Amepusho Ukufuma ku Babelenga

Cinshi twingasambilila ku cibindo caba pa Ukufuma 23:19 ica kuti: “Wilaipikila akana ka mbushi mwi shiba lya kwa nyina”?

Ili funde ilyaba mu Mafunde ya kwa Mose, muli Baibolo lisangwamo imiku itatu kabili kuti lyatwafwa ukwishiba ifyo Yehova amona ifintu fyalinga. Kabili lilalangilila ne nkumbu shakwe ne fyo aba uwanakilila. Na kabili, lilalanda sana pa fyo Yehova apata ukupepa kwa bufi.—Ukufuma 34:26; Amalango 14:21.

Ukwipikila akana ka mbushi nelyo akana ka nama imbi mu mukaka wa kwa nyina, kwalipusana sana ne nshila iyo Yehova apekanishishamo ifintu ukuti e fyo fileba. Lesa e wapekenye ukuti umukaka wa kwa nyina ulekosha umubili wa kaana ka mbushi no ku-ulenga ukukula bwino. Uwasambilila umo alandile ukutila ukwipikila akana ka mbushi mu mukaka wa kwa nyina “kusaalula ukupekanya kwa kwa Lesa ukwa kuti tufwile ukucindika ukumfwana kwaba pali nyina no mwana.”

Na kabili, bamo batila ukwipikila akana ka mbushi mu mukaka wa kwa nyina napamo lwali lutambi ulo abena fyalo balecita pa kuti imfula iloke bwino. Kwena, nga ca kuti cine cine lwali lutambi lwa bena fyalo, ninshi Lesa abikileko ici cibindo pa kuti acingilile abena Israele ku ntambi shabulamo amano kabili isha bunkalwe isha bena fyalo ababashingulwike. Amafunde ya kwa Mose mu kulungatika yalibindile abena Israele ukutila tabafwile ukwenda mu fipope fya bena fyalo.—Ubwina Lebi 20:23.

Na mukulekelesha, ili funde lilatulanga ukuti Yehova wa cikuuku. Na kuba, kwali Amafunde na yambi ayapalako. Kwali amafunde ayalelesha ukusunga ifinama buluku buluku e lyo no kucingilila abantu ku kucita ifingapusana ne nshila Lesa apekanishishamo ifintu ukuti e fyo fileba. Ku ca kumwenako, Ifunde lyalikeenye ukupeela ilambo akana ka nama akashilafisha inshiku 7, Ifunde lyalileseshe ukwipaya inama capamo na bana ba iko mu bushiku bumo, nangu kusendela pamo icuni na mani ya ciko nelyo utwana ifili pa cinsa.—Ubwina Lebi 22:27, 28; Amalango 22:6, 7.

Ukwabula no kutwishika, Amafunde tayali ayayafya ukukonka kabili te kutila yalelanda fye pa fyo umuntu afwile ukucita nelyo ifyo ashifwile ukucita. Lelo ubusuma bumo ubwa aya mafunde bwa kuti ifishinte fyabamo filalenga na ifwe ukuba ne mibele iisuma nga nshi iyo Yehova akwata.—Amalumbo 19:7-11.

[Abatusuminishe Ukubomfya Icikope pe bula 31]

© Timothy O’Keefe/Index Stock Imagery