“Twebeko na Fimbi!”

MU musumba wa Nezlobnaya, ku Russia, abana be sukulu lya ku sekondari balesambilila ifitabo ifyalembwa na kalemba umwina Russia, Mikhail Bulgakov. Pali ifi fitabo, paali ne citabo icilondolola Yesu Kristu mu musango wa musaalula nga nshi, no kulondolola Satana ukuti ni mpalume. Pa numa ya kusambilila pali ici citabo, kafundisha aebele aba mu kalasi ukuti balembe ilyashi ukufuma muli ici cine citabo. Lelo, umwana we sukulu umo, Andrey, Inte ya kwa Yehova, uwa myaka 16, mu mucinshi alombele kuli kafundisha ukuti elembako ili lyashi pantu kampingu wakwe talemusuminisha ukubelenga icitabo ca musango yu. Lelo alombele ukuti alembe ilyashi lya kulondolola ifyo amona Yesu Kristu. Kafundisha alisumine.

Mu lyashi lyakwe, Andrey alondolwele ukuti nangula alicindika ifyo bambi batontonkanya, asange fyo inshila isuma iya kusambilila pali Yesu yaba kubelenga Ilandwe limo pa Malandwe yane. Nga mwacite fyo, “mukasambilila pa bumi bwa kwa Yesu na masambilisho yakwe, pantu fyalembwa na bantu abalemonako ilyo fyalecitika.” Andrey akonkenyepo ukuti: “Ilyashi limbi lya fyo Satana alondololwa. Bamo kuti baumfwa bwino ukubelenga icitabo icilondolola Satana ukuti ni mpalume, lelo ine te kuti ntemwe.” Alondolwele ukuti Satana cibumbwa ca mupashi icakwata amaka lelo icabipa. Satana apondokele Lesa, kabili e waletele ububifi, amafya no kucula pa bantunse. Andrey asondwelele ilyashi lyakwe na mashiwi ya kuti: “Nshilesumina ukutila nga nabelenga ici citabo kuti namwenamo icili conse. Kwena, baBulgakov nshabapata. Lelo, kuti cawama kuli ine ukubelenga Baibolo pa kuti nsambilile icine pali Yesu Kristu.”

Kafundisha alitemenwe sana ifyo Andrey alembele ica kuti amwebele ukuti akapekanye ifyebo fimo pali Yesu Kristu ifya kwisalanda ku banankwe bonse mu kalasi. Andrey alisumine. Umuku wakonkelepo ilyo balesambilila ici cisambililo na kabili, Andrey abelengeele aba mu kalasi bonse ifyo alembele. Alondolwele umulandu asuminina ukuti Yesu e muntu wakulisha uwabalile abako uwa mweo. Lyene abelengele icipandwa icilanda pa mfwa ya kwa Yesu mwi buuku lya mu Baibolo ilya kwa Mateo. Apo inshita bamupeele ukulanda ilyashi yashele fye panono ukukumana, Andrey alefwaya ukusondwelela ilyashi lyakwe, lelo aba mwi kalasi batile: “Twebeko na fimbi! Finshi fyakonkelepo?” E co atwalilile ukubelenga ilyashi mwi buuku lya kwa Mateo pa kubuuka kwa kwa Yesu.

Lintu Andrey apwishishe ukulanda, abo alesambilila na bo bamwipwishe amepusho ayengi pali Yesu na pali Yehova. Andrey atila: “Nalipepele kuli Yehova ukuti ampeele amano, kabili alyaswike ipepo lyandi. Nalyaswike amepusho yonse ayo banjipwishe!” Ilyo bapwile ukusambilila, Andrey apeele kafundisha wakwe icitabo ca Umuntu Wakulisha Uwabalile Abako Uwa Mweo, * kabili kafundisha alitemenwe. Andrey atila: “Bakafundisha bampeele amatoni ayasuma sana pa lyashi nalembele kabili balintashishe pa kuti nalikwata ifyo nasuminamo kabili nshumfwa insoni ukufilanda kuli bambi. Kabili banjebele ukuti na bo balisumina muli fimo ifyo nasuminamo.”

Andrey alomfwa bwino ukuti apingwilepo ukumfwila kampingu wakwe uwasambilishiwa na Baibolo pa kukaana ukubelenga icitabo icisaalula Yehova no Mwana wakwe Yesu Kristu. Ukupampamina pa kucite ci kwalimucingilile ku kukanasumina mu fintu ifyapusana ne fyaba mu Baibolo kabili kwalengele fye no kuti akwate ishuko lya kushimikila bambi icine ca mu Baibolo icacindama.

[Futunoti]