Ukulonganya Ifya Mu Muulu Ne Fya Pano Isonde

‘Umwabela ukubekwa kwakwe . . . akalonganya pamo na kabili ifintu fyonse muli Kristu, ifya mu muulu ne fya pano isonde.’—ABENA EFESE 1:9, 10.

1. Cinshi caba “ukubekwa” kwa kwa Yehova ukwa myulu ne sonde?

UMUTENDE PA FIBUMBWA FYONSE! Uku e kufwaya kwa kwa Yehova, “Lesa wa mutende.” (AbaHebere 13:20) Apuutilemo umutumwa Paulo ukulemba ukuti “ukubekwa kwakwe” kwaba “kulonganya pamo na kabili ifintu fyonse muli Kristu, ifya mu muulu ne fya pano isonde.” (Abena Efese 1:9, 10) Bushe ni mwi mwalola amashiwi yatila “ukulonganya pamo na kabili” muli ici cikomo? Uwasoma J. B. Lightfoot alandapo ukuti: “Aya mashiwi yapilibula ukwikatana pamo ukwa fibumbwa fyonse, ukwabula ubulwani na malekano, lelo ifibumbwa fyonse fikashintilila no kwikatana pamo muli Kristu. Ulubembu ne mfwa, ubulanda no kupelenganishiwa no kucula, fikapwa.”

“Ifya mu Muulu”

2. Ni bani baba “ifya mu muulu” ifili no kulonganikwa?

² Umutumwa Petro alisupwile ilyo alelanda pe subilo lisuma ilya Bena Kristu, alembele ukuti: “Kuli imyulu ipya ne sonde lipya ifyo tulelolela umwabela ubulayo bwakwe, na muli fyene e mukekala ubulungami.” (2 Petro 3:13) “Imyulu ipya” iyalaiwe buteko bupya, e kutila Ubufumu bwa buMesia. “Ifya mu muulu” ifyo umutumwa Paulo alandilepo muli kalata wakwe ku bena Efese ifikalonganikilwa “muli Kristu,” fyaba ni mpendwa inono iya bantunse basalwa ukuyateka pamo na Kristu mu muulu. (1 Petro 1:3, 4) Aba Bena Kristu basubwa ababa 144,000 “bashitilwe pe sonde,” “bashitilwe mu bantunse,” ku kuba impyani shinankwe na Kristu mu Bufumu ubwa mu muulu.—Ukusokolola 5:9, 10; 14:3, 4; 2 Abena Korinti 1:21; Abena Efese 1:11; 3:6.

3. Mulandu nshi cingasoselwa ukuti abasubwa ‘balikala mu mekalo ya mu muulu’ na lintu bacili pe sonde?

³ Abena Kristu basubwa balifyalwa libili ku mupashi wa mushilo pa kuti babe abana ba ku mupashi aba kwa Yehova. (Yohane 1:12, 13; 3:5-7) Apo Yehova alibabuula ukuba “abana,” basanguka bamunyina ba kwa Yesu. (Abena Roma 8:15; Abena Efese 1:5) Nangu ni lintu bali pe sonde, bamonwa nga ‘babuushiwa no kwikala capamo mu mekalo ya mu muulu muli Kristu Yesu.’ (Abena Efese 1:3; 2:6) Bakwata ici cifulo cikalamba pantu ‘balikakatikwa ku mupashi wa mushilo uwalaiwe, ico e ciikatilo capeelelwa libeela ica bupyani bwabo’ ubo babasungila mu muulu. (Abena Efese 1:13, 14; Abena Kolose 1:5) Aba, baba e “fya mu muulu,” abo impendwa yabo iyo Yehova alingile kabela ifwile ukulonganikwa.

Ukulonganya Kwatendeka

4. Ni lilali ukulonganya “ifya mu muulu” kwatendeke, kabili kwatendeke shani?

⁴ Ukulingana no “bwangalishi” bwa kwa Yehova, nelyo inshila ya kubombelamo ifintu, ukulonganya “ifya mu muulu” kwali no kutendeka “ pa mwisulo wa nshita shasontwa.” (Abena Efese 1:10) Iyi nshita yakwene pa Pentekoste mu 33 C.E. Pali bulya bushiku, umupashi wa mushilo walipongolwelwe pa batumwa na pa basambi, abaume na banakashi. (Imilimo 1:13-15; 2:1-4) Ici calangilile ukuti icipangano cipya nacitendeka ukubomba, kabili uku kwali  e kutendeka kwa cilonganino ca Bena Kristu no luko lupya ulwa kwa Israele wa ku mupashi, “Israele wa kwa Lesa.”—Abena Galatia 6:16; AbaHebere 9:15; 12:23, 24.

5. Mulandu nshi Yehova apangile “uluko” ulupya ulwa kupyana abena Israele?

⁵ Icipangano ce Funde ico Lesa apangene na bena Israele tacaleteleko “ubufumu bwa bashimapepo kabili uluko lwa mushilo” ulwali no kulabombela mu muulu ku ciyayaya. (Ukufuma 19:5, 6) Yesu aebele intungulushi sha mapepo isha baYuda ukuti: “Ubufumu bwa kwa Lesa bukapokwa kuli imwe no kupeelwa ku luko ulutwale fisabo fya buko.” (Mateo 21:43) Lulya luko, Israele wa ku mupashi, lwapangwa na Bena Kristu basubwa ababa mu cipingo cipya. Kuli aba, umutumwa Petro alembele ukuti: “Muli ‘mushobo uwasalwa, bushimapepo bwa cifumu, uluko lwa mushilo, abantu abali cikwatwa caibela, ukuti mubilishe konse konse ukupuulama’ kwa wamwitile ukuti mufume mu mfifi mwingile mu lubuuto lwakwe ulwapesha amano. Pantu kale tamwali bantu, lelo nomba muli bantu ba kwa Lesa.” (1 Petro 2:9, 10) Yehova alifumyapo icipangano apangene na bena Israele. (AbaHebere 8:7-13) Nge fyo Yesu asobele, ishuko lya kuba mu Bufumu bwa buMesia lyalipokelwe ku bena Israele no kupeelwa kuli ba144,000 abapanga Israele wa ku mupashi.—Ukusokolola 7:4-8.

Ababa mu Cipangano ca Bufumu

6, 7. Cipangano nshi icaibela ico Yesu apangene na bamunyina bakwe aba ku mupashi, kabili cipilibula cinshi kuli bena?

⁶ Pa bushiku Yesu acitile Icibukisho ca mfwa yakwe, aebele abasambi bakwe aba cishinka ukuti: “Ni mwe mwe batwalilila na ine mu fya kunjesha; kabili ndepangana na imwe icipingo, ifyo na Tata apangana na ine icipingo ca bufumu, ukuti mukalye no kunwa pe tebulo lyandi mu bufumu bwandi, no kwikala pa fipuna fya bufumu ku kupingule mikowa ikumi na ibili (12) iya kwa Israele.” (Luka 22:28-30) Yesu pano alelosha ku cipingo ico apangene na ba144,000 bamunyina bakwe aba ku mupashi ‘abakacimfya’ pa kuba aba “cishinka ukufika na ku mfwa.”—Ukusokolola 2:10; 3:21.

⁷ Aba muli ili bumba ilinono balaleka ukuba ne subilo lya kwikala pe sonde ku ciyayaya nge fyo caba ku bantu ba munofu no mulopa. Bakateka na Kristu mu muulu, bakekala pa fipuna ku kupingula abantunse. (Ukusokolola 20:4, 6) Nomba natulande pa malembo ayalanda fye pali aba Bena Kristu basubwa kabili ayalanga mulandu aba “mpaanga shimbi” bashililako ifimpashanya pa Cibukisho.—Yohane 10:16.

8. Cinshi abasubwa balangilila ilyo balyako umukate? (Moneni umukululo pe bula 23.)

⁸ Abasubwa bakacula nge fyo Kristu aculile kabili bali-ipekanya ukufwa imfwa nga ilya afwileko. Paulo uwaba muli ili bumba atile ali-ipekenye ukucita icili conse ku ‘kunonka Kristu pa kuti amwishibe na maka ya kubuuka kwakwe no kukumako ku fya kucula fyakwe.’ Ca cine, Paulo ali-ipekenye ukufwa “imfwa iyapalana ne yakwe [Kristu].” (Abena Filipi 3:8, 10) Abena Kristu basubwa abengi balishipikisha “ukulungulusha kwa mfwa uko Yesu alungulushiwe.”—2 Abena Korinti 4:10.

9. Mubili wa musango nshi uwimininwako no mukate wa pa Cibukisho?

⁹ Lintu Yesu acitile Umulalilo wa kwa Shikulu atile: “Uyu mubili wandi.” (Marko 14:22) Alelosha ku mubili wakwe wine, pantu bali no kumulopaula kabili umubili wakwe wali no kukantaikwa ku mulopa. Umukate wabula icitutumushi walilingile sana ukwimininako umubili wakwe. Mulandu nshi? Pantu mu Baibolo icitutumushi cimininako ulubembu nelyo ububifi. (Mateo 16:4, 11, 12; 1 Abena Korinti 5:6-8) Yesu ali uwapwililika kabili mu mubili wakwe tamwali lubembu. Ali no kupeela ulya mubili nge lambo lya kukonsolwela imembu. (AbaHebere 7:26; 1 Yohane 2:2) Ukupeela umubili wakwe ilambo kwali no kunonsha Abena Kristu bonse aba cishinka, nampo nga bakwata isubilo lya bumi bwa ku muulu nelyo ubumi bwa ciyayaya muli paradaise pe sonde.—Yohane 6:51.

10. Ni mu nshila nshi abanwako umwangashi pa Cibukisho ‘bakumwako ku mulopa wa kwa Kristu’?

 ¹⁰ Ukulosha ku mwangashi uo Abena Kristu basubwa banwako pa Cibukisho, Paulo alembele ukuti: “Ulukombo lwe paalo ulo tupaala, bushe talwakumako ku mulopa wa kwa Kristu?” (1 Abena Korinti 10:16) Ni mu nshila nshi abanwako umwangashi ‘bakumwako ku mulopa wa kwa Kristu’? Kwena tacilolele mu kuti balapeelako icilubula, pantu nabo bene balakabila ukulubulwa. Ukupitila mu citetekelo cabo mu maka ya kulubula aya mulopa wa kwa Kristu, imembu shabo shilalekelelwa kabili balalungamikilwa ku bumi mu muulu. (Abena Roma 5:8, 9; Tito 3:4-7) Ni ku mutengo wa mulopa wasumine uwa kwa Kristu eko ba144,000 impyani shinankwe isha kwa Kristu ‘bashishiwa,’ ukupaatulwa, nelyo ukusangululwa pa kuti babe “aba mushilo.” (AbaHebere 10:29; Daniele 7:18, 27; Abena Efese 2:19) Ni ku mulopa wakwe uwasumine eko Kristu ‘ashitiile Lesa abantu ukufuma mu mutundu onse no lulimi na bantu no luko, kabili abacitile ubufumu kabili bashimapepo kuli Lesa wesu, kabili bakaba ishamfumu pe sonde.’—Ukusokolola 5:9, 10.

11. Cinshi abasubwa balanga ilyo banwako umwangashi pa Cibukisho?

¹¹ Ilyo Yesu acitile Icibukisho ca mfwa yakwe pa muku wa kubalilapo, apeele abatumwa bakwe aba cishinka ulukombo umwali umwangashi no kutila: “Nwenimo imwe bonse; pantu lwene ‘mulopa wandi uwa cipingo,’ uulesuumina pa mulandu wa bengi ku kulekelelwa imembu.” (Mateo 26:27, 28) Kwati fye ni filya umulopa wa ng’ombe no wa mbushi waikeshe icipingo ico Yehova apangene na bena Israele, e fyo no mulopa wa kwa Yesu na o waikeshe icipingo cipya ico Yehova acitile na Israele wa ku mupashi pa Pentekoste mu 33 C.E. (Ukufuma 24:5-8; Luka 22:20; AbaHebere 9:14, 15) Kanshi ilyo abasubwa banwa umwangashi uwimininako “umulopa wa cipingo,” balanga ukuti baba mu cipingo cipya no kuti balanonkelamo.

12. Bushe abasubwa babatishiwa shani mu mfwa ya kwa Kristu?

¹² Ukunwa umwangashi pa Cibukisho kulacinkulako abasubwa pa fintu na fimbi. Yesu aebele abasambi bakwe aba cishinka  ukuti: “Ulukombo ulo ine ndenwenamo, na imwe mukanwenamo, no lubatisho ulo ndebatishiwako, na imwe mukabatishiwako.” (Marko 10:38, 39) Pa numa, umutumwa Paulo alandile pa Bena Kristu ukuti ‘balabatishiwa mu mfwa ya kwa Kristu.’ (Abena Roma 6:3) Imikalile ya basubwa yaba fye iya kuipeelesha. Imfwa yabo ya kuipeelesha pantu tababa ne subilo lya kwikala pe sonde ku ciyayaya. Ukubatishiwa mu mfwa ya kwa Kristu ukwa Bena Kristu basubwa kupwishishiwa lintu bafwa aba cishinka lyena no kubuushiwa nge fibumbwa fya mupashi ku ‘kuteka nge shamfumu’ mu muulu pamo na Kristu.—2 Timote 2:10-12; Abena Roma 6:5; 1 Abena Korinti 15:42-44, 50.

Ukulyako Ifimpashanya

13. Mulandu nshi abakwata isubilo lya kwikala pe sonde bashilila ifimpashanya pa Cibukisho, lelo mulandu nshi basangilwa ku Cibukisho?

¹³ Apo ukulya umukate no kunwa umwangashi pa Cibukisho kusanshamo fyonse ifi, ukwabula no kutwishika tacilingile ukuti abakwata isubilo lya kwikala pe sonde balelyako. Abakwata isubilo lya kwikala pe sonde baleshiba ukuti tabasubwa kabili tababa mu mubili wa kwa Kristu, nelyo mu cipingo cipya ico Yehova apangana na bakateka pamo na Yesu Kristu. Apo “ulukombo” lwimininako icipingo cipya, kanshi abafwile ukulyako ifimpashanya ni balya fye ababa mu cipingo cipya. Abakwata isubilo lya kuba no bumi bwa muyayaya pe sonde tababatishiwa mu mfwa ya kwa Yesu kabili tabaitwa ku kuyateka pamo nankwe mu muulu. Ukulyako ifimpashanya kuti kwapilibula ukucita ico bashilingile ukucita. E mulandu wine bashiliila ifimpashanya, nangu ca kuti ku Cibukisho kwena balasangwako. Balatasha pali fyonse ifyo Yehova abacitila ukupitila mu Mwana wakwe, ukusanshako ne fyo ababelela uluse ukubomfya umulopa wasumine uwa kwa Kristu.

14. Bushe abasubwa bakoshiwa shani lwa ku mupashi ilyo balyako umukate no kunwako umwangashi?

¹⁴ Ukukakatikwa kwa kupelako ukwa mpendwa inono iya Bena Kristu abaitwa ukuyateka na Kristu mu muulu kuli mupepi no kupwa. Ukulyako ifimpashanya pa Cibukisho kulakosha Abena Kristu basubwa ukufikila bapwisha ubumi bwa pano isonde ubwa kuipeelesha. Balikatana nga nshi na bamunyinabo ne nkashi ababa mu mubili wa kwa Kristu. Ukulya umukate no kunwo mwangashi kubacinkulako ukuti bafwile ukuba aba cishinka mpaka ne mfwa.—2 Petro 1:10, 11.

Ukulonganika “Ifya Pano Isonde”

15. Ni bani balonganikwa pamo na Bena Kristu basubwa?

¹⁵ Ukutula muli ba1930, impendwa iikalamba iya “mpaanga shimbi” abashaba mu “mukuni unono” kabili abakwata isubilo lya kwikala pe sonde yali-ilunda ku basubwa. (Yohane 10:16; Luka 12:32; Sekaria 8:23) Baba ifibusa fya cishinka ifya bamunyina ba kwa Kristu ifibaafwa sana ukushimikila ‘imbila nsuma iya bufumu’ ku kubo bunte ku nko shonse. (Mateo 24:14; 25:40) Ukucite fyo, kukalenga ukuti Kristu akabapingule bwino ilyo akesa ku kupingule nko, akabasunga kwati ni “mpaanga” shakwe, ishaba “ku kwa kulyo” kwakwe. (Mateo 25:33-36, 46) Apo balikwata icitetekelo mu mulopa wa kwa Kristu, bakapanga “ibumba likalamba” ilikapusuka “ubucushi bukalamba.”—Ukusokolola 7:9-14.

16. Ni bani bakasanshiwa mu “fya pano isonde,” kabili aba bonse bakakwata shani ishuko lya kuba “abana ba kwa Lesa”?

¹⁶ Lintu aba kulekelesha pali ba144,000 bakakakatikwa,  bamalaika bakalekelako ku “myela” ya bonaushi pa kuti ikonaule ubwikashi bwa kwa Satana ubwa pe sonde. (Ukusokolola 7:1-4) Mukati ka Kuteka kwa Myaka Ikana Limo ukwa kwa Kristu ne shamfumu shinankwe, abantu abengi nga nshi bakabuushiwa no kuisansha kwi bumba likalamba. (Ukusokolola 20:12, 13) Aba bakakwata ishuko lya kulatekwa na Yesu Kristu, Imfumu ya buMesia, ku ciyayaya. Pa numa ya Myaka Ikana Limo, ifi fyonse “ifya pano isonde” fikeshiwa mu bwesho bwa kupelako. Abakaba aba cishinka bakaba “abana ba kwa Lesa” aba pe sonde.—Abena Efese 1:10; Abena Roma 8:21; Ukusokolola 20:7, 8.

17. Bushe ukufwaya kwa kwa Yehova kukafikilishiwa shani?

¹⁷ Kanshi, ukupitila mu “bwangalishi” bwakwe ubusuma nga nshi, nelyo inshila ya kubombelamo ifintu, Yehova akaba nafikilisha ukufwaya kwakwe ukwa “kulonganya pamo na kabili ifintu fyonse muli Kristu, ifya mu muulu ne fya pano isonde.” Ifibumbwa fyonse ifya mu muulu ne fya pano isonde fikalonganikwa pamo mu mutende, kabili fikalasekelela ilyo fikalanakila ku kuteka kwalungama ukwa kwa Yehova, Lesa uufikilisha amalayo no kufwaya kwakwe.

18. Bushe abasubwa na banabo bakanonkelamo shani mu kusangwa ku Cibukisho?

¹⁸ Ala kwena cikawama ilyo impendwa iinono iya basubwa bakakumana pamo na banabo aba “mpaanga shimbi” pa 12 April, 2006! Bakakoseleshanya icine cine. Bakalasefya Icibukisho ca mfwa ya kwa Yesu, ukumfwila ifyo Yesu umwine alandile. Atile: “Mulecite ici ku kunjibukisha.” (Luka 22:19) Bonse abakasangwako bakebukisha ifyo Yehova abacitila ukupitila mu Mwana wakwe uwatemwikwa Kristu Yesu.

Ukupitulukamo

• Cinshi caba ukufwaya kwa kwa Lesa ku fya mu muulu ne fya pano isonde?

• Ni bani baba “ifya mu muulu,” kabili balonganikwa shani?

• Ni bani baba “ifya pano isonde,” kabili lisubilo nshi lyasanshiwamo?

[Amepusho]

[Akabokoshi pe bula 23]

“Umubili wa kwa Kristu”

Mu fyebo asosele ku Bena Kristu basubwa kabili bamunyina ba kwa Kristu pali 1 Abena Korinti 10:16, 17, Paulo alandile pa “mubili” mu nshila yaibela. Atile: “Umukate uo tumokaula, bushe tawakumako ku mubili wa kwa Kristu? Pantu kuli umukate umo, ifwe, nelyo tuli abengi, tuli umubili umo, pantu ifwe bonse tukumako kuli uyo mukate umo.” Ilyo Abena Kristu basubwa balya umukate pa Cibukisho, babila ukwikatana kwaba mu cilonganino ca basubwa, icaba ngo mubili e lyo Kristu ngo Mutwe.—Mateo 23:10; 1 Abena Korinti 12:12, 13, 18.

[Ifikope pe bula 23]

Mulandu nshi abasubwa beka fye e balyako umukate no kunwa umwangashi?

[Icikope pe bula 25]

Ukupitila mu bwangalishi bwa kwa Yehova, ifibumbwa fyonse ifya mu muulu ne fya pano isonde fikekatana