe ilyakulisha kabili ilya mushilo no kwebela bumulopwe bwakwe. Ukupitila mu “bwangalishi” bwakwe ubusuma nga nshi, nelyo inshila ya kubombelamo ifintu, Yehova atumine Umwana wakwe ibeli pe sonde, apo aeshiwe mpaka ne mfwa. Na kabili, Yehova apingwilepo ukuti mu Bufumu bwa Mwana wakwe ubwa buMesia mukabe abantunse abatungilile bumulopwe bwakwe mpaka ne mfwa yabo.—Abena Efese 1:8-12; Ukusokolola 2:10, 11.

17. Mulandu nshi tutemenwa ukwishiba ukuti Kristu na bakateka banankwe balipo abantunse kale?

¹⁷ Yehova alangile ukuti alitemwa sana abana ba kwa Adamu lintu atumine Umwana wakwe kwi sonde na lintu asalile abantunse ukupyana Ubufumu pamo no Mwana wakwe. Bushe bambi aba cishinka kuli Yehova, ukutendekela pali Abele ukufika na muno nshiku, kuti banonkelamo shani? Apo abantunse bashapwililika bafyalilwa mu busha bwa lubembu ne mfwa, bakabila ukundapwa ku mubili na ku mupashi, ukuba abapwililika kwati fye ni fintu Yehova alefwaya abantu ukuba pa kutendeka. (Abena Roma 5:12) Ala bonse abakwata isubilo lya kwikala pe sonde balasansamuka ilyo beshiba ukuti Kristu Imfumu yabo akabatemwa kabili akaba uwa cikuuku kuli bena kwati ni filya ali ku basambi bakwe ilyo ali pano isonde! (Mateo 11:28, 29; AbaHebere 2:17, 18; 4:15; 7:25, 26) Kabili balakoseleshiwa ukwishiba ukuti abakalateka pamo na Kristu mu muulu bakaba baume na banakashi bacitetekelo abali na mabunake kabili abapita mu mafya yamo yene nayo bapitamo!—Abena Roma 7:21-25.

Ukufwaya kwa kwa Yehova Ukukafikilishiwa

18, 19. Mulandu nshi twaishibila bwino umwalola amashiwi ya kwa Paulo ayasangwa pa Abena Efese 1:8-11, kabili finshi tukalandapo mu cipande cikonkelepo?

¹⁸ Nomba twaishiba umwalola amashiwi Paulo alembele Abena Kristu basubwa ayasangwa pa Abena Efese 1:8-11. Atile Yehova alibasokolwele “inkaama yashila iya kufwaya kwakwe,” iya kuti ‘balisontwa ukuba impyani’ pamo na Kristu, no kuti ‘balilingiilwe kabeela umwabela ubufwayo bwa ubomba fyonse umwabela ukupanga kwa kufwaya kwakwe.” Twalishiba ukuti ifi filomfwana no “bwangalishi” busuma ubwa kwa Yehova ubo abomfya ku kufikilisha ukufwaya kwakwe. Ici calenga no kuti twishibe bwino umulandu Abena Kristu abanono fye pa basangwa ku Mulalilo wa kwa Shikulu e balyako ifimpashanya.

¹⁹ Mu cipande cikonkelepo tukalanda pa fyo Icibukisho ca mfwa ya kwa Kristu cipilibula ku Bena Kristu bakwata isubilo lya kwikala ku muulu. Kabili tukasambilila no mulandu abengi nga nshi abakwata isubilo lya kwikala pe sonde balingile ukubikilako sana amano ku fyo Icibukisho cipilibula.

[Futunoti]

Ukupitulukamo

• Mulandu nshi Yehova apangile isonde no kubikamo abantu?

• Mulandu nshi calingile ukuti Umwana wafyalwa eka uwa kwa Yehova ese pe sonde no kweshiwa?

• Mulandu nshi Yehova asalile abakateka pamo na Kristu mu bantunse?

[Amepusho]