Talukeni ku Mipepele ya Bufi!
Talukeni ku Mipepele ya Bufi!
“‘E ico fumenimo muli bene, no kuipaatulako,’ e fyo asosa Yehova, ‘kabili mwi-ikatako ku cishasanguluka’”—2 ABENA KORINTI 6:17.
1. Cinshi ico abengi abafumacumi bakabila ukwishiba?
ABENGI abafumacumi tabaishiba icine pali Lesa na pa nshita ya ku ntanshi iya bantunse. Apo tabasanga ifyasuko ku fya ku mupashi ifyo bakabila ukwishiba, basumina mu fyalekanalekana kabili tabaishiba ifyakucita. Ici e calenga abengi ukulapepe mipashi, ukulakonka sana intambi, no kulasefya imitebeto iifulwisha Kabumba. Mufwile na imwe mwalikwata abena mupalamano na balupwa abasumina ukuti kwaliba umulilo wa helo, ukuti Lesa abamo batatu, umweo taufwa, nelyo mu fisambilisho fimbi ifya bufi.
2. Cinshi bashimapepo bacita, kabili cinshi cafumamo?
2 Cinshi calenga ukuti abantu abengi beishiba Lesa? Mwalapapa ukwishiba ukuti mipepele e yalenga, e kuti amacalici na bashimapepo abafunda ifisambilisho fyapusana ne Cebo ca kwa Lesa. (Marko 7:7, 8) Ici calenga abantu abengi ukulatontonkanya ukuti bapepa Lesa wa cine ilyo ifyo bacita fya kumufulwisha fye. Imipepele ya bufi e yalenga ukuti abantu babe mu mfifi ya ku mupashi.
3. Nani utungilila imipepele ya bufi, kabili bamulondolola shani mu Baibolo?
3 Kwaliba icibumbwa icishimoneka icitungilila imipepele ya bufi. Ilyo umutumwa Paulo alelanda pali ici cibumbwa atile: “lesa wa bwikashi buno apofwisha amatontonkanyo ya bashasumina, ku kulesha ukubalika muli bene ulubuuto lwa mbila nsuma ya bukata bwa kwa Kristu, uuli cipasho ca kwa Lesa.” (2 Abena Korinti 4:4) Uyu “lesa wa bwikashi buno” ni Satana Kaseebanya. E utungilila imipepele ya bufi. Paulo alembele ukuti: “Satana umwine alayalula umwine ku kuba malaika wa lubuuto. E ico te ca kupapa nga bakapyunga bakwe na bo baleyalula abene ku kuba bakapyunga wa bulungami.” (2 Abena Korinti 11:14, 15) Satana alenga ifintu ifibi fyalamoneka kwati fisuma kabili alabepa abantu no kubalenga ukusumina ubufi.
4. Cinshi Lesa aebele abena Israele pali bakasesema ba bufi?
4 Kanshi e mulandu wine Baibolo yapatila imipepele ya bufi! Ku ca kumwenako, Amafunde ya kwa Mose yalisokele abantu ba kwa Lesa pali bakasesema ba bufi. Umuntu onse uwali no kulasambilisha ifya bufi no kulenga abantu ukulapepa tulesa twa bufi ali no ‘kwipaiwa pa kusosa ifya kupondokela Yehova.’ Abena Israele babebele ‘ukufumya icabipa mu kati kabo.’ (Amalango 13:1-5, NW) Ca cine, Yehova alipata imipepele ya bufi.—Esekiele 13:3.
5. Kusoka nshi uko tulingile ukumfwila?
5 Yesu Kristu na batumwa bakwe balipatile ukupepa kwa bufi kwati fye ni fintu Yehova akupata. Yesu asokele abatumwa bakwe ukuti: “Cenjeleni kuli bakasesema wa bufi abesa kuli imwe mu fya kufwala fya mpaanga, lelo mu kati mimbulu iyabuuka.” (Mateo 7:15; Marko 13:22, 23) Paulo alembele ukuti “icipyu ca kwa Lesa cilesokololwa ukufuma ku muulu pa kukanapepa konse no kukanalungama kwa bantu abaleshimaisha icine.” (Abena Roma 1:18) Calicindama sana ukuti Abena Kristu baleumfwila uku kusoka no kutaluka onse uushimaisha icine caba mu Cebo ca kwa Lesa nelyo uusambilisha ifya bufi!—1 Yohane 4:1.
Fumeni Muli “Babiloni Mukalamba”
6. Bushe Baibolo yapashanya “Babiloni Mukalamba” kuli cinshi?
6 Moneni ifyo ibuuku lya Ukusokolola lilondolola imipepele ya bufi. Baibolo yapashanya imipepele ya bufi kuli cilende uwakolwa, uwakwata amaka pa mabufumu ayengi na pa bantu abaikalamo. Uyu mwanakashi wa mampalanya acita ubulalelale ne shamfumu ishingi kabili alikolwa umulopa wa babomfi ba kwa Lesa wa cine. (Ukusokolola 17:1, 2, 6, 18) Pa mpumi yakwe palembwa ishina ilyumfwana sana ne mibele yakwe iyabipa kabili iya muselu. Ilyo shina ni “Babiloni Mukalamba, nyina wa banakashi bacilende kabili uwa fya muselu fya pano isonde.”—Ukusokolola 17:5.
7, 8. Bushe imipepele ya bufi yacita shani ubulalelale, kabili finshi fyafumamo?
7 Ifyo Amalembo yalondolola Babiloni Mukalamba e fyaba imipepele ya bufi yonse. Nangu ca kuti imipepele iingi iyaba mu calo tayaikatana pa kuti ipange akabungwe kamo, yalikatana nga nshi mu mapange yaiko na mu fyo icita. Imipepele ya bufi yalikwata sana amaka pa mabuteko nga filya fine bailondolola ngo mwanakashi umulalelale mwi buuku ilya Ukusokolola. Yapala umwanakashi uushaba na cishinka ku mulume wakwe mu kuti yalicita ubulalelale ilyo yapangana ifipangano na mabuteko ayalekanalekana. Yakobo alembele ukuti: “Mwe banakashi bacende, bushe tamwaishiba ukuti bucibusa ne calo bulwani kuli Lesa? E ico, onse uufwayo kuba cibusa wa calo aicito mulwani wa kwa Lesa.”—Yakobo 4:4.
8 Ukwikatana kwa mipepele ya bufi na mabuteko kwalenga abantu ukulacula nga nshi. Dokota Xolela Mangcu uwasambilila pa mitekele ya mu Afrika atile “ukutula na kale mu calo mwaba ifya kumwenako ifingi ifya bantu abaipaiwa pa mulandu wa kuti imipepele na mabuteko fyalikatana.” Nomba line, nyushipepala imo yalandile ukuti: “Muno nshiku, imipepele . . . e ilenga ukukansana kwabipisha umo abantu abengi nga nshi bafwa.” Abantu abengi nga nshi balibepaya mu kukansana ukutungililwa ne mipepele. Babiloni Mukalamba alipakasa fye na bantu ba kwa Lesa wa cine no kubepaya, ica kuti mu mampalanya, alikolwa umulopa wabo.—Ukusokolola 18:24.
9. Bushe ibuuku lya Ukusokolola lilanga shani ifyo Yehova apata imipepele ya bufi?
9 Ifyo Baibolo yalanda ukuti e fikacitikila Babiloni Mukalamba filangilila ukuti Yehova alipata imipepele ya bufi. Pa Ukusokolola 17:16 patila: “Ne nsengo ikumi (10) isho umwene, ne ciswango, ifi fikapata cilende no kumonaula no kumucita ubwamba, kabili fikalya umubili wakwe no kumoca nakalya nakalya ku mulilo.” Intanshi iciswango cikamufumfunya no kumwipaya kabili cikalya umubili wakwe. Lyena fyonse ifikashalako bakafyoca mu mulimo. Nomba line amabuteko ya muli cino calo yakacita ica musango yu ku mipepele ya bufi. Lesa akalenga ici cikacitike. (Ukusokolola 17:17) Babiloni Mukalamba, ubuteko bwa mipepele ya bufi iya mu calo conse, bakamonaula. ‘Takatale asangwa kabili.’—Ukusokolola 18:21.
10. Bushe tulingile ukulamona shani imipepele ya bufi?
10 Bushe abapepa Lesa wa cine balingile ukulamona shani Babiloni Mukalamba? Ukwabula no kupita mu mbali Baibolo ibeba ukuti: “Fumenimo muli wene, mwe bantu bandi, nga tamulefwaya ukukumako ku membu shakwe, kabili nga tamulefwaya ukupokelelako ifinkunka fyakwe.” (Ukusokolola 18:4) Abalefwaya ukupusuka bafwile ukufuma mu mipepele ya bufi ilyo inshita ishilapwa. Ilyo Yesu Kristu ali pano isonde, asobele ukuti mu nshiku sha kulekelesha, abengi bakalati balamumfwila. (Mateo 24:3-5) Lelo, akeba aba musango yu ukuti: “Nshatalile imwishiba! Fumeni apa, mwe bampulamafunde.” (Mateo 7:23) Yesu Kristu, Imfumu ileteka, alipata nga nshi imipepele ya bufi.
Kuti Twataluka Shani ku Mipepele ya Bufi?
11. Cinshi tulingile ukucita pa kuti tutaluke ku mipepele ya bufi?
11 Abena Kristu balataluka ku mipepele ya bufi lintu bakaana ifisambilisho fya bufi. Ici cilolele mu kuti tatulingile ukulaumfwa ku mapepo ya pa cilimba nangu ukulatamba pa TV nelyo ukubelenga ifitabo fisambilisha ubufi pali Lesa na pa Cebo cakwe. (Amalumbo 119:37) Na kabili tulakaana ukuya ku kukumana nelyo kwangalila pamo ukutungililwa no tubungwe twa mu mipepele ya bufi. Kabili tatutungilila imipepele ya bufi nangu panono. (1 Abena Korinti 10:21) Ukutaluka ku fya musango yu kulatucingilila ku kuba ifinakabupalu “ku mano ya buntunse no bucenjeshi ukulingana ne cishilano ca bantu, ukulingana ne fintu fya fye ifya pano calo kabili te kulingana na Kristu.”—Abena Kolose 2:8.
12. Bushe umuntu kuti acita shani pa kuleka ukwampana ne mipepele ya bufi?
12 Nga ca kuti umuntu uulefwaya ukube Nte ya kwa Yehova aba mu mipepele ya bufi cinshi engacita? Ilingi line, ukulemba kalata wa kwishibisha icalici ukuti tali membala wabo kulanga ukuti uyu muntu talefwaya ukulamumona nga membala wa mipepele ya bufi. Calicindama sana ukuti uyo muntu mukwangufyanya ataluke ku kupepa kwa bufi pa kuti taikoweseshe lwa ku mupashi. Ifyo umuntu uulefwaya ukube Nte alecita, fifwile ukulangilila aba ku calici aleyako na bantu bonse ukuti naleka ukwampana ne lyo icalici.
13. Kufunda nshi Baibolo itupeela pa kutaluka ku mipepele ya bufi?
13 Umutumwa Paulo alembele ukuti: “Mwiba kwi koli limo line na bashasumina. Pantu ubulungami na bumpulamafunde kuti fyayampana shani? Napamo ulubuuto ne mfifi kuti fyakwate senge shani? Kabili, kuli ukuumfwana nshi kuli Kristu na Beliali? Napamo kuti kwabe senge nshi ku watetekela no ushasumina? Kabili kuli ukusuminishanya nshi kwi tempele lya kwa Lesa no tulubi? . . . ‘E ico fumenimo muli bene, no kuipaatulako,’ e fyo asosa Yehova, ‘kabili mwi-ikatako ku cishasanguluka.’” (2 Abena Korinti 6:14-17) Tukalanga ukuti tuleumfwila aya mashiwi nga ca kuti tuletaluka ku mipepele ya bufi. Bushe uku kufunda kwa kwa Paulo kulepilibula no kuti tufwile ukutaluka ku baba mu mipepele ya bufi?
“Mule-enda Mano Mano”
14. Bushe tulingile ukulekelela fye ukwampana na baba mu mipepele ya bufi? Londololeni.
14 Bushe abapepa Lesa wa cine balingile ukutaluka ku baba mu mipepele ya bufi? Bushe tulingile ukulekelela fye ukwampana na bo tushaba nabo mu citetekelo? Icasuko ni iyo. Ifunde lya bubili pali yalya yabili ayakalamba litila: “Uletemwo munobe nga we mwine.” (Mateo 22:39) Tulanga ukuti twalitemwa abanensu ilyo tulebashimikilako imbila nsuma iya Bufumu. Na kabili tulanga ukuti twalibatemwa ilyo tusambilila nabo Baibolo ukubafwa ukwishiba ukuti balingile ukutaluka ku mipepele ya bufi.
15. ‘Ukukanaba aba pano calo’ kwalola mwi?
15 Nangu ca kuti fwe basambi ba kwa Yesu tulashimikila bambi imbila nsuma, ‘tatuli ba pano calo.’ (Yohane 15:19) Ishiwi “icalo” lilelosha ku bantunse abataluka kuli Lesa. (Abena Efese 4:17-19; 1 Yohane 5:19) Tulaipaatula ku ba pano calo ilyo tutaluka ku misango, imilandile, ne mibele iifulwisha Lesa. (1 Yohane 2:15-17) Na kabili tulomfwila icipope citila, “ukubishanya kubi konaule mibele isuma” lintu tulesengauka ukupanga ifibusa na bantu abashikonka ifipimo fya Bwina Kristu. (1 Abena Korinti 15:33) Ukukanaba aba pano calo kupilibula “ukuisunga ababula akalema ku fya pano calo.” (Yakobo 1:27) Kanshi ukuipaatula ku ba pano calo takupilibula ukulekelela fye ukwampana na bashili Bena Kristu.—Yohane 17:15, 16; 1 Abena Korinti 5:9, 10.
16, 17. Bushe Abena Kristu bafwile ukulamona shani abashaishiba icine ca mu Baibolo?
16 Nomba, tulingile ukulamona shani abashaishiba icine ca mu Baibolo? Umutumwa Paulo alembele icilonganino ca mu Kolose ukuti: “Mule-enda mano mano ku ba ku nse, muleilubwile nshita mwe bene. Icebo cenu conse cibe ica kusenamina, icalungwamo umucele, ukuti mwishibe ifyo mufwile ukwasuka umuntu onse.” (Abena Kolose 4:5, 6) Umutumwa Petro na o alembele ukuti: “Shisheni Kristu nga Shikulu mu mitima yenu, lyonse mube abaiteyanya ukuisosela ku muntu onse uwingamwipusha pe subilo lyenu, lelo mulesose fyo no mutima uwafuuka na katiina.” (1 Petro 3:15) Paulo afundile Abena Kristu “ukupontela umuntu nangu umo iyo, ukukanaba no lubuli, ukuba abanakilila, abafuuka ku bantu bonse.”—Tito 3:2.
17 Fwe Nte sha kwa Yehova tatufwile ukusosa amashiwi ayabi kuli bambi nelyo ukukanaba no mucinshi. Tatufwile ukulalanda amashiwi yabipa nga tulelanda pa bantu aba mu mipepele imbi. Ukucila, tufwile ukulanda amashiwi ayasuma nangu ni lintu abene ba mayanda, abena mupalamano, nelyo abo tubomba nabo batusasukila nangu ukutupontela.—Abena Kolose 4:6; 2 Timote 2:24.
‘Muleikatisha Icipasho ca Fyebo Ifituntulu’
18. Mibele nshi iyabipa iya ku mupashi iyo ababwelela ku kupepa kwa bufi babamo?
18 Ala kuti cabipa nga ca kuti umuntu abwelela mu kupepa kwa bufi pa numa ya kusambilila icine ca mu Baibolo! Baibolo ilondolola ifyabipa ififuma mu kucita ububi bwa musango yo ilyo itila: “Nga cine cine, pa numa ya kufulumuka ku fya kukowesha fya pano calo ilyo baishiba bwino bwino Shikulu kabili Umupusushi Yesu Kristu, baipoosamo na kabili muli ifi fine fintu no kwanshiwa, imibele yabo ya kulekelesha yaba iyabipisha kuli bene ukucila iya kubalilapo. . . . Cabaponena icasosa ipinda lya cine, ati: ‘Imbwa yabwelela ku malushi ya iko, ne nkumba nkota iisambilwe yabwelela ku kuikunkusha mu matipa.’”—2 Petro 2:20-22.
19. Mulandu nshi cacindamina ukuba abacenjela ku fintu fyonse ifingonaula bumupashi bwesu?
19 Tulingile ukucenjela ku fintu fyonse ifingonaula bumupashi bwesu. Ifi fintu eko fyaba! Umutumwa Paulo atusoka ukuti: “Icebo capuutwamo casosekesha ukuti mu nshita ishikakonkapo bamo bakafutukako ku citetekelo, no kwangwa ifyebo fyapuutwamo ifya kulufya ne fisambilisho fya fibanda.” (1 Timote 4:1) Tuleikala mu nshiku Paulo aitile ukuti “inshita ishikakonkapo.” Abashitaluka ku mipepele ya bufi kuti ‘basensenunwa nga ku mabimbi kabili kuti baulwilwa uku no ku, ku mwela onse uwe sambilisho ku bucenjeshi bwa bantu, ku longolo lwa mapange ayalubana.’—Abena Efese 4:13, 14.
20. Bushe kuti twaicingilila shani ku kusonga kwabipa ukwa mipepele ya bufi?
20 Bushe kuti twaicingilila shani ku kusonga kwabipa ukwa mipepele ya bufi? Tontonkanyeni pa fintu fyonse ifyo Yehova atucitila. Alitupeela Icebo cakwe Baibolo. (2 Timote 3:16, 17) Na kabili Yehova alatupeela ifya kulya fya ku mupashi ifingi ukupitila mu “musha wa cishinka kabili uwashilimuka.” (Mateo 24:45) Kanshi ilyo tuleishibilako icine, tulingile ukulalya “ifilyo ifyakosa ifya bakosoka” no kulafulukisha ukusangwa ku kulongana uko tusambilila icine ca mu Baibolo! E ico, kanshi, natupampamine pa kulashukila fyonse ifyo Yehova atucitila pa kuti ‘tuleikatisha icipasho ca fyebo ifituntulu’ ifyo twaumfwile. (2 Timote 1:13) Nga twacite fyo ninshi tukataluka ku mipepele ya bufi.
Finshi Mwasambilila?
• “Babiloni Mukalamba” nani?
• Finshi tulingile ukucita pa kuti tutaluke ku mipepele ya bufi?
• Ni finshi ifyo tulingile ukusengauka ifingonaula bumupashi bwesu?
[Amepusho]
[Icikope pe bula 28]
Bushe mwalishiba umulandu “Babiloni Mukalamba” bamulondolwela ngo mwanakashi umulalelale?
[Icikope pe bula 29]
“Babiloni Mukalamba” ali no konaulwa
[Icikope pe bula 31]
Tulaba no “mutima uwafuuka na katiina” kubo tushaba nabo mu citetekelo