Bushe Mulafwaya Ukukwata Ifibusa Ifisuma?

ABANTU abengi balafwaya ukukwata ifibusa ifisuma. Ukukwata ifibusa ifyo mwingebako fyonse ifilecitika mu mikalile yenu kulalenga mwaba aba nsansa nga nshi. Nomba, kuti mwasanga shani icibusa ca cine? Mupepi ne myaka 2,000 iyapita, Yesu alandile ukuti icacindama sana pa kuti umuntu atunguluke ilyo alebomba na bantu fye bonse, kuba no kutemwa kwa cine cine. Asambilishe ukuti: “Ifyo mufwaya abantu bacite kuli imwe, citeni ifyo fine kuli bene.” (Luka 6:31) Aya mashiwi yalanga ukuti, pa kuti mukwate ifibusa, mufwile ukuba bakapekape, te kuba bakaitemwe. Kanshi kuti twatila, pa kukwata icibusa, mufwile ukuba aba bucibusa. Kuti mwaba shani ifyo?

Te kuti mukwate icibusa ca pa mutima mu bushiku fye bumo. Pantu na kuba, icibusa te muntu uwa kwishibana fye nankwe. Muntu uo mwingebako fyonse ifya ku mukoshi. Pa kukwata icibusa ca cine cine no kutwalilila na bucibusa, kano mwabombesha. Bucibusa bufwaya kuti mulecindika ifyo umunenu alefwaya te fyo fye imwe mulefwaya. Nga umo ali ne nsansa, na cibusa wakwe na o alaba ne nsansa, kabili umo nga ali no bulanda, bonse babili balaba no bulanda.

Mulangisha ukuti muli cibusa wa cine maka maka pa kusansamusha abalekabila icisansamushi no kuipeelesha ukwafwilisha ababulilwe. Amapinda 17:17 yatila: “Icibusa citemwa mu nshita yonse, kabili munyina afyalilwo kumanama.” Na kuba, ukutemwa ukuba pa fibusa limo kuti kwacila fye na pa kutemwa ukuba pali balupwa bamo. Amapinda 18:24 yatila: “Kuli abanabo abafwayo kumono bunabo; kabili kuli icibusa icilambatilo kucilo wa bwananyina.” Bushe kuti mwatemwo kwishiba na fimbi pa fyo mwingasanga ifibusa ifisuma? Bushe kuti mwatemwa ukuba pa bantu abaishibikwa ukuti balitemwana? (Yohane 13:35) Nga kuti mwatemwa, Inte sha kwa Yehova, uko kwine mwikala, bakaba aba nsansa ukumulanga ifyo mwingasanga ifibusa fisuma.