Bonse Tulatiina Imfwa!

KALEMBA wa lyashi lya kale umwina Britain Arnold Toynbee alembele ukuti: “Ilyo umuntu afyalwa fye, kulaba ukwenekela ukuti inshita iili yonse kuti afwa.” Na kabili alandile ukutila: “Ukwabula no kutwishika ici e cicitika ku muntu uuli onse.” Tulaba aba bulanda ilyo lupwa wesu nangula cibusa afwa!

Pa myaka iingi abantu balatiine mfwa. Ilyo cibusa wesu afwa, tulapelenganishiwa. Takwaba umuntu nangu umo uushingafwa. Kalemba wa malyashi uwa mu myaka ya ba1800 alandile ukuti: “Ubulanda butulenga ukuba kwati baice, te mulandu twalisambilila nelyo iyo. No wa mano sana teshiba ica kucita.” Tuba fye nga bana abanono, tulapelelwa, tatwishiba ifya kucita. Icuma na maka te kuti fifumyepo ubulanda tukwata nga twafwilwa. Aba mano na bacenjela cilabapesha amano. Abashipa nabo baloosha fye nga bantu abatefya.

Davidi Imfumu ya mu Israele wa pa kale ali no bulanda nga nshi ilyo umwana wakwe Abishalomu afwile. Lintu aumfwile ukuti umwana wakwe nafwa, Davidi alilooseshe no kulila apakalamba. Atile: “Mwana wandi Abishalomu, mwana wandi, mwana wandi Abishalomu! Iye kanshi nga nine nafwa ukucila iwe, Abishalomu mwana wandi, we mwana wandi!” (2 Samwele 18:33, NW) Imfumu iya maka iyacimfishe abalwani ba maka abengi nga nshi, ilyo umwana waiko afwile tayakwete amaka lelo ilyo yalelila yaleti nga e yacimfiwe ku ‘mulwani wa kupelelekesha, imfwa’ ukucila umwana waiko.—1 Abena Korinti 15:26.

Bushe kwaliba icingafumyapo imfwa? Imfwa nga kuti yafumapo, ninshi lisubilo nshi ilya bafwa? Bushe tukabala atumona abafwa besu na kabili? Icipande cikonkelepo calayasuka aya mepusho.