Yehova Alasakamana Abaiceefya

UKUICEEFYA kwalicindama nga nshi kuli Yehova. Nangu ca kuti Lesa takwata imisha iili yonse ku bantunse, pa mulandu wa cikuuku cakwe aliipekanya ukubabelela uluse kabili alapaala abantu bonse abaiceefya kuli wena. Abaiceefya balalanga ukuti tabaicetekela kabili tabaitakisha, lelo bashintilila fye pali Lesa kabili bafwaya ukucita ubufwayo bwakwe. E filya na Yakobo, kalemba wa Baibolo Umwina Kristu uwapuutilwemo no mupashi alandile ukuti: “Lesa acincintila aba matutumuko, lelo apeela icikuuku ca bupe fye ku baiceefya.”—Yakobo 4:6.

Nangu fye ni balya abalecita ifintu ifyabipa nga nshi kale, na bo bene kuti baiceefya kuli Yehova no kumupaapaata ukuti ababelele uluse, kabili kuti aumfwa ukupaapaata kwabo. Ku ca kumwenako, Imfumu Manase yalelenga abekashi ba mu Yuda na Yerusalemu ukucita “ububi ukucile nko isho Yehova afitile ku cinso ca bena Israele.” Lelo lintu Yehova amulengele ukusendwa bunkole ku mfumu ya Ashuri, Manase alinakilile “apakalamba ku cinso ca kwa Lesa wa bawishi, apepele kuli wene, na o Yehova apaapaatilwe kuli wene, aumfwile no kupaapaata kwakwe, no kumubwesesha ku Yerusalemu ku bufumu bwakwe. E lyo Manase aishibe ukuti Yehova e Lesa.” Kanshi Manase alisambilile ukuiceefya.—2 Imilandu 33:9, 12, 13.

Ubusuma Bwaba mu Kuiceefya

Umuntu uwaiceefya kuli Lesa, kuti aenekela ukuti Lesa akulamutungulula. Kasesema Daniele aali nkole mu Babele, kabili alipaalilwe sana lintu malaika amoneke kuli wena ku kumulanga icimonwa cafumine kuli Lesa. Daniele apokelele ici cimonwa pantu ali uwaiceefya kuli Lesa pa kufwayafwaya ubutungulushi no kwiluka.—Daniele 10:12.

Lelo nga ca kuti umuntu aba na matutumuko, kabili alafwaya no kuti bambi balemucindika sana, kuti aseebana nge fyaseebene Imfumu ya baYuda Usia. Iyi mfumu yaishileba ne cilumba kabili yapulile mwi funde no kubomba imilimo ya bashimapepo. Baibolo itila: “Ilyo akosele watakalele umutima wakwe no kuiletelela. Afutwike kuli Yehova Lesa wakwe; aingile mwi tempele lya kwa Yehova ku kufutumwine fye fungo pa ciipailo.” Nomba ilyo bashimapepo bamuleseshe ukufutumuna ifye fungo pa ciipailo, abubukiile balya bashimapepo ubukali, kabili alikandilwe ne fibashi.—2 Imilandu 26:16-21.

Ukuiceefya kuti kwayafwa sana umuntu ilyo ali mu bwafya. Ilyo umuntu aba no bucushi, ukuiceefya kulalenga ashipikisha no kutwalilila ukubombela Lesa. Imfumu Davidi yalipitile mu mafya yalekanalekana. Imfumu Shauli yalelunga Davidi kwati cipondo. Lelo tailishenye kuli Lesa nelyo ukuisansabika pa muntu uo Yehova asubile no mupashi wakwe. (1 Samwele 26:9, 11, 23) Lintu abembwike kuli Yehova ilyo acitile ubucende na Bati-sheba, kasesema wa kwa Lesa Natani alimwebawile na maka, Davidi ali-iceefeshe kuli Lesa.—2 Samwele 12:9-23.

Ukuiceefya Mibele ya kwa Lesa

Yehova Lesa umwine alalanga ukuti ali-iceefya ilyo abelela uluse abantu ababembu na pa kuba uwa nkumbu nga nshi kuli bena. Yehova na kabili alalanga ukuti ali-iceefya mu nshila acitilamo ifintu ku bantu ababembu kabili alipeela no Mwana wakwe ukube lambo pa mulandu wa membu sha bantunse. Pa mulandu wa cikuuku cakwe, alangile inkumbu ku bana abafyelwe muli Adamu, pa kubapeela ishuko lya kwikala ubumi bwa muyayaya.—Abena Roma 8:20, 21.

Imfumu Davidi yalimwene kabili yalitashishe Lesa pali iyi mibele akwata. Ilyo Yehova apuswishe Davidi mu minwe ya balwani bakwe bonse, Davidi aimbile ati: “Mukampeela inkwela ya kupususha, kabili ukuiceefya kwenu kulankusha.” (2 Samwele 22:36, NW) Nangu ca kuti Yehova wa bukata ubukalamba nga nshi kabili aikala mu myulu umwasumbukisha, bamulondolola ukuti: “Nani uwaba nga Yehova Lesa wesu, uwasansama ku kwikala mu myulu, alolesha apatali pa myulu na pe sonde? Emyo mulanda mu lukungu, no kusumbulo mubusu ukufuma pa cishala, ku kumwikalika pamo na bakankaala, pamo na bakankaala ba bantu bakwe.”—Amalumbo 113:5-8.

 Ukuiceefya kwa kwa Yesu Kristu

Ilyo Yesu Kristu aali pano isonde, apeele ica kumwenako cawamisha ica fyo umubomfi wa kwa Lesa uwaiceefya alingile ukuba. Icungulo bushiku ilyo talafwa, Yesu abulile itaulo no kukaka mu musana, kabili atendeke ukusamba amakasa ya basambi bakwe bonse 12, no kukumuna amenshi ku makasa yabo. Abalebomba uyu mulimo ilingi line bali babomfi ba pa nshi sana nelyo abasha. (Yohane 13:2-5, 12-17) Inshita imo alyebele abasambi bakwe ukuti: “Onse uuisansabika akaceefiwa, na onse uuiceefya akasansabikwa.” (Mateo 23:12) Umutumwa Petro uwaliko bulya bushiku, aibukishe cilya ca kumwenako cisuma ico Yesu acitile kabili aishilekoselesha abasumina banankwe ukuti: “Imwe bonse, ikakeni ubupete mu misana ku kupyungilana . . . E ico, iceefyeni mwi samba lya kuboko kwa maka ukwa kwa Lesa, ukuti amusansabike mu nshita yalinga.”—1 Petro 5:5, 6.

Umutumwa Paulo akoselesha Abena Kristu ukuba no mutima uwaba ngo wa kwa Yesu Kristu. Paulo alandile pa cifulo cikalamba ico Umwana wa kwa Lesa akwete ilyo aali mu muulu pamo na Wishi Yehova, na filya aitemenwe ukwisa pano isonde, ukwisaba ngo musha, e lyo no kwisaba umuntunse. Paulo alandile no kuti: “Lelo, ilyo [Yesu] aisangile mu mibele ya buntu, ali-iceefeshe kabili aishileba uwa cumfwila ukufika na ku mfwa, awe ukufika ku mfwa pa cimuti.” Filya Yesu umwine alandile ukuti mu kuicefya mwaliba icilambu, fya cine, kabili e fyacitike kuli Yesu wine, pantu umutumwa atwalilila ukulanda ati: “E ico Lesa na o amusansabike apasumbuka kabili mu cikuuku amupeele ishina ilyacila ishina limbi lyonse.”—Abena Filipi 2:5-11.

Ne cacilapo ukucindama ca kuti, nangula alikwata icifulo cikalamba nga nshi, kabili alipeelwa ‘amaka yonse mu muulu na pano isonde’ pa kuti akacite ifyo Lesa afwaya ukuti fikacitike pano isonde, Kristu akatwalilila fye ukuba uwaiceefya mpaka fye na ku mpela ya kuteeka kwakwe ukwa Myaka Ikana Limo. (Mateo 28:18; 6:10) E ico Amalembo yatweba ukuti: “Ilyo fyonse fikalengwo kunakila wene, e lyo no Mwana umwine akanakila Uwalengele fyonse ukunakila wene, ukuti Lesa akabe fyonse muli bonse.”—1 Abena Korinti 15:28.

Abena Kristu Bafwile Ukusambilila Ukuiceefya

Ilyo alefunda Abena Kristu banankwe ukufwala ubuntu bupya, “ubulelengwa ubupya ukulingana ne cipasho ca kwa Kalenga wa buko,” umutumwa Paulo atile: “E ico, nga basalwa aba kwa Lesa, aba mushilo kabili abatemwikwa, fwaleni icitemwishi ne nkumbu, icikuuku, ubupete, ukufuuka, no kushishimisha.” (Abena Kolose 3:10, 12) Na kabili abakoseleshe ukuti: “Ifyo muletontonkanya pali mwe bene e fyo muletontonkanya na pali bambi; mwilatontonkanya ifyasansabala, lelo mutungululwe ne fya bupete. Mwiba abashilimuka mu menso yenu mwe bene.”—Abena Roma 12:16.

Ukuiceefya kulaleta umutende. Umuntu uwaiceefya talwishanya na Bena Kristu banankwe pa kuti fye bakonke ifyo alefwaya ukucita ifyo alemona ukuti nakwatapo insambu. Umutumwa alandile ukuti, nangu ca kuti alikwete ubuntungwa bwa kucita conse ico alefwaya, alecita fye ifintu ifingakuulilila bambi, kabili nga ca kuti ifyo alecita fyalecusha kampingu wa kwa munyina, aleleka ukucita ifyo fintu.—Abena Roma 14:19-21.

Na kabili tukabila ukuiceefya pa kuti tusungilile umutende na bantu bambi lintu tulecita ifyatufundile Yesu ukuti tufwile ukulekelela bambi imembu isho batubifya. (Mateo 6:12-15) Kabili lintu umo akalifya umubiye, ukuiceefya e kulenga ukuti omfwile ukufunda kwa kwa Yesu ukwa kuti afwile ukuya ku munankwe no kusumina ukuti alilufyenye, e lyo no kulomba ubwelelo. (Mateo 5:23, 24) Nelyo nga ca kuti umuntu uukalifiwe aya kuli wena, ukutemwa no kuiceefya e fikalenga ukuti uuli no mulandu eshibe ukuti alilufyenye, e lyo no kubombelapo pa kuti bapwishe bulya bwafya. (Mateo 18:15) Ukuiceefya kwa musango yo kulaleta umutende ku muntu umwine e lyo na ku cilonganino conse, kabili ukupanga umutende wa musango yu te kuti kulingane no kuyumfwa uwa panshi uko umuntu engomfwa nga ca kuti ayatununuka umubiye. Na kabili, ukutununuka umubiye, kuti kwalenga aba uwaiceefya no kulundulula iyi mibele isuma iya kuicefya.

Ukuiceefya kukafwa Umwina Kristu ukuteeka umutima mu fintu akwete, kabili kuti kwamwafwa ukutwalilila ukuba uwa nsansa no kukanafwaya ifyacilamo. Bonse abaiceefya kuti basekelela, nangu ca kuti balatitikishiwa no kucushiwa ku bantu aba cilumba kabili aba matutumuko. Kuti basansamushiwa na mashiwi aya ayatila: “Fwayeni Yehova, mwe bafuuka ba mu calo bonse; mwe bacito bupingushi bwakwe, fwayeni ubulungami, fwayeni ubufuke; napamo kuti mwabelama mu bushiku bwa bukali bwa kwa Yehova.”—Sefania 2:3.